प्रतीकात्मक तस्बिर
काठमाडौं– यो वर्ष श्रमिकको तलब नबढ्ने भएको छ। कोरोनाको कारण देखााउँदै सरकारले यो वर्ष उद्योग तथा कलकारखानामा काम गर्ने श्रमिकहरुको पारिश्रमिकमा पुनरावलोकन नगर्ने भएको हो।
श्रम, रोजगार तथा सामाजिक सुरक्षा मन्त्रालयका प्रवक्ता तथा सहसचिव सुमन घिमिरेले कोरोनाका कारण देशको अर्थतन्त्र धरासायी अवस्थामा रहेकाले यस वर्ष श्रमिकहरुको पारिश्रमिक बढाउने अवस्था नरहेको बताए। मुलुकको आर्थिक क्षमताअनुसार श्रमिकहरुको ज्यालादर निर्धारण गरिने हुँदा यस सम्बन्धमा मन्त्रालयले विज्ञहरुसँग थप छलफल गरिरहेको उनको भनाई छ। ‘अहिले मुलुकको आर्थिक अवस्था नै संकुचनमा आएको छ। यस्तो अवस्थामा पारिश्रमिक पुनरावलोकनका सम्बन्धमा हामी कसरी जाने भनेर विज्ञहरुसँग राय परामर्श लिइरहेका छौँ,’ उनले नेपाल लाइभसँग भने।
‘हामी देश अवस्था अनुसार चल्नुपर्छ। नेपालमा जे उपलब्ध छ त्यसमा नै काम गर्ने हो। अन्य देशका कर्मचारीसँग तुलना गर्दा मेरो पारिश्रमिक पनि ज्यादै कम होला,’ सहसचिव घिमिरेले भने, ‘मुलुकको आर्थिक क्षमताभन्दा ज्यालादर बढी हुन सक्दैन। मुलुकको आर्थिक क्षमताले ज्यालादर निर्धारण हुन्छ।’ अहिले सामान्य अवस्था नरहेकाले बाँच्ने र बचाउने तर्फ सरकार केन्द्रित रहेको उनले बताए।
श्रम ऐन २०७४ को दफा १०६ र १०७ मा श्रम मन्त्रालयले प्रत्येक दुई वर्षमा न्यूनतम पारिश्रमिक निर्धारण गर्न नेपाल सरकार, ट्रेड युनियन र रोजगारदाता संगठनकाे प्रतिनिधित्व हुने गरी एक स्थायी न्यूनतम पारिश्रमिक निर्धारण समिति रहने व्यवस्था छ। सो व्यवस्थाअनुसार तत्कालीन श्रममन्त्री गोकर्ण विष्टले २०७५ बैशाख ७ गते न्यूनतम पारिश्रमिक निर्धारण समिति गठन गरेका थिए।
२०७५ साउन १ गतेदेखि लागू हुने गरी श्रमिकहरुको पारिश्रमिक १३ हजार ४ सय ५० कायम गरिएको थियो। ऐनमा व्यवस्था भएअनुसार श्रमिकहरुको पारिश्रमिक यो वर्ष पुनरावलोकन हुनुपर्ने हो। तर, सरकारले यस वर्ष कोरोनाको कारण देखाउँदै पारिश्रमिक पुनरावलोकन नगर्ने भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
-1779545841.jpg)
