देउवा प्रतिनिधि सभा पुनर्स्थापनाका पक्षमा देखिएका हुन्?

राजनीति

लिलु डुम्रे बुधबार, माघ १४, २०७७ १९:४५

काठमाडौं- नेपाली कांग्रेसका सभापति शेरबहादुर देउवा पक्षका नेताहरुले उनी प्रतिनिधि सभा पुनःस्थापनाको मागलाई आन्दोलनको एजेण्डा बनाउन सहमत नभएको प्रष्ट्याएका छन्। ३५ दिनमा ६ दिन बसेर मंगलबार सकिएको बैठकमा सभापति देउवा प्रतिनिधि सभा पुनःस्थापनाको पक्षमा देखिएको भनी चर्चा भएको थियो।

देउवा पक्षीय नेता एनपी साउदले प्रतिनिधि सभा पुनःस्थापना कांग्रेस आन्दोलनको एजेण्डा नबन्ने बताए। ‘अर्को चरणको आन्दोलनका लागि सभापति तयार हुनुभएको हो। तर प्रतिनिधि सभा पुनःस्थापना कांग्रेसको एजेण्डा नै होइन’, उनले नेपाल लाइभसँग भने, ‘संगठनलाई पुनर्ताजगी गर्ने गरी आन्दोलनका कार्यक्रम ल्याइएको हो। संस्थागत रुपमा पुनःस्थापनाको माग लिएर आन्दोलनमा जाने कुनै निर्णय छैन।’

पहिलो चरणमा चार तहको विरोध प्रदर्शनपछि मंगलबार केन्द्रीय समितिको बैठक बसेको थियो। सभापति देउवा अर्को चरणको आन्दोलनको पक्षमा देखिएका थिएनन्। तर संस्थापनइतरका नेताहरु आन्दोलनलाई निरन्तरता दिने पक्षमा उभिएका थिए। प्रतिनिधि सभा विघटनलाई असंवैधानिक ठहर गरे पनि कांग्रेसले आफ्नो मागलाई स्पष्ट नगराएको भन्दै वरिष्ठ नेता रामचन्द्र पौडेलले असन्तुष्टि जनाएका थिए। प्रतिनिधि सभा पुनःस्थापनाको मागमा कांग्रेस स्पष्ट हुनुपर्ने उनको जोड थियो।

शीर्ष तहका नेताहरुबीच भएको करिब दुई घण्टाको बैठकपछि देउवा जिल्ला तहमा आन्दोलन गर्न सहमत भएका थिए। परिणामतः कांग्रेसले जिल्ला कार्यसमिति, भ्रातृ संस्था र शुभेच्छुक संस्थाले ७७ जिल्लामा विरोध गर्ने गरी आन्दोलन घोषणा गरेको हो।

पुनःस्थापनाको पक्षमा सडक आन्दोलन गर्न नहुने जोड देउवाको यथावत रहेको नेता साउदले बताए। ‘अदालतको फैसला कांग्रेसले स्विकार्ने भनिसकेपछि पुनःस्थापनाको माग हुनै सक्दैन’, साउदले भने, ‘विचाराधीन मुद्दामा हस्तक्षेप गर्ने र दबाब दिने कार्य सर्वोच्चको मर्यादामाथि हस्तक्षेप हुन्छ।’

मंगलबारको बैठकमा पौडेलले कांग्रेसको लक्ष्यहीन आन्दोलन भएको भन्दै आपत्ति जनाएका थिए। सडकमा गइसकेपछि मुद्दा एकीन हुनेपर्ने पौडेलको तर्क थियो। ‘आन्दोलन त गरियो। तर, आन्दोलनको लक्ष्यमा कांग्रेस प्रष्ट भएन। उद्देश्यहीन आन्दोलन भयो’, पौडेलले बैठकमा भने।

पौडेलको बोलीलाई खण्डन गर्दै साउदले कांग्रेस सडकका मुद्दामा ‘क्लियर’ रहेको दाबी गरे। सडक आन्दोलन उद्देश्यहीन नभएको उनको तर्क छ। उनले भने, ‘प्रतिनिधि सभा विघटन असंवैधानिक र अप्रजातान्त्रिक भनी पार्टीले भनिसकेको छ। अदालतको जुनसुकै फैसलालाई पनि हामी स्विकार गर्छौं। यसमा पार्टी स्पष्ट छ।’

मुद्दामा ढुलमुल भएकै कारण आन्दोलन प्रभावकारी नभएको वरिष्ठ नेता पौडेलको बुझाइ छ। नेता पौडेलले नेपाल लाइभसँग भने, ‘नेतृत्वमा भएका कतिपय साथीहरुले ‘अदालत–अदालत’ भनिरहँदा अलमल भएको पनि छ।’

प्रतिनिधि सभा पुनःस्थापनाको माग सहित ‘राजा फर्काऊ’ भन्दै ‘प्रतिगामी'हरुको खेल विरुद्ध सशक्त रुपमा कांग्रेस सडकमा जानुपर्ने पौडलको भनाइ छ। उनले भने, ‘संविधानमाथि भएको हमलाका विषयमा त झन् कुनै सम्झौता नगरी कांग्रेस स्पष्ट भएर सडकमा जानुपर्छ।’

पौडेल र अर्का नेता कृष्णप्रसाद सिटौला पक्षले ३० गतेसम्मको जिल्ला तहको विरोध सकिएपछि केन्द्रीय रुपमा विरोध प्रदर्शन गर्नुपर्नेमा जोड दिएका छन्। माघ महिनाभित्र क्रियाशील सदस्यता नवीकरण र वितरणको कार्य सक्नुपर्ने पार्टीले निर्णय गरेको छ।

क्रियाशील सदस्यता नवीकरण र वितरणमा जिल्ला तहका नेता खटिनुपरेकाले केन्द्रीय रुपमा विरोध प्रदर्शन गर्न असम्भव भएको केन्द्रीय सदस्य गुरुराज घिमिरेले बताए। ‘माघ ३० सम्म क्रियाशील सदस्यता टुंगाउने समयावधि छ। आन्दोलनमा लगाएर काम गर्न पाइन्न भन्ने हुन्छ भनेर नै केन्द्रीय रुपमा विरोध प्रदर्शन घोषणा नगरिएको हो’, घिमिरेले भने।

देउवा पक्षीय नेता साउदको अभिव्यक्तिको खण्डन गर्दै घिमिरेले प्रतिनिधि सभा पुनःस्थापनाको पक्षमा कांग्रेस एक ढिक्का रहेको तर्क गरे। द्विविधाग्रस्त भएर आन्दोलन नहुने बताउँदै घिमिरेले भने, ‘माघ ३० पछि केन्द्रीय रुपमा सशक्त आन्दोलन हुन्छ। असंवैधानिक कदम भनिसकेपछि प्रतिनिधि सभा पुनःस्थपना हुनुपर्नेमा हामी स्पष्ट छौं। विरोध प्रर्दशनमा त्यही नै माग उठाउँछौं।’