काठमाडौँ– केपी शर्मा ओलीलाई अध्यक्षबाट हटाउने र नहटाउने कित्तामा उभिएका कारण समाधानका लागि बसिरहेको नेकपा एमालेको निर्वाचन समीक्षा तथा पार्टी पुनर्गठन कार्यदलको आवासीय बैठक झनै पेचिलो बनेको छ।
शनिबारदेखि काभ्रेको एक रिसोर्टमा बसिरहेको बैठकमा कार्यदलका संयोजक रामबहादुर थापा ‘बादल’को राजीनामा समेत माग भएपछि विषय झनै पेचिलो बनेको छ। कार्यदलको औचित्य नरहेको थापाको तर्कपछि असन्तुष्ट सदस्यहरूले उनलाई ‘अयोग्य’ भन्दै राजीनामा गर्न दबाब दिए।
बैठकमा कार्यदल संयोजक रहेका उपाध्यक्ष बादल र सदस्य सचिव शंकर पोखरेललाई सदस्यहरूले उठाएका प्रश्नहरूको सवालजवाफ तथा सदस्यहरूको धारणा राख्ने विषय सकिएको छ। सदस्यहरूले आफूहरूले थाहै नपाई प्रतिवेदन सार्वजनिक भएकोमा आक्रोश पोखेको एक सदस्यले जनाएका छन्। बैठकमा कार्यदल संयोजक बादलले आफूले पेस गरेको प्रतिवेदन अध्यक्ष ओलीको हो भनेपछि समस्या झनै पेचिलो बनेको छ।ओलीले बादललाई फोन नै गरेर पार्टीको विशेष महाधिवेशन स्वीकार नगर्न दबाब दिएको बताइएको छ।
उता, शंकर पोखरेलले प्रस्तुत गरेको प्रतिवेदनमा अध्यक्ष ओलीको विस्थापन गरी पार्टी पुनर्गठनलाई जोड दिइएको छ। पोखरेलसहितका अन्य सदस्यहरूले कार्यदलको औचित्य छैन भन्ने बादलको भनाइको कडा प्रतिवाद गर्दै, ‘औचित्य नभएको ठाउँमा किन संयोजक बनेको? नसके राजीनामा दिनुस्’ भनेको कार्यदलका एक सदस्यले नेपाललाइभलाई जानकारी दिए।
उपाध्यक्ष विष्णु पौडेल र पृथ्वी सुब्बा गुरुङलाई बादल पक्षका नेताहरूले यसअघि कांग्रेससँगको गठबन्धनको समन्वय गरेर सरकारमा बसेकाले जवाफ दिनुपर्ने र त्यसको दायित्व लिनुपर्नेमा अध्यक्षलाई दोष लगाएर उम्कन खोजेको आरोप लगाए। पार्टी पुनर्गठनको पक्षमा रहेका सदस्यहरू निकै आक्रामक रूपमा प्रस्तुत भएको बताइएको छ।
२०८२ फागुन २१ गते सम्पन्न प्रतिनिधिसभा सदस्य निर्वाचनमा नराम्ररी पराजित भएपछि पार्टी नेतृत्व र कार्यशैलीबारे पुनर्विचार गर्नुपर्ने अठोटसाथ एमालेले गत वैशाखमा उपाध्यक्ष बादलको संयोजकत्वमा निर्वाचन समीक्षा तथा पार्टी पुनर्गठन कार्यदल गठन गरेको थियो। कार्यदलको असार २५ मा सम्पन्न बैठकले उपाध्यक्ष बादल र महासचिव पोखरेललाई प्रतिवेदन लेखनको जिम्मा दिएको थियो।
तर, प्रतिवेदनमा अध्यक्ष केपी शर्मा ओलीकै बहिर्गमनको विषय उल्लेख भएपछि ओलीले आफू पक्षका नेतालाई उक्त प्रतिवेदन पुनर्लेखनको जिम्मेवारी दिए। शुक्रबार प्रतिवेदनबारे छलफल गरी पारित गर्न पार्टी केन्द्रीय कार्यालय च्यासलमा बसेको बैठकमा महासचिव पोखरेलले तयार पारेको प्रतिवेदनसँगै त्यसको काउन्टरमा संयोजक बादलले तयार पारेको अर्को प्रतिवेदन पेस भएपछि समस्या झनै जटिल बनेको छ।
समाधान खोज्न बसेको बैठकमा बादल, पोखरेल, उपाध्यक्षहरू पौडेल र पृथ्वी सुब्बा गुरुङ, उपमहासचिव लेखराज भट्ट, सचिवहरू छविलाल विश्वकर्मा, पद्मा अर्याल, भानुभक्त ढकालसहित ९ वटै प्रदेशका इन्चार्ज सहभागी छन्। गएको जेठ ३० गते सुरु भएको सुझाव संकलन सकिएपछि महासचिव पोखरेलले प्रतिवेदन तयार पारेका हुन्। प्रतिवेदन पारित गर्नुपर्ने बैठकमा अध्यक्ष ओलीका तर्फबाट काउन्टर प्रतिवेदन आएको थियो। नेताहरूको पाखुरा सुर्कासुर्कीबीच एमाले पुनर्गठनको जटिलता कसरी सुल्झिएला भन्ने चाहिँ चासोको विषय छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_ZtgGYzEpDO-1789120936.webp)
-1786602170.png)
