काठमाडौं– नेपाल कम्युनिष्ट पार्टी (नेकपा)का नेता गगन पुरी भनेर चिनिने रेवतराज पुरीको नाममा रहेको झण्डै साढे १७ विघा जग्गा तत्काल जफत गरी सरकारको नाममा ल्याउनुपर्ने निष्कर्ष सम्पत्ति शुद्धीकरण विभागले निकालेको छ। झण्डै तीन महिना लामो अनुसन्धान गरेको विभागले पुरीसहित उनकी श्रीमती र आफ्न्तको नाममा रहेको साढे १७ विघा जग्गा सरकारको नाममा ल्याउनुपर्ने ठहर गरेको हो।
गत मंसिर ९ गते पुरीलाई पक्राउ गरी विभागले माघ २१ गतेसम्म अनुसन्धान गरी मुद्दा दर्ता गरेको थियो। विभागले तयार पारेर बुझाएको अनुसन्धान फाइलमा उनीसहित श्रीमती सीमा भनिने केशावती पुरी, गगनको दिदी मनमाया पुरी, भाइ देवकुमार पुरी र पथरीका ओमप्रकाश पौडेलको नाममा रहेको ११८०२०.८८ वर्गमिटर अर्थात १७ विघा ८ कट्ठा १०.५१७ धुर जग्गा सरकारको नाममा ल्याउनुपर्ने निष्कर्ष निकालेको हो।
गगनको नाममा रहेको झापाको दमक नगरपालिका–१४ मा रहेको ५९४.६ वर्ग मिटर जग्गा सरकारको रहेको तथ्य विभागले निकालेको छ।
त्यसैगरी उनको श्रीमतीको नामको दमक–१३ मा रहेको कित्ता नम्बर ३८ मा रहेको ६२४० वर्ग मिटर जग्गामध्ये ८० प्रतिशतभन्दा बढी अर्थात् ५०११.६८ वर्गमिटर जग्गा सरकारी रहेको निष्कर्ष विभागको छ। केशावतीकै नाममा रहेको दमक–१३ को कित्ता नम्बर ६६ को ८३ वर्गमिटर, कित्ता नम्बर ५६ को ३०० वर्गमिटर, कित्ता नम्बर ५७ को ४५६ वर्गमिटर, कित्ता नम्बर १४ को ४०१.९६ वर्गमिटर, कित्ता नम्बर ६९ को ३४६ वर्गमिटर, कित्ता नम्बर ४० को १६९.३ वर्गमिटर, कित्ता नम्बर १०९ को ८०६.८५ वर्गमिटर लगायत २३ वटा कित्ताको जग्गा सरकारी भएको विभागको निष्कर्ष छ। केशावतीको नाममा रहेको जग्गामध्ये १६०३०.५९ वर्गमिटर जग्गा सरकारको रहेको र सरकारी नाममा ल्याउनुपर्ने भन्दै विभागले मुद्दा दायर गरेको छ।
त्यस्तै दमक–१३ मै मनमाया पुरीको नाममा रहेका ६ वटा कित्ताका जग्गाहरु सरकारी रहेको पाइएको छ। कित्ता नम्बर २४ को ६६० वर्गमिटर, कित्ता नम्बर ७६ को १९१३ वर्गमिटर, कित्ता नम्बर ९२ को ८०४.४३ वर्गमिटर, कित्ता नम्बर ६६ को ३३ वर्गमिटर, कित्ता नम्बर ४ को ३१९ वर्गमिटर र कित्ता नम्बर १७ को २०८१.२६ गरी जम्मा ५८१०.६९ वर्गमिटर जग्गा सरकारको नाममा ल्याउनुपर्ने विभागको अनुसन्धानले देखाएको छ।
देवकुमार पुरीको नाममा रहेको दमक–११ को ३७० वर्गमिटर, ओमप्रकाश पौडेलको नाममा रहेको दमक–१३ को ७८५९० वर्गमिटर जग्गा सरकारको नाममा ल्याउनुपर्ने विभागको निष्कर्ष छ।
२०६७ सालमा ऐलानी जग्गाहरु सुकुम्बासीलाई वितरण गर्ने भनेपछि पौडेलले नागरिकताको फोटोकपी र फोटो स्थानीय नेता गगनलाई बुझाएका थिए। तिनै नागरिकता र फोटा राखेर कीर्ते गरी गगनले पौडेलको नाममा मात्रै ७८५९० वर्गमिटर अर्थात् ११ बिगाहा १२ कट्ठा १ं६६१ धुर जग्गा ल्याएको अनुसन्धानबाट खुलेको छ। यद्यपि सम्पत्ति शुद्धीकरण विभागले पौडेललाई भने मुद्दा चलाएको छैन। पौडेलविरुद्ध इलाका प्रहरी कार्यालय दमकले कीर्ते मुद्दा चलाएको थियो। त्यसबेला उनी १ लाख ७५ हजार रुपैयाँ धरौटीमा छुटेका थिए।
गगनको समूहले बेचेका झण्डै ४० विघा जग्गाको किनबेच रोक्का यसअघि नै गरिसकिएको छ। यो सँगै ५७ विघा भन्दा बढी सरकारी जग्गा विभिन्न व्यक्तिको नाममा ल्याएर गगनले करोडौ मूल्यमा बेचेको अनुसन्धानबाट खुलेको छ।
मालपोत र नापी कार्यालयका कर्मचारीसँग मिलेमतो गरी गगन पुरीले सरकारी जग्गा आफ्नो नाममा ल्याई झण्डै ४० बिघा जग्गा बेचेका थिए भने साढे १७ बिघा जग्गा अझै पुरी परिवारकै नाममा रहेको छ।
२०३९ सालभन्दा अघि यी जग्गामा ८८ परिवार सुकुम्बासीको बसोबास थियो। नेपाल सरकारबाटै २०३९ सालमा गठन गरिएको सुकुम्वासी आयोगले ती जग्गा सुकुम्बासीहरु बसोबास गरे बमोजिम धनीपूर्जा दिने उद्धेश्यले फिल्डबुक भराउने काम गरेको थियो। पछि नक्सा बनाई कित्ताकाट समेत गरी सुकुम्बासीको नाममा निस्सा प्रमाण दिलाएको थियो।
सुकुम्बासी बस्तीमा रतुवा खोला बगेपछि बस्ती विस्थापित भएको थियो। त्यहि जग्गा पछि गगनले कर्मचारीको मिलेमतोमा आफ्नो नाममा पारी बेचेका थिए। सार्वजनिक जग्गा व्यक्तिको नाममा ल्याउनका लागि नापी कार्यालय र मालपोत कार्यालयको ढड्डामा पाना समेत थप गरिएको अनुसन्धानबाट खुलेको थियो।
नापी र मालपोत कार्यालयका खातामा पाना थप्न लगाएर कीर्ते धनीपूर्जा बनाइएको थियो। खोला किनारको सार्वजनिक जग्गाको कित्ता नम्बर नै परिवर्तन गरेर आफ्नो नाममा ल्याएर गगनसहितका व्यक्तिले बेचेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_20250316123751-1750174625.jpg)
-1749801778.jpg)
-1749826086.png)
