इरान र अमेरिकाबीच तनाव फेरि एकपटक तीव्र बनेको छ । इरानको संसदका स्पीकर मोहम्मद बागेर घालीबाफले अमेरिका र इजरायललाई कडा चेतावनी दिँदै यदि अमेरिकाले इरानमा सैन्य आक्रमण गर्यो भने अमेरिकी सैन्य क्षेत्र र इजरायलमा आक्रमण गर्ने चेतावनी दिएका छन् ।
इरानमा लगातार १४ दिनदेखि जारी प्रदर्शनका क्रममा यस्तो बयान आएको हो । यता अमेरिकाका तर्फबाट पनि कडा चेतावनी आइरहेको छ ।
इरान इन्टरनेशनलका अनुसार उनले स्पष्ट रुपमा भनेका छन्, ‘अमेरिकाको कुनै पनि सैन्य कदमको जवाफ कारबाहीमा मात्र सीमित हुनेछैन ।’ एसोसिएटेड प्रेस (AP) को रिपोर्ट अनुसार, यो चेतावनी संसदमा चलिरहेको एक तीव्र सत्रका क्रममा आएको हो । जहाँ सांसद मञ्चनजिक गएर ‘डेथ टू अमेरिका’ को नारा लगाएका थिए ।
घालीबाफले इरान आत्मरक्षाको अधिकार अन्तर्गत पहिले कारबाही गर्ने विकल्प खुला राख्ने चेतावनी दिएका छन् । उनले अमेरिकी राष्ट्रपति भ्रममा रहेको बताउँदै अमेरिका र उसका क्षेत्रीय सहयोगीहरुले कुनै गलत कदम उठाए राम्रो नहुने धम्की दिए ।
इरानको तेहरानसहित कैयौं सहरमा लगातार प्रदर्शन जारी छ । अहिलेसम्म प्रदर्शनमा ११६ जना मारिएको आधिकारिक पुष्टि भएको छ । तर केही अन्तर्राष्ट्रिय संस्थाहरुले अस्पताललाई उदृत गर्दै मर्नेको संख्या ३ सयभन्दा बढी पुगेको बताएका छन् र
हाल इरानमा इन्टरनेट र फोन सेवा बन्द गरिएको छ । अमेरिकास्थित ह्यूमन राइट्स एक्टिविस्ट्स न्युज एजेन्सीका अनुसार करिब २ हजार ६ सयलाई पक्राउ गरिएको छ ।
अमेरिकी राष्ट्रपति डोनाल्ड ट्रम्पले प्रदर्शनकारीको समर्थन जनाएका छन् । उनले भनेका छन्, ‘इरानका जनता स्वतन्त्रताको नजिक छन्, अमेरिका अब सहयोगका लागि तयार छ।’न्यूयोर्क टाइम्स र वाल स्ट्रिट जर्नलको रिपोर्ट अनुसार ट्रम्प इरानमा सम्भावित आक्रमणका लागि तयार छन् । यद्यपि उनको अन्तिम निर्णय भने भइसकेको छैन ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
