काठमाडौं– नेपाली कांग्रेसले पूर्वसभापति शेरबहादुर देउवा नेतृत्वको अघिल्लो केन्द्रीय समितिमा रहेका नेताहरूलाई पुनः केन्द्रीय समितिमा समेट्ने निर्णय गरेको छ।
आइतबार बसेको कांग्रेस कार्यसम्पादन समितिको बैठकले विशेष महाधिवेशनपछि बनेको नयाँ संरचनामा समेटिन नसकेका अघिल्लो समितिका सदस्यहरूलाई केन्द्रीय समितिमा आउन आह्वान गर्ने निर्णय गरेको हो।
निर्णयसँगै देउवा नेतृत्वको अघिल्लो समितिमा रहेका नेताहरूका लागि कांग्रेसको वर्तमान संरचनामा फर्किने बाटो खुलेको छ। पार्टीले उनीहरूलाई आगामी महाधिवेशनको आयोजक समितिकै भूमिकामा सहभागी हुन आग्रह गर्ने भएको छ।
बैठकपछि एक पदाधिकारीका अनुसार केन्द्रीय समितिमा सहभागी हुन इच्छुक सबैलाई आह्वान गरिनेछ। इच्छुक नेताहरू केन्द्रीय समितिमा आएर महाधिवेशन सम्पन्न गर्ने प्रक्रियामा सहभागी हुन सक्नेछन् भने इच्छुक नभएका नेताहरू सहभागी नहुन पनि सक्नेछन्।
कांग्रेसले आगामी असोज १६ देखि १९ गतेसम्म १५औँ महाधिवेशन गर्ने कार्यतालिका तय गरिसकेको छ। त्यसअघि असोज ३ र ४ गते वडा तहको अधिवेशन गर्ने निर्णय भएको छ।
पुससम्म नवीकरण भएका क्रियाशील सदस्यलाई मान्यता
बैठकले पार्टीको क्रियाशील सदस्यताका विषयमा पनि महत्वपूर्ण निर्णय गरेको छ। कांग्रेस संस्थापनले गत पुससम्म नवीकरण गरेका सबै क्रियाशील सदस्यलाई मान्यता दिने निर्णय गरेको हो।
यस निर्णयसँगै आगामी महाधिवेशनमा सहभागी हुने प्रतिनिधि छनोटको आधारसमेत थप स्पष्ट भएको छ। पार्टीले महाधिवेशनको तयारी अघि बढाउँदै पुरानो र नयाँ संरचनाबीच देखिएको विवाद व्यवस्थापन गर्ने प्रयासस्वरूप पछिल्लो निर्णय गरेको हो।
अब देउवा नेतृत्वको अघिल्लो समितिमा रहेका नेताहरूलाई समेत समेटेर महाधिवेशन आयोजकको भूमिकामा पार्टीलाई अघि बढाउने कांग्रेसको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
