काठमाडौं– सनम शाक्य हत्याको अनुसन्धान गर्दा त्रिभुवन अन्तर्राष्ट्रिय विमानस्थलबाट लामो समयदेखि संगठित रुपमा हुँदै आएको सुन तस्करीको पर्दाफास हुँदै गएको छ। विमानस्थलका कर्मचारीसँग सेटिङ मिलाई एक समूहले कम्तिमा ५ वर्षदेखि विमानस्थलबाट सुन तस्करी गर्दै आएको खुलेको छ।
एयरलाइन्सका कर्मचारीहरुले भन्सारको बाटो प्रयोग नगरी सुन राखिएका लगेजहरु गोप्य बाटोबाट पास गर्दथे। यस्तो गतिविधिमा संलग्न थाई एयरलाइन्स र नेपाल एयरलाइन्सका ११ जना कर्मचारीलाई प्रहरीले पक्राउ गरिसकेको छ।
विमानस्थलबाटै सेटिङमा तस्करी भएको ३३ किलो सुन गायब भएपछि सो समूहमा एकाउन्टेन्टका रुपमा काम गर्ने सनम शाक्यको फागुन १८ गते मोरङमा हत्या भएको थियो। सो हत्याको अनुसन्धानमा प्रहरीले मुख्य नाइकेहरुलाई पक्राउ नगरेको भन्दै उजुरी परेपछि गृह मन्त्रालयले छानबिन गर्दा एयरपोर्टबाट ५ वर्षदेखि सो समूहले सुन तस्करी गर्दै आएको खुलेको छ।
‘सन् २०१३ देखि यसरी तस्करी हुँदै आएको देखिन्छ,’ अनुसन्धानमा आबद्ध एक प्रहरी अधिकारीले भने, ‘यसमा हाइप्रोफाइल कनेक्सन नहोला भन्न सकिन्न।’ गृह मन्त्रालयका सहसचिव ईश्वरचन्द्र पौडेलेको नेतृत्वमा छानबिन भइरहेको छ। घटनामा संलग्न २४ जनालाई जिल्ला प्रहरी कार्यालयले संगठित अपराध मुद्दामा कारबाही अघि बढाएको छ।
पक्राउ परेका राप्रपा प्रजातान्त्रिकका नेता भुजुङ गुरुङले तस्करीका लागि विमानस्थलमा सेटिङ मिलाएको स्रोत बताउँछ। एयरपोर्टका कर्मचारीलाई पैसा बाँड्ने जिम्मेवारी पनि उनकै थियो। तस्करीमा भारतका ठूला तस्करहरुसँग संलग्न थिए। त्यसरी तस्करी भएको ८० प्रतिशत भन्दा धेरै सुन भारत पुग्ने गर्थ्यो।
सुन तस्करीका लागि एयरलाइन्सका कर्मचारीले विमानस्थलका सबैजसो लोडर(ब्यागेज ओसार्ने) हरुसँग आफ्नो गिरोहमा आबद्ध गरेका थिए। हरेक हप्ताजसो उनीहरुले पैसा लिने गरेका थिए।
सुन राखिने झोलाको फोटो र संकेत उनीहरुलाई भाइबरमा आउने गर्थ्यो। सोही आधारमा ती झोला उनीहरुले छुट्टै राख्थे। विमानस्थलमा कार्यरत एयरलाइन्सका कर्मचारीले ती झोला आफूहरुको भएको भन्दै पास गराउँथे। यसरी हरेक दिनजसो विमानस्थलबाट सुन तस्करी हुने गरेको थियो।
सोही सूचना पाएपछि दुई साताअघि आयोजित कार्यक्रममा गृहमन्त्री रामबहादुर थापा वादलले विमानस्थलबाट टनका टन सुन तस्करी भइरहेको बताएका थिए।
सेटिङमा अनेक समूह
सनम शाक्य हत्या प्रकरणमा पक्राउ परेका आरके ज्वेलर्सका सञ्चालक राजेन्द्र शाक्य साढे ३३ किलो सुन तस्करी प्रकरणमा पनि पक्राउ परेका थिए। एयरपोर्टका प्रहरी तथा भन्सार कर्मचारीको मिलेमतोमा विमानस्थलबाट पास भएको साढे ३३ किलो सुन गत वर्ष २०७३ पुस २१ मा बरामद भएको थियो। सो सुन तस्करीमा शाक्यविरुद्ध समेत मुद्दा दायर भएको थियो। उनी धरौटीमै छुटेका थिए।
शाक्य हत्यामा जोडिएको ३३ किलो सुनमा पनि सोही समूह सक्रिय रहेको खुलेको छ। सो गिरोहका नाइके गोरे भनिने चूनामणि उप्रेती नै ३३ किलो सुन तस्करीका नाइके हुन्। जसले अपराध महाशाखाका प्रहरीलाई हात लिएर शाक्य हत्याको केस सेटल गर्न खोजेका थिए। उप्रेतीलाई जोगाउने गरी अनुसन्धान गरेको आरोपमा अपराध महाशाखाका एसएसपी विदेश लोहनीसहित तीन जनालाई त्यहाँबाट हटाइसकिएको छ।
अनुसन्धानमा आबद्ध प्रहरी अधिकारीका अनुसार एउटै समूहले सुन तस्करीका लागि विमानस्थलमा विभिन्न तहका व्यक्तिहरुसँग सेटिङ मिलाएको छ। गत वर्ष पक्राउ परेका भन्सारका कर्मचारी विभिन्न समूहमध्ये एउटा समूह मात्र थियो। त्यसकारण उनीहरुको धन्दा रोकिएन। विमानस्थमा उनीहरुको अन्य व्यक्तिसँग समेत सम्बन्ध भएको हुनसक्ने आशंका गरिएको छ।
दुई जनाको मृत्युले झन् रहस्यमय
गिरोहमा जोडिएका थप दुई जनाको मृत्युको घटना थप रहस्मय बन्दै गएको छ। पक्राउ परेका नेपाल एयरलाइन्सका लोडर प्रेमलाल चौधरीले शुक्रबार बिहान महानगरीय प्रहरी वृत्त अनामगनरको हिरासतमा आत्महत्या गरेका थिए।
माघ २२ गते थाई एयरलाइन्सका सिनियर टेक्निसियन सानु बनको रनवेमै गाडीको ठक्करबाट मृत्यु भएको थियो। त्यो दुर्घटना नभई आत्महत्या भएको आशंका गरिएको छ। बनको मृत्यु प्रकरणको पनि गृह मन्त्रालयको छानबिन समितिले थप अनुसन्धान अघि बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766740258.png)
-1764146706.png)
-1766648928.png)
-1763721444.png)
