काठमाडौं– ३८ सय किलो सुन तस्करी तथा सनम शाक्य हत्या प्रकरणमा मोरङ जिल्ला अदालतमा सोमबारसम्म २७ अभियुक्तको बयान समाप्त भएको छ। बाँकी ३ जनाको बयान मंगलबार सक्दै थुनछेक बहस सुरु हुने मोरङ जिल्ला अदालतका श्रेस्तेदार नवराज दुलालले बताए।
आइतबार प्रहरी नायव निरीक्षक (सई) बालकृष्ण सञ्जेलसहित अन्य अभियुक्तको बयान सुरु भएको थियो भने सोमबारसम्ममा २१ जना अभियुक्तको बयान लिइसकेको श्रेस्तेदार दुलालले बताए। जिल्ला न्यायाधीश नारायणप्रसाद शर्माको इजलासमा बयान भइरहेको छ।
आइतबार अदातलले प्रहरी नायव निरीक्षक सञ्जेल, राप्रपा प्रजातान्त्रिकका नेता भुजुङ गुरुङ, सुन व्यापारी महावीर गोल्यान ‘चाचाजी’, राजेन्द्रकुमार शाक्य, लालबहादुर मगर, वीरेन्द्रमान श्रेष्ठ ‘चन्दन’को बयान सकेको थियो। सोमबार १५ जनाको बयान लिइएको थियो। मंगलबार एसएसपी दिवेश लोहनीसहित ३ जनाको बयान पहिलो सत्रमा हुने श्रेस्तेदार दुलालले बताए।
अदालतमा २९ जना प्रतिवादीसहित अभियोगपत्र दायर भएको थियो भने एक जना अभियुक्त अदालतमै उपस्थित भएका थिए। उनीहरु विरुद्ध संगठित अपराध अन्तर्गत आपराधिक समूह स्थापना गरी सुन चोरी–पैठारी र निकासी गरेको, अपहरण तथा शरीर बन्धक र कर्तव्य ज्यान शीर्षकमा मुद्दा दर्ता भएको छ। सबै मुद्दामा अदालतले एकै पटक बयान गराएको छ।
सरकारी वकिलको कार्यालय मोरङले गत बुधबार बहालवाला एसएसपी, अन्य प्रहरीका उच्च अधिकारी लगायत ६३ जना विरुद्ध मुद्दा दायर गरेको थियो। मिलेमतोमा सुन तस्करी गर्ने ‘गोरे समूह’ले त्रिभुवन विमानस्थलबाट हालसम्म ३८ सय किलो सुन तस्करी गर्दै १७ अर्ब १ करोड ८० लाख रुपैयाँ राज्यलाई नोक्सान पुर्याएको दाबी गरिएको थियो। सरकारी वकिलको कार्यालयले उक्त रकम बिगोको रुपमा उनीहरुसँग असुल हुनुपर्ने माग–दाबी गर्दै जिल्ला अदालत मोरङमा मुद्दा दायर गरेको थियो।
प्रहरीको एक महिना लामो अनुसन्धानपछि गत बुधबार जिल्ला सरकारी वकिलको कार्यालयले बहालवाला प्रहरी अधिकृतसहित २९ जनालाई पक्राउ गरी आरोपपत्रसँगै अदालतमा पेस गरेको थियो। प्रहरी हवल्दार अमरबहादुर थापा मोरङ जिल्ला प्रहरी कार्यालयमा सम्पर्कमा आएका थिए।
फरारको हकमा म्याद जारी गर्ने
अदालतमा उपस्थित भएका प्रतिवादीहरुको थुनछेक बहसपछि फरार रहेका अभियुक्तहरुको हकमा अदालत उपस्थित हुन म्याद जारी हुनेछ। तोकेको म्यादभित्र अदालत उपस्थित हुनका लागि उनीहरुको स्थायी ठेगानामा म्याद तामेली गर्ने कार्य सुरु हुने मोरङ जिल्ला अदालतका श्रेस्तेदार दुलालले बताए।
विभिन्न जिल्लाका प्रतिवादी मुद्दामा देखिएकाले म्याद तामेलीमा समय लाग्ने देखिएको छ। अदालतले तोकेको म्यादमा हाजिर नभएमा सार्वजनिक सूचनासम्म जारी हुन सक्ने उनले बताए।
यी हुन् फरार प्रतिवादीहरु
सुन तस्करी र सनम शाक्य हत्या प्रकरणका ३३ जना प्रतिवादी हालसम्म फरार नै छन्। उनीहरुले अदालतको म्याद बुझेर उपस्थित भएपछि थुनछेक बहस हुनेछ।
३३ किलो सुन तस्करी र त्यससँगै जोडिएको शाक्य हत्याकाण्डपछिको अनुसन्धानमा प्रहरीले ६३ जनालाई अभियोग लगाएको छ। जसमध्ये ३० जना अदालत उपस्थित भएका छन् भने ३३ जना फरार छन्।
सुन तस्करीका मुख्य नाइके चुडामणि उप्रेती (गोरे)सहित सुरेन्द्र गौतम, भोजराज भण्डारी, रुस्तम भनिने मोहमद उस्तम मियाँ, टुकबहादुर मगर, रोहित आचार्य, भविन राई भनिने भविन तामाङ, कृष्ण बस्नेत फरार छन्।
यस्तै, मामा भनिने मोहनकुमार अग्रवाल, डेविट डा भनिने छिरिङ बाङ्गेल घले, बहुला भनिने सुनिलकुमार अग्रवाल, कालुरकालेरकिसन उपनाम भएका कृष्णगोपाल अग्रवाल, रमेश उप्रेती, चेतन भनिने बाजेको सेकुवाका मालिक चेतनाथ भण्डारी, प्रमोदकुमार श्रेष्ठ, बेनु श्रेष्ठ, हरिशरण खड्का, निरु भनिने नर्वदा खरेल, प्रयास पराजुली, कमल कार्की, सञ्जय अधिकारी पनि फरार छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
