काठमाडौं- कानुन विपरीत ५० प्रतिशत अन्तःशुल्क छुटमा भित्रिएको बिएमडब्लू सेमेन सिरिज कार आयातकर्ता लक्ष्मी प्रिमियम मोटर्सले सम्पूर्ण कर तिरेको छ। आयातकर्ता लक्ष्मी प्रिमियम मोटर्सले आइतबार कानुनसम्मत सिर्जना हुने कर दायित्व भुक्तानी गरेको हो। कार भन्सार जाँचपास भएको १८ दिनपछि कम्पनीले कर बुझाएको छ।
भन्सार जाँचपासका क्रममा ३० प्रतिशत अन्त:शुल्क तिरिएकोमा यसलाई सच्याउँदै कम्पनीले ६० प्रतिशत अन्त:शुल्क तिरेको छ। आयातकर्ताले आइतबार ६३ लाख १२ हजार ११ रुपैयाँ थर कर रकम सरकारलाई बुझाएको छ। वीरगञ्ज भन्सार हुँदै भित्रिएको यो गाडी जाँचपासका क्रममा ४० प्रतिशत भन्सार, ३० प्रतिशत अन्तशुल्क, १३ प्रतिशत मूल्य अभिवृद्धि कर र ८ प्रतिशत सडक मर्मत दस्तुर लगाइएको थियो।
गत जेठ १४ मा भन्सार जाँचपास भएर नेपाल भित्रिएको बिएमडब्लू सेभेन सिरिज ’७४० एलई एक्सड्राइभ’मा ६० प्रतिशत अन्तःशुल्क लाग्नेमा आयातकर्ताले ३० प्रतिशतमात्र तिरेको थियो। सरकारले आर्थिक ऐन २०७६ मा हाब्रिड कारमा लाग्ने भन्सार र अन्तःशुलकमा ५०/५० प्रतिशत छुट दिने व्यवस्था गरिएको थियो। तर सरकारको छुट उद्देश्य विपरितका कारले छुट पाएको भन्दै सरकारले अन्तःशुल्कमा दिइएको छुट खारेज गरेको थियो।
अन्तःशुल्क खारेजको निर्णण मन्त्रिपरिषद्ले गरेर गएको मंसिर १६ गतेको राजपत्रमा सूचना प्रकाशित भएको थियो। त्यसयता हाइब्रिड कार आयात नभएको र भन्सारका कर्मचारीले राजपत्रमा प्रकाशित सूचनामा अपडेट नहुँदा अन्तःशुल्क छुट पाएर गाडी भित्रिएको थियो।
संसदमा उठ्यो प्रश्न
नेपाल लाइभले प्रकाशित गरेको बिएमडब्लूको समाचार बारे संसदको आइतबारको बैठकमा सांसद देवेन्द्रराज कँडेलले यो विषय उठाएका थिए। उनले यो कार कानुनअनुसार कर नतिरी छुटेको उल्लेख गरेका थिए। उनले २०७६ मंसिर १६ को मन्त्रिपरिषदको बैठकले छुट खारेज गरे पनि बिएमडब्लुको गाडीलाई छुट दिइएको उल्लेख गरे।
कानुनविपरीत यो गाडीलाई छुट दिइएको भन्दै कँडेलले यो प्रकरणको छानबिन गरी दोषीमाथि कारबाही गर्नुपर्ने पनि उल्लेख गरे। उनले अर्थमन्त्रीको नियतमाथि आफ्नो शंका नभएको भन्दै छानबिन भने हुनुपर्ने उल्लेख गरे। प्रश्नको जवाफ दिँदै अर्थमन्त्री डा युवराज खतिवडाले जवाफका क्रममा मानवीय त्रुटीले छुट भएको भन्दै करदाताले थप कर तिरिसकेको उल्लेख गरेका थिए।
कारको खरिद मूल्य र करको हिसाब
बिएमडब्लू सेभेन सिरिज ’७४० एलई एक्सड्राइभ’को खरिद मूल्य १ करोड २३ लाख १४ हजार ४ सय ६४ रूपैयाँ छ। भन्सार ८० प्रतिशतमा छुटपछि ४० प्रतिशत लाग्दा ४९ लाख २५ हजार ७ सय ८६ रूपैयाँ हुन्छ। अन्तःशुल्क छुट सरकारले हटाएको र यो कार २ हजार सिसीसम्मको भएकाले लाग्ने ६० प्रतिशत अन्तःशुल्क हो।
मन्त्रिपरिषदले गरेको निर्णयअनुसार राजपत्रमा प्रकाशित सूचना (बाँया) र आर्थिक ऐनको व्यवस्था।
खरिद मूल्य र भन्सार शुल्कपछिको मूल्य १ करोड ७२ लाख ४० हजार ३ सय ३२ रूपैयाँमा ६० प्रतिशत अन्तःशुल्क लगाउँदा १ करोड ३ लाख ४४ हजार १ सय ९९ रूपैयाँ थपिन्छ। अन्तःशुल्कपछिको मूल्य २ करोड ७५ लाख ८४ हजार ५ सय ३१ रूपैयाँमा १३ प्रतिशत भ्याट लगाउँदा ३५ लाख ८५ हजार ९ सय ८९ रूपैयाँ लाग्छ।
भ्याटपछिको कारको मूल्य ३ करोड ११ लाख ७० हजार ५ सय २० रूपैयाँ हुन्छ। यसमा सडक मर्मत शुल्क बापत ८ प्रतिशत लगाउँदा २४ लाख ९३ हजार ६ सय ४१ रूपैयाँ हुन्छ। सबै कर लगाउँदा यो कारको मूल्य ३ करोड ३६ लाख ६४ हजार १ सय ६१ रूपैयाँ हुन्छ।
यसअघि तिरेको र छुट हटेपछि तिरेको कर
- यसअघि तिरेको अन्तःशुल्क ५१ लाख ७२ हजार ७५ रूपैयाँ
- छुट हटेपछि तिरेको अन्तःशुल्क १ करोड ३ लाख ४४ हजार १ सय ९९ रूपैयाँ
- यसअघि तिरेको भ्याट २९ लाख १३ हजार ६ सय ६८ रूपैयाँ
- छुट हटेपछि तिरेको भ्याट ३५ लाख ८५ हजार ९ सय ८९ रूपैयाँ
- यसअघि तिरेको सडक मर्मत शुल्क २० लाख २६ हजार ७५ रूपैयाँ
- छुट हटेपछि तिरेको सडक मर्मत शुल्क २४ लाख ९३ हजार ६ सय ४१ रूपैया
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
