सरकारी प्रतिवेदनले भन्यो– कतार रोजगारीमा सिन्डिकेटको चलखेल छैन

श्रम-रोजगार

सरकारी प्रतिवेदनले भन्यो– कतार रोजगारीमा सिन्डिकेटको चलखेल छैनश्रम सम्झौता पुनरावलोकन गर्न सुझाव

निर्मला घिमिरे मंगलबार, मंसिर ३०, २०७७ १७:३७

काठमाडौं– सरकारी अध्ययन प्रतिवेदनले कतार रोजगारीमा सिन्डिकेटको चलखेल नभएको निष्कर्ष निकालेको छ। केही समयदेखि कतार रोजगारीमा सिन्डिकेटको आशंका भएपछि त्यसमाथि सत्यतथ्य छानबिन गर्न श्रम, रोजगार तथा सामाजिक सुरक्षा मन्त्रालयले गठन गरेको अध्ययन टोलीले सिन्डिकेटका लागि चलखेल नभएको निष्कर्ष निकालेको हो।

मन्त्रालय स्रोतकाअनुसार उक्त अध्ययन प्रतिवेदले कतार रोजगारीका नाममा कामदार चरम आर्थिक शोषणमा परेको भने देखाएको छ। यसरी कामदारमाथि भइरहेको चरम आर्थिक शोषण रोक्न यस अघि कतारसँग सन् २००५ मा गरिएको श्रम सम्झौता पुनरावलोकन गरी शून्य लागतमा कामदार पठाउन सरकारले पहल गर्नुपर्ने सुझाव दिइएको छ।

नेपाली श्रमिकहरुको आकर्षक गन्तव्य मुलुक कतारसँग २००५ मा श्रम सम्झौता भए पनि सो सम्झौता पर्याप्त नभएको भन्दै यसमा पुनरावलोकन गर्न विज्ञहरुले समेत सरकारलाई सुझाव दिँदै आएका छन्। कतारसँगको श्रम समझदारी नवीकरण गर्न दुई देशबीच छलफल भए पनि कतारले यसमा चासो नदेखाउँदा सम्झौताको प्रकृृया अगाडि बढ्न सकेको छैन।

यसैबीच केही समयदेखि म्यानपावर व्यवसायीहरुले कतार रोजगारीमा सिन्डिकेट लाद्ने चलखेल सुरु भएको आशंका गर्दै आएका छन्। सोही आशंकामा व्यवसायीहरुले छानबिन गर्न माग गर्दै उद्योग तथा वाणिज्य र श्रम तथा उपभोक्ता हित समितिमा निवेदन दिएका थिए। कतार रोजगारीको सिन्डिकेटमा छानबिन गर्न माग गर्दै निवेदन प्राप्त भएपछि समितिले सत्यतथ्य छानबिन गर्न श्रम मन्त्रालयलाई निर्देशन दिएको थियो।

सोही निर्देशनपछि श्रम मन्त्रालयले वैदेशिक रोजगार विभागका महानिर्देशक कुमार दाहालको संयजकत्वमा अध्ययन समिति गठन गरी छानबिन प्रकृया अगाडि बढेको थियो। सोही छानबिन समितिले कतार रोजगारीमा सिन्डिकेट लाद्ने चलखेल नभएको निष्कर्ष निकालेको हो।

यो प्रतिवेदन श्रम मन्त्रालयले संसदको उद्योग तथा वाणिज्य र श्रम तथा उपभोक्ता हित समितिलाई पेश गरिसकेको छ। सो अध्ययन प्रतिवेदन प्राप्त भइसकेको तर अध्ययन गर्न बाँकी रहेको समितिका सभापति विमल श्रीवास्तवले नेपाल लाइभलाई बताए।

‘प्रतिवेदनमा के छ भनेर हामी हेर्छौँ‚ त्यसपछि के भइरहेको छ र अब त्यसमा के गर्ने भन्ने विषयमा टुंगो लाग्छ,’ सभापति श्रीवास्तवले भने।

कतार रोजगारीका नाममा पछिल्लो समय केही म्यानपावर व्यवसायीहरुले अनधिकृत रुपमा कामदार पठाउन थालेसँगै थप आशंकाको घेरामा म्यानपावर व्यवसायीहरु तानिएका थिए।

कतार पुलिसमा पठाउने भन्दै अनधिकृत रुपमा अन्तरवार्ता लिइरहेको अबस्थामा नेपालका लागि कतारी राजदूतावासको गाडीसमेत फेला परेकाले दूतावासका कर्मचारीहरु समेत आशंकाको घेरामा परेका थिए। राज्य शक्तिकै मिलोमतोमा कतार रोजगारीमा सिन्डिकेट लाद्ने तयारी भइरहेको भन्दै केही म्यानपावर व्यवसायीहरुले चिन्ता व्यक्त गरेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।