काठमाडौं– प्रधानमन्त्रीका रुपमा तेस्रो पटक नेपाल भ्रमणमा आएका भारतीय प्रधानमन्त्री नरेन्द्र मोदी स्वदेश फर्किएका छन्। विगतमा भन्दा यसपटकको उनको भ्रमण फरक रह्यो।
जनकपुर हुँदै नेपाल आएका मोदीले नै यो भ्रमणलाई धार्मिक भ्रमण भनेका छन्। जनकपुरमा आयोजित कार्यक्रममा बोल्दै प्रधानमन्त्री नभई प्रधान तीर्थयात्रीका रुपमा आफू नेपाल आएको बताए। मोदीले जनकपुर मन्दिर, मुक्तिनाथ र पशुपतीमन्दिरको दर्शन र पूजा गरे।
दुई वर्षअघिको नाकाबन्दीका कारण यसपटक नेपाल आउँदा जनताको नजरमा अलोकप्रिय बने। यद्यपि सरकारले उनलाई दुई ठाउँमा नागरिक अभिनन्दन गर्यो।
नेपालमा करिब ३० घन्टा बिताएका उनले विभिन्न दलका नेतादेखि राष्ट्रपतिसम्मलाई भेट्न भ्याए।
मोदीको ३० घन्टा
निर्धारित समयभन्दा आधा घन्टा ढिलो अर्थात् शुक्रबार बिहान करिब १०:४५ मा मोदी जनकपुरमा अवतरण भएका थिए। विमानस्थलमा उनलाई रक्षामन्त्री ईश्वर पोखरेल तथा प्रदेश नम्बर २ का मुख्यमन्त्री लालबाबु राउतले स्वागत गरे।
विमानस्थलबाट जानकीमन्दिर गएका उनलाई मन्दिर परिसरमा प्रधानमन्त्री केपी शर्मा ओलीले स्वागत गरे। मन्दिरमा पूजापछि मोदी र ओलीले संयुक्त रुपमा जनकपुर–अयोध्या बस सेवा तथा रामायण सर्किटको उद्घाटन गरेका थिए। कार्यक्रममा छोटो सम्बोधनपछि उनी त्यहाँबाट ३ सय मिटर पर रहेको बाह्रबिघामा पुगे। जहाँ उनलाई जनकपुर उपमहानगरपालिकाले नागरिक अभिनन्दन कार्यक्रमको आयोजना गरेको थियो। अभिनन्दनपछि घन्टाभन्दा लामो भाषण गरेका थिए।
पौने ३ बजे काठमाडौं आएका उनलाई परराष्ट्रमन्त्री प्रदीप ज्ञवालीले स्वागत गरे। हायात होटलमा सवा ३ बजे पराराष्ट्रमन्त्री ज्ञवालीसँग उनले पहिलो औपचारिक भेटवार्ता गरे।
केही समय आराम गरेपछि उनी टुँखिडेल पुगे। साढे ५ बजेको समयमा उनलाई सरकारले ‘गार्ड अफ अनर’ दियो। टुँडिखेलबाट सिधै उपराष्ट्रपति नन्दबहादुर पुन र राष्ट्रपति विद्यादेवी भण्डारीसँग निवासमा पुगेर शिष्टाचार भेट गरे।
भेटपछि उनी होटल द्वारिकाजमा पुगे। प्रधानमन्त्री केपी शर्मा ओलीसँग एक्लै भेटवार्ता गरेपछि नेपालका पूर्वप्रधानमन्त्रीहरुसँग सामूहिक रुपमा भेटवार्ता गरे।
त्यसपछि दुईपक्षीय वार्ता भएको थियो। वार्तापछि मोदी र ओलीले अरुण तेस्रोको संयुक्त रुपमा होटलबाटै स्वीच थिचेर शिलान्यास गरे। शिलान्यासपछि ओली र मोदीले संयुक्त पत्रकार सम्मेलनलाई सम्बोधन गरेका थिए।
उनको सम्मानमा सोही होटलमा नेपाल सरकारले रात्रिभोज आयोजना गरेका थिए। रात्रीभोजपछि मोदी बेलुका करिब साढे १० बजे हायात फर्किएका थिए।
शनिबार बिहानै उनी मुक्तिनाथ गएका थिए। भारतीय सेनाको हेलिकोप्टरमार्फत करिब ८ बजे मुक्तिनाथ पुगेका उनले त्यहाँ उनले करिब आधा घन्टा पूजा गरे। त्यहाँबाट साढे १० बजे काठमाडौं फर्किएपछि विमानस्थलबाट सिधैं उनी पशुपतीनाथ मन्दिरको दर्शनमा गए।
पशुपति मन्दिरमा करिब आधा घन्टा पूजा गरेपछि उनी दिउँसो करिब १२ बने हायात होटलमा फर्किएका थिए। होटलमा केही समय आराम गरेपछि नेपालका नेताहरुसँग भेटघाट सुरु भयो।
सुरुमा कांग्रेस सभापति शेरबहादुर देउवा नेतृत्वको नेपाली कांग्रेसको टोलीसँग उनले भेटेका थिए। त्यसपछि माओवादी केन्द्रका अध्यक्ष प्रचण्डसँग भेटवार्ता गरे। त्यस्तै राजपा र मधेसी जनअधिकार आयोगका अध्यक्ष उपेन्द्र यादबसँग भेटवार्ता गरे।
भेटवार्तापछि हायात होटलमै काठमाडौंस्थित भारतीय दूतावासले दिवाभोजको आयोजना गरेको थियो।
दिवाभोजपछि उनी काठमाडौं महानगरपालिकाले आयोजना गरेको नागरिक अभिनन्दन कार्यक्रममा सहभागी हुन राष्ट्रिय सभागृह पुगे। नागरिक अभिनन्दन कार्यक्रमलाई सम्बोधन गरेपछि उनी सवा ४ बजे सभागृहबाट विमानस्थल प्रस्थान गरेका हुन्। उनी अपराह्न ५ बजे एयर इन्डियाको विमानबाट स्वदेश फर्किएका हुन्।
३० घन्टाको अवधिमा निरन्तर सामाजिक सञ्जालमा मोदीको आलोचना भइरहेको थियो। संविधान संशोधनको विषयलाई लिएर भारतले दुई वर्षअघि नाकाबन्दी लगाएको थियो। तर, मोदीले कुनै पनि प्रसंगमा नाकाबन्दी र संविधान संशोधनको कुरा उठाएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786783778.jpg)
-1789386153.jpg)
-1786602170.png)
