काठमाडौं– प्रधानमन्त्री बालेन्द्र शाहले रसुवाको भोटेकोशी नदीमा आएको बाढीबाट प्रभावितको पुनःस्थापना र पुनर्निर्माणका लागि स्रोतको कमी हुन नदिने प्रतिबद्धता जनाएका छन्।
सोमबार प्रधानमन्त्री तथा मन्त्रिपरिषद्को कार्यालय सिंहदरबारमा बाढी प्रभावित क्षेत्रका जनप्रतिनिधिसँग छलफल गर्दै प्रधानमन्त्री शाहले पुनःस्थापनाका लागि सरकारसँग उपलब्ध स्रोतसाधनसँगै दातृ निकायबाट प्राप्त सहयोगसमेत परिचालन गर्ने बताए।
बाढीपछि प्रभावित क्षेत्रको वास्तविक अवस्था बुझ्न तथा आगामी पुनःस्थापनाको योजना बनाउन गरिएको छलफलले जनप्रतिनिधिको मनोबल उच्च राख्नसमेत सहयोग पुग्ने प्रधानमन्त्री शाहको भनाइ थियो।
उनले विपद्का बेला संघ, प्रदेश र स्थानीय तहबीच तत्कालै समन्वय भएर काम भएकोमा खुसी व्यक्त गरे। यसअघि तीन तहका सरकारबीच समन्वय नहुने गुनासो सुनिए पनि पछिल्लो विपद्मा भने सबै तह एक ठाउँमा उभिएर काम गरेको उनले बताए।
‘बाढी प्रभावित तटीय क्षेत्रमा अब बस्ती बसाउन सम्भव छैन’
प्रधानमन्त्री शाहले भोटेकोशी बाढीबाट क्षति पुगेका नदी तटीय क्षेत्रमा पुनः बस्ती बसाउन सम्भव नहुने निष्कर्ष सुनाएका छन्।
उनले प्रभावित क्षेत्रबाट धेरै टाढा नहुने तर सुरक्षित स्थान पहिचान गरी नयाँ बस्ती विकास गर्ने तयारी सरकारले थालेको जानकारी दिए।
नयाँ बस्ती बसाउँदा प्रभावित नागरिकको रोजगारी, शिक्षा, स्वास्थ्य, संस्कृति र जीविकोपार्जनलाई समेत ध्यान दिनुपर्ने उनले बताए। खेतीयोग्य जमिन संरक्षण गर्दै वैज्ञानिक ढंगले बस्ती व्यवस्थापन गर्नुपर्नेमा प्रधानमन्त्री शाहले जोड दिए।
यसका लागि उपयुक्त जग्गा स्थानीयस्तरमै पहिचान गरी संघीय सरकारलाई सिफारिस गर्न उनले जनप्रतिनिधिलाई आग्रह गरे।
प्रधानमन्त्री शाहले प्रभावित क्षेत्रमा सडक सञ्जाल जतिसक्दो चाँडो पुनःस्थापना गर्न सरकार निरन्तर काम गरिरहेको बताए। सडक सञ्चालनमा आएपछि प्रभावित नागरिकलाई आफ्नो दैनिक जीवनमा फर्किन र पूर्ववत् अवस्थामा आउन सहज हुने उनको विश्वास छ।
बाढी प्रभावित क्षेत्रका जनप्रतिनिधिसँगको प्रत्यक्ष छलफलले स्थानीय तहमा रहेको वास्तविक समस्या र आवश्यकताको थप जानकारी प्राप्त भएको प्रधानमन्त्री शाहले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
