मुद्दा छाडेर कामु प्रधानन्यायाधीश सेनाको हेलिकप्टर लिएर भीमेश्वर दर्शनमा

नेपाल लाइभ

नेपाल लाइभ मंगलबार, वैशाख २५, २०७५ ०६:२२

काठमाडौं– सर्वोच्च अदालतमा मुद्दा पेशी छाडेर कामु प्रधानन्यायाधीश दीपकराज जोशी जम्बो टोलीसहित सेनाको हेलिकप्टर लिएर दोलखास्थित भीमेश्वर मन्दिर दर्शन गरेर फर्किएका छन्। सोमबार अदालतमा मुद्दाको पेशी बिहानै ८ बजे तोकेर प्रधानन्यायाधीश जोशी आफूसहित १६ जनाको टोली लिएर भीमेश्वर पुगेका हुन्।

अदालतका कर्मचारी, आफन्तजन र बाहिरका मानिस टोलीमा सहभागी थिए। अदालतमा बिचौलिया हाबी भएको भनी सर्वोच्च अदालतका विभिन्न समितिहरुले प्रतिवेदन दिइरहेको समयमा जोशी अदालतबाहिरका व्यक्तिलाई लिएर हिँडेका हुन्। श्रीमती विजया र छोरी प्रितासमेत उनीसँगै थिए।

कामु प्रधानन्यायाधीश जोशीसँगै अदालतसँग सरोकार नै नभएका पदमभक्त खरेलसमेत अदालतको खर्चमा गएका हुन्। पेसाले पत्रकार बताउने उनी जोशी कामु भएदेखि नै निकट छन्। यसकारण पनि अदालतका मुद्दामा उनको प्रभाव देखिन सक्ने अदालतकै कर्मचारीहरु बताउँछन्।

जोशीसहितको टोली बिहान ८ बजे काठमाडौंबाट प्रस्थान गरेको थियो। नेपाली सेनाको ब्यारेकमा अवतरणपछि भीमेश्वरको दर्शन गर्ने र जिल्ला अदालत जानेसमेत कार्यक्रमको सूचीमा समावेश थियो।

अदालत अनुगमनका लागि यसअघि परिवार र आफू नजिक रहेका व्यक्तिहरु लैजाने चलन छैन। जिल्ला अदालतहरुको भ्रमणका लागि प्रधानन्यायाधीश, अदालतका कर्मचारी र मातहत उच्च अदालतमा न्यायाधीश सानो संख्यामा जाने चलन थियो। तर जोशीले त्यसविपरीत सर्वोच्च अदालतको खर्चमा परिवारसहित अदालतको कर्मचारी बाहेकका व्यक्तिलाई पनि हेलिकप्टरमा भ्रमण गराएका हुन्।

जोशीको यस्तो कदमपछि अदालतमा आलोचना भएको छ। कामु प्रधानन्यायाधीश हुँदैमा उनले सेनाको हेलिकप्टरमा गरेको भ्रमणले अदालत मितव्ययी नहुने भनी न्यायाधीशहरुले नै आलोचना गरेका छन्।

कोको थिए टोलीमा?
१. कामु प्रधानन्यायाधीश दीपकराज जोशी
२. श्रीमती विजया जोशी
३. छोरी प्रिता जोशी
४. अभयजङ्ग थापा
५. मुख्य रजिष्ट्रार राजन भट्टराई
६. करुणा भट्टराई कोइराला
७. मुख्य न्यायाधीश प्रकाशकुमार ढुंगाना
८. ढुंगानाकी श्रीमती कल्पना
९. उपरजिष्ट्रार प्रेम खड्का
१०. खड्काकी श्रीमती शाकुन्तला
११. सेनानी वीरविक्रम घिमिरे
१२. स्वकीय सचिव रिना कार्की
१३. नासु मन्दिरा रानाभाट
१४. पदमभक्त खरेल
१५. राजन सापकोटा
१६. ध्रुवबहादुर कार्की

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

चिकित्सक संघद्वारा थप आन्दोलनको घोषणा

शिक्षक आन्दोलन : तीन दिनभित्र शिक्षकका जायज माग पूरा गरी विद्यालय फर्काउने वातावरण सुनिश्चित गर्न सर्वोच्चको आदेश

रुकुम पूर्व केन्द्रविन्दु भएर भूकम्प