काठमाडौं– राष्ट्रियसभाको बिहीबारको बैठकमा भारतीय प्रधानमन्त्री नरेन्द्र मोदीको नेपाल भ्रमणका विषयमा सांसदहरुले धारणा राखेका छन्। राष्ट्रियसभाको विशेष समयमा बोल्ने अधिकांश सांसदले मोदी भ्रमणको सुरक्षा संवेदनशीलता र सीमा सुरक्षाबारे सरकारको गम्भीर ध्यानाकर्षण गराएका छन्।
बैठकमा विशेष समय लिएर बोल्दै सांसदहरुले भारतीय प्रधानमन्त्री मोदीको सुरक्षाका लागि भन्दै नेपाल आएको ठूलो संख्याको भारतीय सुरक्षाकर्मीको आवश्यकता, सीमा सुरक्षा लगायतमा सदनलाई जानकारी गराउन माग गरेका छन्।
राष्ट्रियसभा सदस्य उदया शर्मा पौडेलले भारतीय प्रधानमन्त्री मोदीको शुक्रबार जनकपुरबाट हुन लागेको नेपालको भ्रमणका लागि सुरक्षा दिन भन्दै ठूलो संख्यामा भारतीय सुरक्षाकर्मी नेपाल आएको विषयमा सरकारको गम्भीर ध्यानाकर्षण गराइन्।
उनले गृह र रक्षा मन्त्रालयको ध्यानाकर्षण गराउँदै भनिनन्, ‘के हामीले भारतीय प्रधानमन्त्री र उनीसँगै आउने पाहुनाको सुरक्षाको प्रत्याभूति दिन सक्दैनौ? होइन भने किन भारतीय सुरक्षाकर्मी आएर अड्डा कसेर बसेका छन्।’
पौडेलले नेपालमा आएका पाहुनाको विशेष सम्मान गर्नुपर्ने भए पनि लज्जाबोध हुनेगरी गर्न नहुने बताइन्।
राष्ट्रियसभा सदस्य विनादेवी रानाले कालापानी र सुस्ता सीमा क्षेत्रको विषयमा समकक्षी भारतीय प्रधानमन्त्री नरेन्द्र मोदीसँग कुरा गर्न आग्रह गरिन्।
‘सरकार र भारतबीच सहमती भएको भनी हल्ला चलेको छ, के-के सहमती भएका हुन्, त्यसको जानकारी संसद्लाई गराउनुपर्दैन?’ रानाले उनले प्रश्न गरिन्।
‘भारतीय दूतावासलाई नेपालमा ५ करोड रुपैयाँसम्मको योजनाका लागि खर्च गर्न सक्ने अधिकार दिएको भन्दै उनले सरकारको विरोध गरिन्।
उनले भनिन्, ‘होइन भने किन हामी झुकेर स्वागतका लागि तयार भएका छौं।’ भारत मात्र हाम्रो सहायता राष्ट्र नभएको बताउँदै उनले उसको दूतावासलाई मात्र खर्च गर्ने अधिकार दिइएको विषयमा सदनमा जानकारी गराउन माग गरिन्।
राष्ट्रियसभा सदस्य उतोल तामाङले दुर्गमका जनताले बोलेको राज्यले नसुन्ने गरेको भन्दै गम्भीर ध्यानाकर्षण गराइन्। उनले मुगुको विकासमा ध्यान दिन माग गरिन्।
त्यस्तै, तारादेवी भट्टले कञ्चनपुरको पुनर्वास नगरपालिका ९ मा भारतीय सुरक्षाकर्मीले महत्वपूर्ण सम्पदालाई आफ्नो कब्जामा लिई स्थानीयलाई दुःख दिने गरेको भन्दै भारतीय ज्यादतिविरुद्ध तत्काल 'एक्सन' लिन सरकारको ध्यानाकर्षण गराइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
