धनुषा- बैसाख २८ गते नेपाल भ्रमणमा आउन लागेका भारतीय प्रधानमन्त्री नरेन्द्र मोदीको स्वागतका लागि प्रधानमन्त्री केपी ओली जनकपुर आउने भएका छन्। आज जनकपुरमा आयोजित पत्रकार सम्मेलनमा गृहमन्त्री रामबहादुर थापाले भारतीय प्रधानमन्त्री मोदीको नेपाल भ्रमण धार्मिक र सांस्कृतिक हुने भन्दै प्रधानमन्त्री ओली २८ गते जनकपुर आउने जानकारी गराए।
जनकपुर आएर मोदीले जानकी मन्दिरको पूजाअर्चना गर्नेछन् र उनलाई नागरिक अभिनन्दन गरिने कार्यक्रम छ।
आज गृहमन्त्री थापाले मोदीको अभिनन्दन गरिने ठाउँ बाह्र बिगाहाको स्थलगत निरीक्षण पनि गरेका छन्।
पत्रकार सम्मेलनमा मन्त्री थापाको यस पटकको नेपाल भ्रमणमा कुनै राजनीतिक सम्झौता नहुने बताए। साथै उनले उच्च सुरक्षाको व्यवस्था मिलाइने समेत जानकारी दिए।
जनकपुरधामपछि मोदी मुक्तिनाथको दर्शनका लागि जानेछन्। ‘नेपाल भ्रमणका क्रममा प्रधानमन्त्री मोदीले जनकपुरका अलवा मुक्तिनाथको पनि भ्रमण गर्नुहुनेछ। मुक्तिनाथ भ्रमणलाई पनि हामीले उहाँको नेपालमा रहँदाको तालिकामा राखेका छौं,’ मोदी भ्रमणबारे जानकार र तयारी गरिरहेका दूतावासका एक अधिकारीले भने।
बैसाख २८ को बिहानै विशेष विमानमार्फत नेपाल आउन लागेका मोदीले नेपालमा छँदा राष्ट्रपति, उपराष्ट्रपति, प्रधानमन्त्रीसहित विपक्षी एवं मधेसी दलका नेतालाई भेट्ने कार्यतालिकाको खाका बनाइएको ती अधिकारीले जानकारी दिए।
मोदीको भ्रमण नजिकिँदै जाँदा भारतसँगका नाकामा पनि सुरक्षा व्यवस्था कडा बनाइएको छ।राससको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
