काठमाडौं। अविरल वर्षा, बाढी र पहिरोका कारण नुवाकोट, रसुवा, मनाङ, गुल्मी, म्याग्दी, मुस्ताङ, नवलपरासी पूर्व, लमजुङ, ललितपुर र हुम्लाका विभिन्न सडक तथा राजमार्ग अवरुद्ध भएका छन्।
कतिपय सडकमा पहिरो तथा नदी कटानका कारण सडक पूर्ण रूपमा बन्द भएका छन् भने केही स्थानमा वैकल्पिक मार्ग प्रयोग गर्न सकिने अवस्था रहेको छ।
नुवाकोटमा वर्षाका कारण टोखा–छहरे सडक खण्डमा अत्यावश्यक सेवाबाहेक अन्य सार्वजनिक तथा निजी सवारी साधनको रातिको आवतजावतमा रोक लगाइएको छ। २०८३ भदौ १ गतेदेखि अर्को सूचना जारी नभएसम्म राति १० बजेदेखि बिहान ५ बजेसम्म उक्त सडक खण्डमा सवारी आवतजावत पूर्ण रूपमा बन्द गरिएको छ।
रसुवाको पासाङ ल्हामु सडक खण्ड पनि पूर्ण रूपमा अवरुद्ध भएको छ। २०८३ साउन ८ गते बिहान ८ बजे उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने कच्ची सडक खण्डलाई त्रिशूली नदीले सडकमुनिबाट कटान गरेपछि बाटो अवरुद्ध भएको थियो। त्यसपछि साउन १० गते आएको बाढीका कारण सडकको अधिकांश भाग नष्ट भएको जनाइएको छ।
रसुवा र नुवाकोटतर्फको मुख्य पासाङ ल्हामु राजमार्ग पनि बाढीका कारण पूर्ण रूपमा अवरुद्ध भएको छ। २०८३ भदौ १० गते आएको बाढीले त्रिशूली बजार, बेत्रावती बजार हुँदै रसुवागढी नाकासम्म जाने राजमार्गको त्रिशूली नदी किनारका अधिकांश भाग कटान गरेको छ।
स्याफ्रुबेंसीसम्म पुग्न काठमाडौं–टोखा–छहरे हुँदै विदुर, नुवाकोट दरबार, फलाँटे, चोकदे, लच्याङ, सरमथली, पार्च्याङ, भोर्ले, ० किलोमिटर, कालिकास्थान, स्याउबारी, राम्चे, सोले, धुन्चे हुँदै स्याफ्रुबेंसी पुग्ने सिंगल लेनको कच्ची सडकलाई वैकल्पिक मार्गका रूपमा प्रयोग गर्न सकिने जनाइएको छ।
मनाङमा २०८३ असोज ९ गते रातिदेखि परेको अविरल वर्षाका कारण आएको बाढीले बेँसीसहर हुँदै खाङसार जाने सडक खण्ड पूर्ण रूपमा अवरुद्ध भएको छ। उक्त दिन बिहान ६ः३० बजेको समयमा सडक अवरुद्ध भएको जनाइएको छ।
गुल्मीको कालिगण्डकी गाउँपालिका–२ राक्सेस्थित कालिगण्डकी करिडोरमा २०८३ असोज ९ गते बिहान करिब ७ः४० बजे सडक माथिबाट लेदोसहितको पहिरो आएको छ। यस्तै, सोही गाउँपालिका–४ स्थित पातीखोलाको बहाव बढेपछि बाटो पूर्ण रूपमा अवरुद्ध भएको छ।
म्याग्दीमा २०८३ असोज १० गते बिहान ५ः५० बजे रघुगंगा गाउँपालिका–२ बैसरी र अन्नपूर्ण गाउँपालिका–३ सुकेबगरमा सडक माथिबाट लेदोमाटोसहितको पहिरो खसेपछि बेनी–जोमसोम सडक खण्ड पूर्ण रूपमा अवरुद्ध भएको छ।
मुस्ताङको जोमसोम–कोरला सडक खण्डका दुई स्थानमा सडक अवरुद्ध भएको छ। २०८३ असोज १० गते बिहान करिब ७ः२५ बजे वारागुङ मुक्तिक्षेत्र गाउँपालिका–३ कालोभीरमा अविरल वर्षाका कारण सडक माथिबाट ढुंगासहितको पहिरो खसेर सडक पूर्ण रूपमा अवरुद्ध भएको हो। सोही दिन बिहान करिब ६ः५० बजे लो–घेकर दामोदरकुण्ड गाउँपालिका–२ सेल्फीडाँडास्थित सडक खण्डमा लेदो आएपछि बाटो पूर्ण रूपमा अवरुद्ध भएको जनाइएको छ।
नवलपरासी पूर्वमा पनि कालीगण्डकी करिडोरका दुई स्थानमा सडक अवरुद्ध भएको छ। २०८३ असोज १० गते साँझ ७ः३० बजे बुलिङटार गाउँपालिका–६ घुमाउरीघाटस्थित सडक खण्डमा माथिबाट लेदोसहितको पहिरो आएपछि बाटो पूर्ण रूपमा अवरुद्ध भएको थियो। त्यस्तै, असोज १४ गते बिहान ६ः४५ बजे बौदीकाली गाउँपालिका–३ जन्तीपहिरोस्थित कालीगण्डकी करिडोरमा करिब २५/३० मिटर सडकको आधा भाग भासिएपछि बाटो पूर्ण रूपमा अवरुद्ध भएको छ।
लमजुङको मध्यपहाडी लोकमार्ग पनि अवरुद्ध भएको छ। २०८३ असोज ११ गते साँझ ५ः५५ बजे मध्यनेपाल नगरपालिका–६ आँपचौरस्थित सडकमा माथिबाट पहिरो आउँदा करिब १०० मिटर सडक भासिएपछि सडक पूर्ण रूपमा अवरुद्ध भएको जनाइएको छ।
ललितपुरको कान्तिलोकपथ पनि अवरुद्ध भएको छ। २०८३ असोज १४ गते बिहान ५ः५० बजे बागमती गाउँपालिका–३ टाकुर्चेस्थित सडकमा माथिबाट सुख्खा पहिरो आउँदा भिरबाट ढुंगा खसेर कान्तिलोकपथ सडक खण्ड पूर्ण रूपमा अवरुद्ध भएको हो।
हुम्लामा पनि अविरल वर्षाका कारण कर्णाली करिडोर र सिमकोट–हिल्सा सडक खण्डका विभिन्न स्थानमा पहिरो गएर सडक अवरुद्ध भएको छ। २०८३ असोज ९ देखि ११ गतेसम्म परेको अविरल वर्षाका कारण पहिरो गएपछि ती सडक खण्ड प्रभावित भएका हुन्।
कर्णाली करिडोरअन्तर्गत २०८३ असोज १२ गते बिहान ७ः४० बजे खार्पुनाथ गाउँपालिका–१ मुसेडी, वडा नं. ५ बिसौनेडाँडा र श्यामने खोलामा सडक अवरुद्ध भएको जनाइएको छ। त्यस्तै, असोज १३ गते बिहान ८ः४० बजे सर्केगाड गाउँपालिका–६ स्यालतडीमा पनि कर्णाली करिडोर अवरुद्ध भएको छ।
सिमकोट–हिल्सा सडक खण्डअन्तर्गत नाम्खा गाउँपालिका–४ यालबाङमा असोज १३ गते बिहान ९ बजे र सिमकोट गाउँपालिका–७ ठाडोढुंगामा सोही समयमा सडक अवरुद्ध भएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
