उद्योग वाणिज्य महासंघको साधारणसभा मंसिर ११ र १२ मा हुने

अर्थ समाचार

उत्तम काप्री शुक्रबार, असोज २, २०७७ १९:१४

काठमाडौं- नेपाल उद्योग वाणिज्य महासंघको साधारणसभा मंसिर ११ र १२ मा हुने भएको छ। शुक्रबार बसेको पदाधिकारी बैठकले साधारणसभाको मिति तय गरेको महासंघ अध्यक्ष भवानी राणाले नेपाल लाइभलाई जानकारी दिइन्।

काठमाडौंमा साधारणसभा हुने समेत उनले जानकारी दिइन्। तर काठमाडौंमा हुन नसकेको अवस्थामा अन्य विकल्पमा तयार गरेर भए पनि साधारणसभा हुने उनले जानकारी दिइन्।

महासंघको ५४औं साधारणसभा नियमित रूपमा हुनका लागि चैत २८ र २९ गते काठमाडौंमा हुने तय भएको थियो। तर कोरोना महामारीको संकट सुरु भएकाले जेठको पहिलो साताका लागि तय गरिएको थियो। जेठमा पनि साधारणसभा हुन नसकेपछि साउन २६ र २७ गते का लागि ललितपुरमा गर्ने गरी सारिएको थियो। साउनमा पनि सभासम्मलन गर्न सरकारले फुकुवा नगरेकाले साधारणसभा अनिश्चितकालका लागि स्थगित भएको थियो।

सो साधारणसभा सभा सम्मेलन गर्न दिएको १५ दिनभित्र गर्ने भन्ने निर्णय भएको थियो। साउनमा हुने भनिएको साधारणसभा स्थगित भएसँगै व्यावसायीहरूको विवाद सुरु भएको थियो।

विवाद भएसँगै महासंघले निर्वाचनको मोडालिटी र मिति तय गर्न कार्यदल समेत गठन गरेको थियो। कार्यदलले तीन मोडालिटीबारे सुझाव दिएको थियो।