गायक प्रमोद खरेल र बिन्दबासिनी म्युजिक कम्पनीबीचको विवाद यतिबेला पूरै संगीत क्षेत्रमा फैलिएको छ। सिर्जनाको स्वामित्वका विषयमा रहेको अन्योलले गायक खरेल र उक्त म्युजिक कम्पनीका सञ्चाल सुवास रेग्मीबीच मनमुटाव सिर्जना गर्यो। त्यसको विवाद आपसी सहमतिमा सल्टिन सकेन। त्यसैमा अरुलाई (विशेष गरी संगीत क्षेत्रसँग सम्बन्धितलाई) घोचेर सामाजिक सञ्जालमा लेख्ने रेग्मीको स्वभावले तनाव बढायो।
आफ्नो गीतको स्वामित्व खोज्दा रेग्मीले आफ्नो मानमर्दन गरेको भन्दै प्रमोदले कलाकारहरुको साथ खोजे। एक कलाकारले खोजेको उक्त साथमा हात मिलाउन संगीतकर्मी तयार भए।
त्यसलाई लिएर खरेल प्रहरीकहाँ पुगे। प्रहरीले बिन्दबासिनी म्युजिकको कानुनी सञ्चालक खोज्यो। कानुनी रुपमा सञ्चालकमा सुवास रेग्मी नभइ उनकी श्रीमती लिना रेग्मी थिइन्। उनलाई नै पक्राउ गर्यो।
देखिएका सञ्चालक सुवासको गल्तीको भागिदार लिना भएपछि हस्ताक्षरकर्ता संगीतकर्मी झस्किएका छन्। उनीहरु भन्न थालेका छन्, 'कसैलाई पक्राउ गर्न हामीले हस्ताक्षर गर्न खोजेका थिएनौं।
यही सन्दर्भमा राजेश पायल राईले सामाजिक सञ्जाल फेसबुकमा लामो स्टाटस लेखे। उनले लेखेका छन्, ‘मेरो हस्ताक्षर बिन्दबासिनी म्युजिक प्रालि र लिना रेग्मीविरुद्ध थिएन।'
गायकलाई गालीगलौज र मानहानीको विरुद्धमा हस्ताक्षर गरेको भन्दै राईले प्रमोद खरेलले आफूकहाँ आएर हिसाब नदेखाएको उल्टै अन्टसन्ट लेखेको भनेकाले आफूले खाली कागजमा हस्ताक्षर गरेको लेखेका छन्।
उनले लिना रेग्मी र कम्पनीसँग कुनै लेनदेन नभएकाले कुरा स्पष्ट हुनुपर्यो भन्दै स्ट्याटस लेखेका हुन्।
राइको स्ट्याटसको माहोल नसेलाउँदै अर्का गायक राज सिग्देलले पनि यस्तै आशयको स्ट्याटस लेखे।
उनले लेखेका छन्, ‘लिना भाउजु पुलिसको हिरासतमा भएको खबरले दुःखी छु।’ स्रष्टाको अधिकार सुनिश्चित गर्नका लागि नियम कानुनबमोजिम जाउँ भन्ने कुरामा समर्थन भएपनि कम्पनीसँग कुनै दुस्मनी नभएको उनले प्रस्ट पारेका छन्।
अन्यायमा परेको कुरा गायक खरेलले गरेकाले पढ्दै नपढी सेतो कागजमा विश्वासको आधारमा हस्ताक्षर गरेको सिग्देलले उल्लेख गरेका छन्।
यता विवादित गीतका गीतकारसमेत रहेका राजेन्द्र थापाले पनि यो विषयमा लामो प्रतिक्रिया दिएका छन्।
उनले दुईलाई मिलाउने सक्दो कोशिस गरेपनि नसकेको र यो नितान्त व्यक्तिगत विषय भएको बताएका छन्। उनका अनुसार बाहिर देखिएजस्तो प्रतिलिपी अधिकार, रोल्यल्टी र आर्थिक अधिकारको विवाद पटक्कै होइन।
रोयल्टी, प्रतिलिपी अधिकार र आर्थिक लाभका विवाद सबै कलाकरको सबै कम्पनीसँग रहेको पनि उनले बताए।
उनले भनेका छन्, ‘सुवास र प्रमोदलाई भेटाएर सहमतिमा ल्याउने कोशिस गर्दापनि सुवासको गाली तोप बन्यो।’ यदि सुवासले सामाजिक सञ्जालमा गालीजन्य स्ट्याटस नलेखेको भए मुद्दा तीन हप्ताअघि नै सल्टिने पनि उनले बताए।
खासमा भएको के थियो?
प्रमोद, सुवास र लिनाको फेसबुक नियाल्ने हो भने वादविवाद गीतबाटै सुरु भएको देखिन्छ।
आजभन्दा ७ महिना अघि प्रमोदले प्रणय एल्बममा समेटिएको याद गर्नपनि कोही न कोही त चाहिँदो रहेछ बोलको गीत रिमिक्स गर्ने प्रस्ताव बिन्दाबासिनी म्युजिक प्रालिसँग राखे। यो कुरामा सुवास र प्रमोद दुवैको सहमति भयो।
उनीहरूले 'याद गर्न पनि कोही न कोही त चाहिँदो रहेछ' बोलको गीत पाँच वर्षको एग्रिमेन्टअनुसार चलाएका थिए। तर एग्रिमेन्ट सकिएको ६ वर्ष कटिसकेछ। त्यसैले प्रमोदले केही समयपछि एग्रिमेन्ट सकिएकाले गीत आफैँ मार्केटिङ गर्ने बताए।
सुरुवाती चरणमा यो कुरा लिना, सुवास र प्रमोदबाहेक अन्यलाई थाहा थिएन। न त प्रमोदले ११ वर्षसम्मको हिसाब नै मागेका थिए।
तर, एक्कासी प्रमोदले 'मेरो लगानी भएकाले यसको उत्पादक पनि मै हुँ। यो मेरो सामान हो, आफ्नोमा लान्छु' भनेको उनले बताए। त्यसमा यी दुईको कुरा नमिलेपछि मात्रै कुरा सामाजिक सञ्जालसम्म आइपुग्यो।
सुवासले सामाजिक सञ्जालमा ‘धोद्रो स्वरको गुमनाम मान्छेलाई मैले चर्चित बनाएँ, अहिले घर गाडी सबै त्यसैबाट आएको पैसाले बनायो’जस्ता कुराहरु लेख्न थाले।
जतिखेरै सामाजिक सञ्जालमा यस्ता कुरा लेखेपनि प्रमोदबाट कुनै किसिमको प्रतिकार आएन। सुवासले नै १ करोडको क्षतिपूर्ति माग गर्दै अदालतमा मुद्दा हाले।
मुद्दा हालिसकेपछि भने ५७ जना संगितकर्मीको हस्ताक्षरसहित प्रमोदले महानगरीय प्रहरी कार्यलय टेकुमा बिन्दबासिनी म्युजिक प्रालिको नाममा मुद्दा हाले।
मुद्दा हालेको करिब एक सातापछि प्रहरीले प्रालिकी कार्यकारी अधिकृत लिना रेग्मीलाई पक्राउ गर्यो र उनी अहिले प्रहरीको हिरासतमा छिन्।
झुक्किए हस्ताक्षरकर्ता
गायक प्रमोद खरेललाई एक म्युजिक कम्पनीका सञ्चालकले गालीगलौज र अपमानपूर्ण अभिव्यक्ति दिएको भन्दै संगीतकर्मीहरुले हस्ताक्षर गरेका थिए। दोषीलाई कानुनी प्रक्रियाअनुसार कारबाही गर्न ५७ जना संगीतकर्मीहरुले हस्ताक्षरसहित टेकु प्रहरीलाई कारबाही गर्न आग्रह गरे।
प्रहरीले कम्पनीकी कार्यकारी अधिकृत लिना रेग्मीलाई पक्राउ गरेपछि बल्ल संगितकर्मीले आफू झुक्किएको महशुस गरेका छन्।
सामाजिक सञ्जालमार्फत् लिनालाई पक्राउ गर्न हस्ताक्षर नगरेको र कम्पनीसँग केही लेनदेन नभएको उनीहरुले बताइरहेका छन्।
आफ्ना सिर्जना नियमअनुसार फिर्ता माग्दा आफूलाई अन्यायपूर्ण व्यवहार गरिएको भन्दै खरेलले हस्ताक्षर गर्न लगाएको संगितकर्मीले बताएका छन्।
हस्ताक्षर गर्नेहरुमा संगीतकार लक्ष्मण शेष, गायक राजेशपायल राई, शिव परियार, सत्यराज आचार्य, स्वरुपराज आचार्य, इन्दिरा जोशी, संगीतकार तथा गायक चेतन सापकोटा, कालीप्रसाद बास्कोटा, राज सिग्देललगायत छन्। नयाँ पुस्ताका एलिना चौहानलगायतले पनि हस्ताक्षर गरेका छन्।
प्रमोदले कम्पनीको नाममा मुद्दा हालेका थिए। मानहानीको मुद्दा हाल्न भने उनले बल्ल तयारी थालेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764984546.png)
-1764983809.png)
-1764947583.png)
-1764146706.png)
-1764941657.png)
-1763721444.png)
