काएरो- अरब संसदले थुनामा रहेका प्यालेष्टिनी नागरिकमाथि भएको इजरायली अपराधबारे अनुसन्धान गर्न छानबिन समितिको निर्माण गर्न संयुक्त राष्ट्रसंघलाई आग्रह गरेको छ। प्यालेष्टिनी कैदी दिवसका अवसरमा एक विज्ञप्ति जारी गर्दै अरब संसदका सभामुख मशाल विन फाहम अल–सलामीले राष्ट्रसंघसँग उक्त अपिल गरेका हुन्।
'राष्ट्रसंघसमक्ष अरब संसदको तर्फबाट एउटा छानबिन समिति निर्माण गरी प्यालेष्टिनी नागरिकलाई थुनामा राखिएका सबै इजरायली जेलमा दैनिकजसो हुने गरेका भनिएका अपराधबारे अनुसन्धानका लागि हामी आग्रह गरेका छौँ,' सलामीले भनेका छन्।
राष्ट्रसंघ तथा अन्य अन्तर्राष्ट्रिय निकायलाई जेलमा हुने गरेका बेथिति तथा अपराधबारे छानबिन गर्न आग्रह गर्दै युद्ध अपराध तथा मानवीयता सम्बन्धि अपराधको अन्तर्राष्ट्रिय तहमा बहस थाल्न अनुरोध गरेको उनले बताए।
सन् २०१८ मा इजरायलसँगको सीमा विवादको सन्दर्भमा करिब दुई हजार प्यालेष्टिनीलाई सुरक्षा नियन्त्रणमा लिएको प्यालेष्टिनी कैदीहरूको क्लब (पिपिसी) ले मंगलबार जनाएको थियो।
इजरायली जेलहरूमा प्यालेष्टिनी कैदीहरूका अधिकारका लागि कार्यरत अर्धसरकारी संगठन पिपिसीले प्यालेष्टिनी कैदी दिवसका सन्दर्भमा सार्वजनिक गरेको प्रतिवेदनमा भनिएको छ, 'यो वर्षको सुरुदेखि अहिलेसम्म ३६९ बालबालिका र ३६ महिलासहित एक हजार ९२८ प्यालेष्टिनीलाई इजरायली सुरक्षा घेरामा राखिएको पाइएको छ।'
प्रतिवेदन अनुसार इजरायलको स्थापना भएको दिन सन् १९४८ को मे १४ देखि हालसम्म करिब १० लाख प्यालेष्टिनीलाई इजरायली प्रशासनले पक्राउ गरेको छ। प्यालेष्टिनी नागरिकले इजरायल स्वतन्त्र भएको उक्त दिनलाई नाक्वा दिवस अर्थात् विनाशको दिनका रूपमा लिँदै आएका छन्।
इजरायल स्वतन्त्र भएपछि हालसम्म लाखौँ प्यालेष्टिनी आफ्नो भूमि छोडेर पूर्वी जेरूसेलम, वेस्ट बैंक तथा गाजा क्षेत्रमा विस्थापित रूपमा जीवन बिताउँदै आएका छन्। अहिले इजरायली जेलमा ३५० बालबालिका, ६५ महिला र ६ जना सांसदसहित ६ हजार ५ सय प्यालेष्टिनी नागरिकले कैदी जीवन बिताइरहेका प्रतिवेदनमा उल्लेख छ।
प्यालेष्टिनीहरूले प्यालेष्टिनी राष्ट्रिय परिषद्को घोषणा गरिएको दिन सन् १९७४ अप्रिल १७ लाई कैदी दिवसका रूपमा मनाउँदै आएका छन् भने परिषद्ले सम्पूर्ण कैदीको रिहाइका लागि आन्दोलन गर्दै आएको छ।रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791545631.png)
-1786602170.png)
