काठमाडौँ- सत्तारुढ नेकपा एकतादेखि विवादसम्म सक्रियता देखाएको चीनले विभाजनको स्थितिमा समेत जोड्नसमेत प्रयास गरेको छ। पार्टी विभाजनअघि चिनियाँ राजदूत होउ यान्छीले नेकपा शीर्ष नेतालाई भेटेर एकतामा जोड दिँदै दौडधुपमा लागेकी थिइन्।
राजदूतको सक्रियताले नपुगेपछि नेकपा एकतामा थप जोड दिन आइतबार नेपाल आएको चिनियाँ कम्युनिस्ट पार्टी (सिपिसी)का अन्तराष्ट्रिय विभागका उपमन्त्री गुओ येझोउको टोलीले भेटघाटलाई तीव्रता दिएको छ।
तत्कालीन एमाले र माओवादी केन्द्र एकता हुनुभन्दा केही समयअघि मात्र गुओ आएर नेकपा शीर्ष नेताहरूलाई भेटेर जोड्न प्रयास गरेका थिए। गुओसहित राजदूतले पार्टी एकता गर्न जोड दिएको नेकपाकै नेताहरू बताउँछन्।
नेकपा एकतापछि पनि विवाद बढ्दा राजदूत यान्छीले आफ्नोतर्फबाट भूमिका खेलिरहेकी थिइन्। प्रधानमन्त्री केपी ओलीले मन्त्रिपरिषद् बैठकको सिफारिसमा राष्ट्रपतिले संसद् विघटनको अनुमोदन गरेपछि पार्टीमा तेस्रो पटक विभाजनको स्थितिमा पुगेको हो। यसअघि नेपालको राजनीतिमा भारतको प्रत्यक्षपरोक्ष रुपमा आफ्नो उपस्थिति जनाउने गरेपनि पछिल्लो समय चीनले आफ्नो उपस्थित देखाउन थालेको छ।
नेकपा विवाद मिल्न सक्ने परिस्थितिभन्दा पर गइसके पनि चीनले आफ्नो उपस्थिति छ है भन्ने स्पष्ट संकेत छोड्न खोजेको छ। अब चीनले नेपालमा हुने राजनीतिक उतारचढावमा सरोकार राख्न थालेको छ। भारत र चीन दुवै देश नेपालको राजनीतिक मामिलामा उपस्थिति जनाउन थालेपछि जटिलता थप्न सक्ने विश्लेषण गर्न थालिएको छ।
चिनियाँ विशेष टोलीले आइतबार नेपाल उत्रिएकै दिन प्रधानमन्त्री केपी ओली र राष्ट्रपति विद्या भण्डारीलाई भेटेका थिए।
सोमबार अध्यक्ष प्रचण्डसहित अर्का अध्यक्ष माधवकुमार नेपाल झलनाथ खनाललाई भेटेर छलफल गरेका छन्। नेपालको पछिल्लो राजनीतिक घटनाक्रमका विषयमा चिनियाँ प्रतिनिधिसँग छलफल भएको नेकपा वरिष्ठ नेता झलनाथ खनालले बताए। चिनियाँ टोलीसँग भेट वार्ता भएपछि खनालले विज्ञप्ति जारी गर्दै नेपाल चीन सम्बन्धका विषयमा छलफल भएको बताएका छन्।
यस्तै पूर्वप्रधानमन्त्री डा बाबुराम भट्टराईसँग पनि भेट गरेको छ। चिनियाँ प्रतिनिधिले प्रमुख प्रतिपक्ष दल नेपाली कांग्रेसका सभापति शेरबहादुर देउवासँग पनि भेट गर्ने कार्यतालिका रहेको बताएको छ।
यसअघि गत वैशाख ८ मा प्रधानमन्त्रीले दल विभाजन सम्बन्धी अध्यादेश ल्याएका बेला पनि पार्टी विभाजनककै अवस्थामा पुगेको थियो। त्यति बेला पनि राजदूत यान्छीले प्रधानमन्त्रीसहित अध्यक्ष प्रचण्डलाई भेटेर छलफल गरेकी थिइन्। पार्टीकै नेताको समन्वयकारी भूमिका र चिनियाँ राजदूतको सक्रियताले तत्कालको विवाद टेरेको हो। पछि ओलीले उक्त अध्यादेश फिर्ता लिएका थिए।
फेरि असार १० गतेदेखि स्थायी कमिटी बैठक हुँदा पार्टीमा ओलीको पार्टी अध्यक्ष र प्रधानमन्त्री दुवै पदबाट राजीनामा मागेपछि विभाजनकै स्थितिमा पुगेको थियो। त्यतिबेला शीर्ष नेताकै सक्रियतामा गत साउन ३० गते महासचिव विष्णु पौडेलको संयोजकत्वमा ६ सदस्यीय कार्यदल गठन गरी विवाद समाधानको उपाय खोजिएको थियो। त्यो विवाद निरुपण हुन नपाउँदै पार्टीमा मन्त्रिपरिषद पुर्नगठन, राजदूत नियुक्ति, कर्णाली विद्रोहलगायत विषयले उग्र रूप लिएपछि पार्टी विभाजनको स्थितिमा पुगेको हो।
प्रतिनिधिसभा विघटन भएपछि स्पष्ट रुपमा विभाजनको बाटो खुलेको हो। संसद् विघटनलगत्तै दुवै पक्षको केन्द्रीय कमिटी बैठकै दिन गत पुस ७ गते राजदूत यान्छिले राष्ट्रपति विद्यादेवी भण्डारीलाई भेटकी थिइन्। यस्तै पार्टी विभाजन नगरी एकता गर्न भन्दै अध्यक्ष प्रचण्ड र नेपाललाई गत पुस ९ गते महरालाई पुस १० मा भेटेकी थिइन्।
अध्यक्ष प्रचण्डसँगको भेटमा यान्छीले मिल्न सक्ने स्थिति भए मिल्न आग्रह गरेको प्रचण्डको सचिवालयले स्पष्ट पारेको थियो। चिनियाँ कम्युनिस्ट पार्टी नेपालको कम्युनिस्ट पार्टीको एकतामा जोड दिएको राजदूतले स्पष्ट पारेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789375192.jpeg)
-1786602170.png)
