काठमाडौं– सोमबारदेखि चीनको औपचारिक भ्रमणमा रहेका परराष्ट्रमन्त्री प्रदिप ज्ञवालीले आज आफ्ना चिनियाँ समकक्षीसँग भेट गर्दैछन्। कार्यक्रमतालिकाअनुसार आज मन्त्री ज्ञवालीले चीनका विदेशमन्त्री वाङ यीसँग भेटवार्ता गर्ने कार्यक्रम रहेको चिनस्थित नेपाली दुतावासले जनाएको छ।
आजको वार्तामा प्रधानमन्त्री केपी शर्मा ओलीको चीन भ्रमणको विषयमा पनि छलफल हुने अपेक्षा गरिएको छ। प्रधानमन्त्री ओली वैसाखभित्रै चीन भ्रमणमा जाने तयारीमा रहेकाले परराष्ट्रमन्त्री ज्ञवालीकै भ्रमणका क्रममा प्रधानमन्त्रीको चीन भ्रमणको मिति टुंगो लाग्न सक्ने प्रधानमन्त्री निकटका स्रोतहरुको भनाइ छ।
दुई पक्षीय भेटघाटपश्चात् संयुक्त प्रेस वक्तव्यसमेत जारी हुने बताइएको छ। चीनका विदेशमन्त्री यीले आजै नेपालका आफ्ना समकक्षीका सम्मानमा दिवाभोजको आयोजना गर्नेछन्।
यसैबीच परराष्ट्रमन्त्री ज्ञवालीलाई बेइजिङस्थित नेपाली दूतावासले मंगलबार स्वागत गरेको छ।
मन्त्री ज्ञवालीको सम्मानमा दूतावासद्वारा आयोजित स्वागत समारोहमा उनले नेपालले संविधान जारीसँगै पछिल्लो तीन वर्षमा राजनीतिक क्षेत्रमा ऐतिहासिक उपलब्धि हासिल गरेको अवगत गराउँदै संविधानको कार्यान्वयनका लागि तीन तहका निर्वाचन सफलतापूर्वक सम्पन्न गरेको बताए।
उनले दुई देशबीचको सम्बन्धका बारेमा चर्चा गर्दै चीनले नेपालको हरेक क्षेत्रमा गर्दै आएको सहयोगको सरहाना गरे। सो क्रममा उनले आगामी दिनमा समेत सहयोगमा अझ बढोत्तरी हुँदै जाने अपेक्षा गरे।
मन्त्री ज्ञवालीले नेपाल चीनको शान्तिपूर्ण विकास देखेर खुशी हुनुका साथै शान्तिपूर्ण सहअस्तित्व, पञ्चशीलको सिद्धान्तका आधारमा विश्व मामिला प्रवद्र्धनमा चीनको बढ्दो भागिदारीका साथ विश्व आर्थिक विकास र स्थिरताको सम्भावना देखिएको उल्लेख गरे।
समारोहमा चीनका लागि नेपाली राजदूत लीलामणि पौड्याल, दूतावासका कर्मचारी, अन्य कूटनीतिक नियोगका प्रतिनिधिको उपस्थिति रहेको परराष्ट्र मन्त्रालयले जनाएको छ।
बेइजिङमा रहँदा परराष्ट्रमन्त्री ज्ञवालीले चिनियाँ राष्ट्रिय कांग्रेसका अन्य नेताहरुसँग समेत भेटघाट गर्ने कार्यक्रम रहेको छ। उनले चिनियाँ बुद्धिजीवीहरुसँग हुने गोलमेच वार्तालाई सम्बोधन गर्नेछन्।
भ्रमणका क्रममा शुक्रबार परराष्ट्रमन्त्री ज्ञवालीले सिचुआन प्रान्तको चेङ्दु सिटीको समेत भ्रमण गर्नेछन्। सो क्रममा उनले सिचुआन विश्वविद्यालयमा हुने कार्यक्रमलाई सम्बोधन गर्ने कार्यक्रम तय गरिएको छ।
उनी आगामी शनिबार स्वदेश फर्किने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
