आन्तरिक उडानमा नयाँ एयरलाइन्स थपिँदै

पर्यटन-उड्डयन

उत्तम काप्री आइतबार, चैत १, २०७७ ०६:२५

काठमाडौं– हवाई उड्डययन क्षेत्रमा आन्तरिक उडानतर्फ नयाँ कम्पनी थपिने भएको छ। नयाँ वायुसेवा कम्पनी दर्ताका लागि संस्कृति, पर्यटन तथा नागरिक उड्डयन मन्त्रालयमा निवेदन दर्ता भइसकेको छ। व्यवसायी दिनेश आर्चायले नयाँ एयरलाइन्स कम्पनी ल्याउन लागेका हुन्।

आचार्यले आन्तरिकतर्फ दुर्गममा उडान (स्टल) गर्ने गरी नयाँ एयरलाइन्स कम्पनी ल्याउन लागेका छन्। शिवम् एयरलाइन्सको नाममा नयाँ एयरलाइन्स कम्पनीको लाइसेन्सका लागि आवेदन आएको मन्त्रालय स्रोतले नेपाल लाइभलाई बतायो।

नयाँ एयरलाइन्सको लागि आवेदन परेसँगै पर्यटन मन्त्रालयले अध्ययनका लागि समिति गठन गरेको छ। समितिले अध्ययन गरेर नयाँ एयरलाइन्स कम्पनीको लाइसेन्स दिने वा नदिने विषयमा सुझाव दिने छ। सोही आधारमा नयाँ एयरलाइन्स कम्पनीको लाइसेन्स जारी हुने मन्त्रालयको भनाइ छ।

मन्त्रालयबाट एयरलाइन्स कम्पनीको लाइसेन्स पाइएपछि एनओसीका लागि नेपाल नागरिक उड्डयन प्राधिकरणमा निवेदन दिनु पर्छ। प्राधिकरणले पनि प्रारम्भिक अध्ययन गरेपछि मात्र एनओसी दिनेछ। एनओसी पाएपछि एयरलाइन्स कम्पनीले जहाज ल्याउन पाउँछ। जहाज ल्याएर सबै प्रक्रिया पूरा गरेपछि प्राधिकरणले एओसी जारी गर्छ। एओसी पाएपछि मात्र ती जहाज उडानमा आउन पाउँछन्।

अहिले नेपालमा आन्तरिक उडानतर्फ बुद्ध, यती, श्री, सौर्य, सिम्रिक, सिता, समिट, तारा एयरलाइन्स छन्। त्यसमा पनि तारा, सिता, समिटले दुर्गममा उडान गरिरहेका छन्। नयाँ एयरलाइन्स कम्पनी पनि स्टल (दुर्गम)मा उडान गर्ने गरी आउन लागेको हो।

सञ्चालनमा आएका नेपाल एयरवेज, कस्मिक, नेकोन, काष्ठमण्डप, मकालु लगायतका एयरलाइन्स उडान सुरु भए पनि आर्थिक संकटका कारण बन्द भएका थिए। ती एयरलाइन्सहरुको एओसी समेत खारेज भइसकेको छ। अहिले पनि सञ्चालनमा रहेका कतिपय एयरलाइन्सले आर्थिक संकट भोग्दै आएका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।