काठमाडौं- शुक्रबार बेलुकी ६ बजे नयाँ मन्त्रीहरूको सपथको चर्चाले तातिरहेको राजनीतिमा नयाँ ताप दियो। प्रधानमन्त्री केपी शर्मा ओलीले प्रतिनिधिसभा विघटन गरेलगत्तै केही मन्त्रीहरूको जिम्मेवारी हेरफेर गरेका छन् भने केही नयाँ थपिएका छन्।
प्रधानमन्त्री ओलीले पूर्व एमाले समूहबाट गणेश ठगुन्ना, प्रेम आले र जुलिकुमारी महतोलाई मन्त्री बनाएका छन्। यसैगरी प्रधानमन्त्री ओलीले पूर्व एमाले समूहबाटै बर्दियाकी बिमला बिकलाई राज्यमन्त्री नियुक्त गरेका छन्। यस्तै पूर्वमाओवादी समूहबाट टोपबहादुर रायमाझी, प्रभु साह, गौरीशंकर चौधरी, मणिचन्द्र थापा र दावा लामा मन्त्री भएका छन्।
मन्त्रीहरूको सपथ हुने भएपछि राष्ट्रपति कार्यालयबाट सम्बन्धित मन्त्रालयका सचिवलाई तत्काल उपस्थित हुन खबर गयो। 'हामी अधिकांश सचिवहरू घर पुगिसकेका थियौँ, ४० मिनेटभित्र शितलनिवास आउनु भन्ने खबर आएको थियो,' सरकारका एक सचिवले भने, 'त्यसपछि हामी हतार हतार राष्ट्रपति निवास पुगेका थियौँ।'
श्रम मन्त्रालयमा मन्त्रीको स्वागतका लागि सजाइएका जोरघडा। तर नवनियुक्त मन्त्रीले शुक्रबार पदभार ग्रहण गरेनन्।
शुक्रबार छिट्टै कार्यालय समय सकिने भएकाले कर्मचारीहरू घर गैसकेका थिए। तर एक्कासी मन्त्रीहरूको सपथको खबर आएपछि उनीहरू हतारहतार सपथमा पुगे र स्वागतका लागि सिंहदरबार फर्किए। साँझ ८ बजेपछि सिंहदरबार प्रवेश गर्दा अधिकांश मन्त्रालयका ढोका बन्द थिए। जिम्मेवारी हेरफेर भएका मन्त्रीहरूले सचिवलाई आइतबार मात्रै कार्यालय आउने खबर गरेका थिए भने नयाँ मन्त्रीहरू सिंहदरबार जाने तयारीमा थिए।
तर प्रधानमन्त्री ओलीले ८ बजे मन्त्रिपरिषद बैठक बोलाएका कारण मन्त्रीहरू सथप ग्रहणपछि बालुवाटार लागे। प्रधानमन्त्रीले राज्यमन्त्रीलाई समेत राखेर बैठक गरेका कारण मन्त्रीहरू करिब डेढ घण्टा त्यहीँ अड्किए। शुक्रबार संघीय मामिला तथा सामान्य प्रशासन मन्त्री ठगुन्नाले मात्रै पदभार ग्रहण गरेका छन्।
नवनियुक्त संघीय मामिला तथा सामान्य प्रशासन मन्त्री ठगुन्ना पदभार गर्दै। पदभार पछि उनले निर्वाचन आयोगको ओएन्डएम पास गर्ने निर्णय गरेका छन्।
मन्त्री ठगुन्नाले निर्वाचन आयोगको संगठन तथा व्यवस्थापन संरचना (ओएन्डएम) अघि बढाउने निर्णय सदर गर्दै पदभार ग्रहण गरेका छन्। राति १० बजे सचिव एकनारायण अर्यालसहितको टोली ठगुन्नालाई कुरेर बसेको थियो। सामान्यता नियुक्त भएकै दिन पदभार ग्रहण गर्ने प्रचलन रहेका कारण ठगुन्ना मन्त्रालय पुगे भने अरु मन्त्री गएनन्।
सिंहदरबारका अधिकांश मन्त्रालयमा सन्नाटा छाएको थियो। सहरी विकास मन्त्री प्रभु साहलाई स्वागत गर्ने भन्दै एक कार्यकर्ता फूलको बुकी र माला लिएर कुरिरहेका थिए। तर मन्त्रालयको ढोकामा भने ताला लगाइएको थियो।
नवनियुक्त सहरी विकास मन्त्री प्रभु साहलाई स्वागत गर्न फूलमाला लिएर मन्त्रालय पुगेका एक कार्यकर्ता कर्मचारी। तर मन्त्री शुक्रबार मन्त्रालय आएनन्।
सहरी विकासबाट शिक्षामा सरुवा भएका कृष्णगोपाल श्रेष्ठले सचिव गोपीनाथ मैनालीलाई आइतबार मात्रै मन्त्रालय आउने जानकारी गराएका थिए।
श्रम मन्त्रालय र खानेपानी मन्त्रालयमा घडा राखिएको थियो। श्रमका कर्मचारी ९ बजेसम्म मन्त्रालय बसे भने मन्त्रिपरिषदको बैठक सकिने टुंगो नभएपछि सचिव तोयम रायासहितको टोली घरतर्फ लाग्यो। सचिव रायासँगको संवादमा मन्त्री गौरीशंकर चौधरीले आफू मन्त्रालय आउन सक्ने बताएका थिए। तर अबेर भएपछि उनी घर लागे।
मन्त्री आउन सक्ने भएपछि श्रम मन्त्रालयले पहिलो निर्णय के गर्ने भनेर विषय खोज्न थाल्यो। सचिव रायाले आफूले सदर गर्न लागेको फाइल मन्त्रीबाट निर्णय गराउने गरी अघि बढाए।
खानेपानी मन्त्रालयमा घडा राखिएको भए पनि कर्मचारी थिएनन्। कृषि विकास मन्त्रालयमा सरुवा भएकी मन्त्री पद्माकुमारी अर्यालले आफू आइतबार मात्रै मन्त्रालय जाने खबर पठाएर मन्त्रिपरिषदको बैठकपछि क्वाटरतर्फ लागिन्।
सुनसान कृषि मन्त्रालय।
स्वास्थ्यबाट पर्यटनमा सरुवा भएका भानुभक्त ढकाल पनि आइतबार मात्रै मन्त्रालय जानेछन्।
उनको स्थानमा सामान्य प्रशासनबाट गएका हृदयेश त्रिपाठीले पनि आइतबार मात्रै मन्त्रालय जाने जानकारी गराएका छन्।
युवा तथा खेलकुद मन्त्रालयले दावा लामालाई नयाँ मन्त्रीको रूपमा भित्र्याएको छ। शुक्रबार साँझमा भने मन्त्रालयमा च्यानल गेट लगाइएको थियो।
च्यानल गेट लगाइएको अवस्थामा युवा तथा खेलकुद मन्त्रालय।
सपथपछि मन्त्री लामा शितलनिवासबाट बालुवाटार लागे भने उनीसँगै सचिव रामप्रसाद थपलिया पनि उतै हिँडे। 'अब नयाँ मन्त्रीको पदभार आइतबार मात्रै हुन्छ,' सचिव थपलियाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
