एजेन्सी–फ्रान्सको नीस सहरको एउटा चर्चमा चक्कु प्रहार गरी ३ जनाको हत्या गर्ने व्यक्ति केही दिनअघि ट्युनिसियाबाट आएको पाइएको छ। बिबिसीका अनुसार ती आक्रमणकारी २१ वर्षीय ब्राहिम एइसोई नाम गरेका व्यक्ति हुन् । उनी सेप्टेम्बरमा डुङ्गाबाट इटालीको ल्याम्पेडुसा टापुमा आइपुगेका थिए।
कोरोना महामारीका कारण उनलाई १४ दिनको क्वारेन्टाइन बसाइपछि इटालीले आफ्नो भूमि छोड्न आदेश दिएको थियो। इटालीबाट अक्टोबर महिनाको सुरुवातमा ती व्यक्ति फ्रान्स आइपुगेको घटनाको अनुसन्धान गरिरहेका अधिकृतले जनाएका छन्।
आक्रमणपछि फ्रेन्च प्रहरीले एइसोइलाई गोली हानी हिरासतमा लिएको थियो। गम्भीर घाइते भएका उनको अस्पतालमा उपचार भइरहेको पनि प्रहरीले जानकारी दिएको छ। पक्राउ परेका बेला उनीसँग परिचय खुल्ने कुनै कागजपत्र नभएको तर इटाली रेडक्रसले बनाइदिएको कागजबाट उनको परिचय खुलेको अधिकारीले बताएका छन् । उनले फ्रान्समा राजनैतिक शरणका लागि कुनै आवेदन दिएका छैनन्। किन र केका लागि उनले यसरी आक्रमण गरे भन्ने उनको बयानपछि मात्र थाहा हुने छ । हाल उनको उपचार भइरहेकाले केही समयपछि बयान लिने तयारी प्रहरीले गरेको छ।
आक्रमणकारीको साथबाट एउटा कुरान, दुइटा टेलिफोन र एउटा चक्कु बरामद गरिएको छ। त्यस्तै एउटा झोलामा आक्रमणमा प्रयोग नगरिएका दुई वटा चक्कु पनि प्रहरीले बरामद गरेको छ।
बिहीबार नीस सहरको एक चर्चमा चक्कु आक्रमण गरी दुई महिला र एक पुरुषको हत्या भएको थियो। ६० वर्षीया महिलाको ‘शिर काटिएको’ थियो । त्यस्तै ५५ वर्षीय पुरुषको घाँटी काटिएको थियो। पटक–पटक चक्कु आक्रमणपछि पनि भाग्न सफल ४४ वर्षीया अर्की महिलाको पनि पछि मृत्यु भएको थियो। अन्य केही व्यक्तिहरु घाइते भएका थिए । घाइतेहरुको उपचार भइरहेको छ।
आक्रमणलगत्तै फ्रान्स सरकारका अधिकारीहरुले आतंककारी शैलीमा चर्चमा आक्रमण भएको टिप्पणी गरेका थिए । केही समयअघि फ्रान्सका राष्ट्रपति इम्यानुअल म्याक्रोँले मुस्लिमविरोधी टिप्पणी गरेको भन्दै मुस्लिम देशहरुमा आलोचना भइरहेका थियो। म्याक्रोंले चार्ली हेब्दो पत्रिकाले प्रकाशन गरेको कार्टुनको सर्मथन गरेका थिए। उक्त पत्रिकाले इस्लामहरुका धर्मगुरु मोहम्मद पैगम्बरको तस्विर विगारेर छापेको थियो। मुस्लिम देशहरुमा फ्रान्सका सामानहरु बहिस्कार गर्ने लहर चलिरहेको समयमा चर्चमा यस्तो आक्रमण भएको छ। उक्त घटनालगत्तै राष्ट्रपति म्याक्रोँले आतंककारी शैलीमा भएको आक्रमणमा संलग्नलाई कुनै छुट नदिइने बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
