काठमाडौं– गृहमन्त्रीको सचिवालयदेखि कर्मचारी सरुवा र सरकारी निकायमा नियुक्तिसम्म आफ्नो पहुँच रहेको दाबी गर्दै आएका आशिष मल्ल भन्ने धर्मराज मल्ल पक्राउ परेका छन्।
मल्ल पक्राउ पर्नुअघि सार्वजनिक भएको एउटा अडियोले उनको नाम फेरि चर्चामा ल्याएको थियो। केही दिनअघि जनआस्थाले सार्वजनिक गरेको उक्त अडियोमा मल्ल र आफूलाई कृषिमन्त्रीको नजिकको मान्छे भन्ने बाँकेका पत्रकारसमेत रहेका हेमन्त चौधरीबीच सरकारी कर्मचारीको सरुवा–नियुक्ति, राजनीतिक पहुँच र विभिन्न सरकारी निकायमा हुने कामकारबाहीबारे कुराकानी भएको देखिन्छ।
अडियोमा चौधरीले आफू गृहमन्त्रीको सचिवालयमा प्रभाव राख्ने व्यक्तिहरूसँग निकट रहेको र कर्मचारी सरुवा तथा नियुक्तिमा आफ्नो पहुँच रहेको दाबी गरेका छन्। कुराकानीका क्रममा गृह मन्त्रालय, गृहमन्त्रीको सचिवालय तथा कारागार व्यवस्थापनसँग जोडिएका केही व्यक्तिको नामसमेत लिइएको छ।
जनआस्थाको समाचारअनुसार, विभिन्न कारागारमा चौकीदार नियुक्त गर्दा ठूलो रकम उठाउने गरिएको दाबीसमेत उक्त कुराकानीमा गरिएको थियो। गृहमन्त्रीका स्वकीय सचिव जेम्स कार्की, गृहसचिव राजकुमार श्रेष्ठ र कारागार व्यवस्थापन विभागका महानिर्देशकसमेत आर्थिक लेनदेनमा जोडिएको दाबी चौधरीले गरेको समाचारमा उल्लेख छ।
यद्यपि यी सबै कुरा अडियोमा कुराकानी गर्ने व्यक्तिले गरेका दाबी हुन्। ती आरोप पुष्टि भएको वा सम्बन्धित व्यक्तिहरूले रकम लिएको तथ्य प्रहरीले सार्वजनिक गरिसकेको छैन।
सांसद र मन्त्रीसँगको सम्बन्धको दाबी
त्यही कुराकानीमा चौधरीले राष्ट्रिय स्वतन्त्र पार्टीका सांसद ठाकुरसिंह थारू र कृषि मन्त्री गीता चौधरीसँग आफ्नो निकट सम्बन्ध रहेको अर्थ लाग्ने गरी कुरा गरेका छन्। सरकारी कर्मचारीको सरुवा र नियुक्तिमा आफूले प्रभाव पार्न सक्ने दाबीसमेत उनले गरेका छन्।
अडियो सार्वजनिक भएपछि सांसद थारूले भने त्यसमा आफ्नो कुनै संलग्नता नरहेको बताएका छन्। चौधरी आफ्नो स्वकीय सचिव वा सल्लाहकार नरहेको तथा कर्मचारी सरुवा वा आर्थिक लेनदेनको विषयमा आफू संलग्न नरहेको उनको भनाइ थियो। उनले मल्ललाई समेत आफूले राम्रोसँग नचिनेको दाबी गरेका थिए।
यसरी अडियोमा आएका दाबी र सम्बन्धित व्यक्तिहरूको प्रतिक्रियाबीच नै मल्लको पक्राउको प्रसंग जोडिएको हो।
अडियो सार्वजनिक भएपछि प्रहरीको खोजी
अडियो सार्वजनिक भएको केही दिनपछि प्रहरीले मल्ललाई पक्राउ गरेको हो। उनलाई नेपालगञ्जबाट पक्राउ गरी काठमाडौं ल्याइएको थियो। त्यसपछि मेडिकल परीक्षण गराएर काठमाडौं प्रहरी परिसरको हिरासतमा राखिएको थियो ।
काठमाडौं प्रहरीको विवरण भने केही फरक छ। प्रहरीका अनुसार सामाजिक सञ्जालमा सार्वजनिक भएको अडियो तथा त्यससँग सम्बन्धित गतिविधिको सत्यतथ्य बुझ्ने क्रममा मल्ल सम्पर्कमा आएका थिए। सोधपुछका क्रममा प्रहरी टोलीमाथि गालीगलौज गर्नुका साथै सार्वजनिक स्थानमा अशान्ति सिर्जना गरेको र अभद्र व्यवहार गरेको आरोपमा उनलाई नियन्त्रणमा लिइएको हो।
मल्लविरुद्ध अभद्र व्यवहार गर्न नहुने कसुरमा जिल्ला प्रशासन कार्यालय काठमाडौंमा उपस्थित गराइएको थियो। प्रशासनले उनलाई दुई दिनको म्याद थप गरी अनुसन्धान अघि बढाउन अनुमति दिएको प्रहरीले जनाएको छ।
पक्राउसँगै पुरानो प्रहरी रेकर्ड पनि बाहिरियो
मल्ल पक्राउ परेपछि प्रहरीले उनको विगतको प्रहरी रेकर्डसमेत हेरेको थियो। त्यसक्रममा बाँकेमा उनीविरुद्ध यसअघि नै विभिन्न प्रकृतिका ६ वटा मुद्दा दर्ता भएको खुलेको प्रहरीको भनाइ छ।
प्रहरी अभिलेखअनुसार उनीविरुद्ध दर्ता भएका मुद्दा यस्ता छन्–
२०८३ साउन २६ गते – दूरसञ्चार ऐनसम्बन्धी कसुर
२०८१ चैत ६ गते – अभद्र व्यवहार
२०७९ जेठ १३ गते – बैंकिङ कसुर
२०७८ माघ ५ गते – अभद्र व्यवहार
२०७८ साउन ५ गते – अभद्र व्यवहार
२०७७ फागुन २६ गते – ठगीसम्बन्धी कसुर
प्रहरीका अनुसार पछिल्लो दूरसञ्चार ऐनसम्बन्धी मुद्दामा मल्ल फरार रहेको अभिलेखमा देखिन्छ।
मल्ल पक्राउ परेपछि अहिलेको घटनामा एउटा कुरा भने प्रस्ट छ– उनलाई सार्वजनिक अडियोमा गरिएका आर्थिक लेनदेन वा सरकारी नियुक्ति–सरुवासम्बन्धी आरोप प्रमाणित भएको आधारमा पक्राउ गरिएको भनेर प्रहरीले भनेको छैन।
काठमाडौं प्रहरीले तत्काल उनलाई अभद्र व्यवहारसम्बन्धी कसुरमा नियन्त्रणमा लिएको हो। पक्राउपछि उनको पुरानो प्रहरी रेकर्डमा रहेका ६ वटा मुद्दा पनि बाहिर आएका छन्।
तर सार्वजनिक भएको अडियोले भने छुट्टै प्रश्न उठाएको छ। त्यसमा सरकारी नियुक्ति, कर्मचारी सरुवा र आर्थिक लेनदेनबारे गरिएका दाबी वास्तविक हुन् कि प्रभाव जमाउन गरिएका कुरामात्र हुन् भन्ने यकिन हुन बाँकी छ। अडियोमा नाम जोडिएका व्यक्तिहरूले ती दाबी स्वीकार गरेका छैनन्।
अब प्रहरीले मल्लमाथि थालेको अनुसन्धान अभद्र व्यवहारको घटनामै सीमित हुन्छ वा अडियोमा उठेका सरकारी नियुक्ति, सरुवा र आर्थिक लेनदेनका विषयसम्म पुग्छ भन्ने चासोको विषय बनेको छ। त्यसको टुंगो अनुसन्धानपछि मात्रै लाग्नेछ। अहिले हेमन्त चौधरीको पनि खोजी भइरहेको प्रहरीले जनाएको छ । उनी फरार रहेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
