काठमाडौं-देशमा रोजगारीकाे अवसर नहुँदा विदेशिने युवाहरुको लर्को लाग्न थालेको छ ।
विश्वमा काेराेना महामारीका कारण स्थगन भएको पुनः श्रम स्वीकृति सुचारु भएसँगै विदेशिनेको लर्को लाग्न थालेको हो । शनिबारदेखि सोमबारसम्म ७ सयभन्दा बढीले वैदेशिक रोजगारीका लागि पुनः श्रम स्वीकृति लिइसकेका छन् ।
शनिबार ४७, आइतबार ३०७ र सोमबार ४१० गरी ३ दिनमा ७६४ जनाले पुनः श्रम स्वीकृति लिएका हुन्। गत फागुन २९ गते बसेको मन्त्रिपरिषद्को बैठकले वैदेशिक रोजगारीमा सबै प्रकारका श्रम स्वीकृति स्थगन गरेसँगै त्यसयता वैदेशिक रोजगारी ठप्प थियो ।
असार १५ गते बसेको मन्त्रिपरिषद् बैठकले बिदामा नेपाल आएका तथा भिसा र करार अवधि बाँकी रहेका श्रमिकहरुका हकमा कोरोना परीक्षण र स्वास्थ्यसम्बन्धी मापदण्ड पालना गरी वैदेशिक रोजगारीमा जान दिने निर्णय गरेसँगै विदेशिनेको लर्को लाग्न सुरु भएको हो ।
यसअघि सरकारले वैदेशिक रोजगारीबाट स्वदेश फर्किएको अवस्थामा लकडाउनका कारण अड्किएका श्रमिकहरुलाई प्रधानमन्त्री रोजगार कार्यक्रममा आबद्ध गरी स्वदेशमै रोजगारी उपलब्ध गराउने उद्घोषसमेत गरेको थियो । विदेश जान नपाएका श्रमिकहरुलाई प्रधानमन्त्री रोजगार कार्यक्रममार्फत् रोजगारी दिने भन्दै पटक–पटक गरिएको यस्ताे घाेषणा व्यवहारमा भने लागू हुन सकेको छैन ।
देशमा आकर्षक रोजगारीकाे अवसर नहुँदा विदेशिनेको लर्को लाग्न थालेको हो। कोरोनाका कारण लाखौँको संख्यामा बेरोजगारी सिर्जना भएको छ। अधिकांश युवाहरु नयाँ श्रम स्वीकृति खुल्ने पर्खाइमा छन्। सरकारले आगामी आर्थिक वर्षमा देशभित्र लाखौँ रोजगारी सिर्जना गर्ने नीति तथा कार्यक्रम र बजेटमा व्यवस्था गरेको छ। तर आर्थिक वर्ष सकिनै लाग्दा पनि ती कार्यक्रम कार्यान्वयनका लागि कुनै तयारी देखिँदैन।
सरकारले देशभित्र लाखौँको संख्यामा रोजगारी सिर्जना गर्ने कार्यक्रम अघि सारे पनि कार्यान्वयन पक्ष फितलो हुँदा नेपाली युवाहरु वैदेशिक रोजगारीमा जानै पर्ने बाध्यकारी अवस्था सिर्जना हुने गरेको राष्ट्रिय युवा परिषद्का कार्यकारी उपाध्यक्ष माधवप्रसाद ढुंगेल बताउँछन् ।
‘युवाहरुलाई सहुलियत कर्जा दिने कुरामा पनि जोस जाँगर भएकालाई ऋण दिन आनाकानी गर्ने, तर काठमाडौंमा घर जग्गा भएका व्यक्तिहरुलाई मात्रै ऋण उपलब्ध गराउँदा देशमा रोजगारी तथा स्वरोजगारी सिर्जना हुन सकिरहेको छैन’, उनी भन्छन् ।
चालु वर्षको आर्थिक सर्वेक्षणअनुसार नेपाली श्रम बजारमा हरेक वर्ष ५ लाख श्रमशक्ति आउने गरेको छ। उनीहरुका लागि आवश्यक रोजगारीका अवसर नहुँदा अधिकांश युवाहरुले बाध्यकारी वैदेशिक रोजगारीको बाटो अंगाल्नुपर्ने स्थिति छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789728785.jpeg)
-1786602170.png)
-1789631269.jpg)
