काठमाडौं– ३८ सय किलो सुन तस्करी तथा सनम शाक्य हत्या प्रकरणमा मोरङ जिल्ला अदालतमा बिहीबारदेखि हुने थुनछेक बहसमा ५० भन्दा बढी कानुन व्यवसायी उत्रने भएका छन्।
जिल्ला अदालतको इतिहासमा पहिलो पटक यति धेरै कानुन व्यवसायी एउटै मुद्दामा वहस गर्न उत्रन लागेका हुन्। ६३ जना अभियुक्त विरुद्ध दायर भएको सुन तस्करी, संगठित अपराध र कर्तव्य ज्यान मुद्दामा यति धेरै कानुन व्यवसायीले बहस गर्न लागेका हुन्।
जिल्ला अदालतले सोमबारसम्म आरोपपत्रसँगै पेश भएका ३० प्रतिवादीको वयान समाप्त गरेको थियो। बयान समाप्त भएका ३० प्रतिवादीका हालसम्म ४३ जना कानुन व्यवसायीको वकालतनामा प्राप्त भएको अधिवक्ता भरतबहादुर थापाले बताए। उनी आफैं अभियुक्त तुलाराम थारूका तर्फबाट बहस गर्न उत्रँदै छन्।
काठमाडौंबाट आउने बाहेकका कानुन व्यवसायीको संख्या ४३ पुगेकाले उनीहरु समेत समेटिँदा बहसमा उत्रिने वकिलको संख्या ५० माथि पुग्ने उनले बताए।
तर, एकिन संख्या भने बिहीबार बिहान १० बजे सुनुवाई सुरु हुने समयमा प्राप्त हुने उनले जानकारी दिए।
थापाका अनुसार अहिलेसम्म वकालतनामा भर्नेहरु ५ वरिष्ठ अधिवक्ता र बाँकी अधिवक्ता छन्।
वरिष्ठ अधिवक्ताहरू रमेश कोइराला, हिक्मत पौडेल, विपुलेन्द्र चक्रवर्ती, सुरेशलाल श्रेष्ठ, राजेन्द्र भट्टराईको नाम प्राप्त भएको उनले बताए। चक्रवर्ती सर्वोच्च अदालतको न्यायाधीश अस्वीकार गरी बसेका मोरङका वरिष्ठ अधिवक्ता हुन्।
अधिवक्ताहरू देवीबहादुर घिमिरे, हेमराज पन्त, विकास थापा, देवेन्द्र कोइराला, नारायण वस्ती, रामप्रसाद भण्डारी, शान्तिराम भण्डारी, रूपेश कोइराला, दीपक खतिवडा, यमबहादुर मगर, लक्ष्मण न्यौपाने, मधुसुधन चौधरी, भक्ति माझी, विश्वराम भट्टराई, रेखा थापा, कविता बस्नेत, पुष्करचन्द्र घिमिरे, खगेन्द्रबहादुर श्रेष्ठ, डिल्लीबहादुर कार्की, अशोक पोखरेल, मोहन कोइराला र टंक उप्रेती लगायत ३० जनाले अभियुक्तका तर्फबाट बहस गर्नेछन्।
काठमाडौंबाट वरिष्ठ अधिवक्ता सुशिल पन्त, शम्भु थापा, रमण श्रेष्ठ र सुनिल पोखरेल, सतिषकृष्ण खरेल लगायतका अधिवक्ता बिराटनगर जाने तयारीमा छन्।
प्रहरीको एक महिना लामो अनुसन्धानपछि गत बुधबार जिल्ला सरकारी वकिलको कार्यालयले बहालवाला प्रहरी अधिकृतसहित २९ जनालाई पक्राउ गरी आरोपपत्रसँगै अदालतमा पेस गरेको थियो।
एक जना अभियुक्त भने अदालतमै उपस्थित भएका थिए। प्रहरी हवल्दार अमरबहादुर थापा राष्ट्रसंघीय शान्ति मिसनबाट फर्काइएपछि उनी मोरङ जिल्ला प्रहरी कार्यालयमा सम्पर्कमा आएका थिए।
उनीहरु विरुद्ध संगठित अपराध अन्तर्गत आपराधिक समूह स्थापना गरी सुन चोरी–पैठारी र निकासी गरेको, अपहरण तथा शरीर बन्धक र कर्तव्य ज्यान शीर्षकमा मुद्दा दर्ता भएको छ।
सबै मुद्दामा अदालतले एकै पटक बयान गराएको छ।
सरकारी वकिलको कार्यालय मोरङले गत बुधबार बहालवाला एसएसपी, अन्य प्रहरीका उच्च अधिकारी लगायत ६३ जनाविरुद्ध मुद्दा दायर गरेको थियो।
मिलेमतोमा सुन तस्करी गर्ने चूडामणि उप्रेती ‘गोरे' समूहले त्रिभुवन विमानस्थलबाट हालसम्म ३८ सय किलो सुन तस्करी गर्दै १७ अर्ब १ करोड ८० लाख रुपैयाँ राज्यलाई नोक्सान पुर्याएको दाबी गरिएको थियो। सरकारी वकिलको कार्यालयले उक्त रकम बिगोका रुपमा उनीहरुसँग असुल हुनुपर्ने माग–दाबी गर्दै जिल्ला अदालत मोरङमा मुद्दा दायर गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
