धनकुटा– प्रदेशको राजधानीलगायत विभिन्न माग गर्दै नेपाली काग्रेस धनकुटाको पार्टी कार्यालयमा ४ महिनाअघि लगाएइको ताला बिहीबार खोलिएको छ।
पार्टी प्रवक्ता विश्वप्रकाश शर्माले कांग्रेस पार्टी कार्यालयमा ४ महिनाअघि लगाइएको ताला खोलेर नेता तथा कार्यकर्ताले दिएको राजीनामा फिर्ता गर्न आग्रह गरेका थिए।
पार्टी सरकारमा हुँदा प्रदेश १ को अस्थायी राजधानी धनकुटा नबनाइएको, पार्टी केन्द्रीय समिति तथा भ्रातृ संगठनमा धनकुटाबाट प्रतिनिधित्व नभएको, स्थानीय एवं संसद्को चुनावमा जिल्लाबाट गरिएको सिफारिसलाई प्रवाह नगरी केन्द्रीय समितिले छुट्टै निर्णय गरी जिल्लाका नेतृत्वको अपहेलना गरेको जनाउँदै ४ महिनाअघि जिल्ला समितिका पदाधिकारी तथा भ्रातृ एवं शुभेच्छुक संस्थाका पदाधिकारीले साधारण सदस्य नरहने गरी राजीनामा गर्दै पार्टी कार्यालयमा कांग्रेसको झण्डा हटाएर कालो झण्डा राखेका थिए।
प्रवक्ता शर्माले पार्टी कार्यालयमा ताला खोलेर जिल्ला समितिका पदाधिकारीलाई जनताको काम गर्न आग्रह गर्दै केन्द्रीय समितिले उचित मूल्यांकन गर्ने आश्वासन दिएका थिए।
कार्यक्रममा प्रवक्ता शर्माले वर्तमान सरकारले राष्ट्रियताको खोक्रो नारा लगाएर मुलुक सञ्चालन गर्न कठिनाइ भएको नाटक गर्दै गरेको तथा अघिल्लो सरकारले गरेको भूकम्पपीडित सहयोग रकम नदिने एवं सर्वसाधारणको स्वास्थ्य सुविधाको रकमजस्ता निर्णय कार्यान्वयनमा बेवास्ता गरेको आरोप लगाएका थिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786783778.jpg)
-1786602170.png)
