काठमाडौं– नेकपा एमालेको पुनर्गठनसम्बन्धी प्रस्तावलाई अन्तिम रूप दिने जिम्मेवारी तीन शीर्ष नेतालाई दिइएको छ। पुनर्गठन कार्यदलले दुई फरक मस्यौदामा आएका प्रस्ताव र सदस्यहरूले दिएको सुझाव समेटेर साझा दस्तावेज तयार गर्न तीन सदस्यीय सम्पादन टोली गठन गरेको हो।
काभ्रेको बल्थलीस्थित एक होटलमा बसेको कार्यदल बैठकले उपाध्यक्ष रामबहादुर थापाको संयोजकत्वमा सम्पादन टोली बनाएको हो। टोलीमा उपाध्यक्ष विष्णु पौडेल सदस्य तथा महासचिव शंकर पोखरेल सदस्य सचिव रहनेछन्।
कार्यदलका सचिव राजन भट्टराईका अनुसार दुईथरी प्रतिवेदनमा उठेका विषयलाई समेटेर अन्तिम मस्यौदा तयार पार्ने जिम्मेवारी टोलीलाई दिइएको छ।
त्यस्तै, सचिव महेश बस्नेतले कार्यदलमा प्रस्तुत भएका दुवै मस्यौदा प्रस्ताव तथा बैठकका क्रममा सदस्यहरूले राखेका सुझावलाई समेटेर अन्तिम रूप दिने गरी तीन नेतालाई जिम्मेवारी दिइएको बताए।
पुनर्गठनका विषयमा कार्यदलभित्र फरक–फरक प्रस्ताव आएपछि त्यसलाई एकीकृत गर्ने प्रयासस्वरूप सम्पादन टोली बनाइएको हो। अब उक्त टोलीले दुवै मस्यौदाका साझा तथा विवादित विषयको अध्ययन गरी अन्तिम प्रस्ताव तयार गर्नेछ।
अन्तिम मस्यौदा तयार भएपछि कार्यदलमा पुनः छलफल गर्ने तयारी छ। यही कारण कार्यदलको बैठक असोज १ गतेसम्मका लागि स्थगित गरिएको हो।
बल्थलीमा बसेको बैठकले तत्कालै निष्कर्ष निकाल्नुभन्दा विभिन्न प्रस्ताव र सुझावलाई एउटै दस्तावेजमा समेट्ने बाटो रोजेको छ। तीन सदस्यीय टोलीलाई दिइएको जिम्मेवारीसँगै एमाले पुनर्गठनसम्बन्धी प्रस्ताव अब थप छलफलसहित अन्तिम चरणमा प्रवेश गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789383080.png)
-1786602170.png)
