एजेन्सी– अमेरिका, बेलायत र फ्रान्सले सिरियाको डोउमामा रासायनिक हतियार प्रयोग गरिएको भनी गरेको दाबीको जवाफ स्वरुप शनिबार बिहानैबाट हवाई कारबाही थालेका छन्।
अमेरिकी राष्ट्रपति डोनाल्ड ट्रम्पले सिरियाको रासायनिक भण्डारलाई केन्द्रित गरी हवाई कारबाही सुरु गरिएको आफ्नो सम्बोधनका क्रममा बताएका छन्।
यता, सिरियाली सरकारको पक्षधर रसियाले भने डोउमामा भएको आक्रमणलाई बढाइचढाइ गरेर अमेरिका र अन्य राष्ट्रले कारबाही सुरु गरेको र यसको जवाफ दिने प्रतिक्रिया दिएको छ।
आक्रमणको उद्देश्य के हो?
अमेरिकी राष्ट्रपति डोनाल्ड ट्रम्पले कारबाहीको प्रमुख ध्येय रासायनिक हतियारको उत्पादन, भण्डारण र प्रयोग रोक्नु भएको दाबी गरेका छन्।
यता, फ्रान्सले जारी गरेको विज्ञप्तिमा भने फ्रेन्च राष्ट्रपति इम्मानुअल म्याक्रोनले आफूहरुले समय–समयमा दोहोरिरहने रासायनिक हतियारको प्रयोगलाई सहन नसक्ने बताएका छन्। साथै, यसरी दोहोरिरहेको घटनाक्रम सिरियाली जनताका साथै आफ्नो सुरक्षालाई पनि चुनौती भएको दाबी गरेका छन्।
‘अप्रिल ७ मा दर्जनौं मानिस, महिला र बालबालिका डोउमामा रासायनिक हतियार प्रयोग गरी मारिएका छन्, जुन अन्तर्राष्ट्रिय कानुन विपरीत छ । फ्रान्सले २०१७ को मेमा बनाएको सन्तोषको सीमा नाघिएको छ,’ फ्रेन्च राष्ट्रपति म्याक्रोनले भनेका छन्।
कतिवटा मिसाइल हानिएका छन्?
अमेरिका र सम्बद्ध राष्ट्रले एक पटकको कारबाहीमा करिब १ सय वटा मिसाइल हानेका छन्, एक पेन्टागन अधिकारीलाई उदृत गर्दै अलजजिराले लेखेको छ।
अमेरिकी रक्षा मन्त्री जेम्स म्याटिस र मरिन जेनरल जोसेफ डुनफोर्डले रासायनिक हतियार केन्द्रलाई लक्षित गरी समुद्रका साथै हवाइ जहाजबाट मिसाइल हानिएको बताएका छन्। पेन्टागनले हानेको कतिवटा मिसाइल निशानामा पुगे भन्नेबारे केही खुलाइएको छैन।
यता, सिरियाली अधिकारीहरुले भने करिब ३० वटा मिसाइल हानिएको र ती मध्ये पनि करिब तीन चौथाई विफल पारिएको दाबी गरेका छन्।
‘हामीले ती मिसाइल विफल बनाएका छौं,’ एक सिरियाली अधिकारीले रोयर्टसलाई भने, ‘हामीले यसबारे रसियाबाट पहिले नै केही जानकारी पाइसकेका थियौं, त्यसैले हामीले आफ्ना सैन्य केन्द्रहरु खाली गराउन सफल भएका छौं।’
कस्ता प्रकारका मिसाइल प्रयोग भएका छन्?
अमेरिकाले तोमहक् क्रियुज मिसाइल प्रयोग गरेको र ती मिसाइलले सिरियामा रहेका विभिन्न क्षेत्रलाई निशाना बनाई प्रक्षेपण गरिएको एक अमेरिकी अधिकारीले अलजजिरालाई बताए।
गत वर्ष मात्रै पनि अमेरिकाले सिरियाको खान सेइकुउन सहरमा रासायनिक हतियार प्रयोग गरिएको भन्दै तोमहक् क्रियुज मिसाइल प्रयोग गरेको थियो। साथै, अमेरिकाले गल्फ राष्ट्रमा रहेका आफ्ना हवाइ अड्डाबाट पनि हवाई कारबाही गरेको अनुमान गरिएको छ।
निशानामा के?
वासिङ्टनका उच्च पदस्थ जेनरल, जोसेफ डुनफोर्डले ती कारबाही मुख्यतः ३ क्षेत्रलाई लक्षित गरी भइरहेको बताएका छन्।
दमास्कस नजिकै रहेको एक वैज्ञानिक अनुसन्धान केन्द्रलाई लक्षित गरी हवाई कारबाही गरिएको छ। उक्त अनुसन्धान केन्द्र रासायनिक हतियार उत्पादनमा प्रत्यक्ष संलग्न रहेको दाबी गरिएको छ। अर्को निशानामा होम्स नजिकै रहेको रासायनिक हतियारको भण्डार परेको छ।
‘हामीले यी क्षेत्रलाई रसियाली फौजको संलग्नतालाई रोक्नका लागि मध्यनजर गर्दै निशाना बनाएका हौं,’ डुनफोर्डले मिडिया ब्रिफिङ्मा भने। साथै, अमेरिकाले हवाई कारबाहीका लागि प्रयोग गरिने हवाइ क्षेत्रबारे रसियालाई जानकारी गराएको भए पनि यसबारे पूर्व जानकारी भने नदिइएको प्रस्ट पारेका छन्।
रसियाको प्रतिक्रिया?
अमेरिका सहितका राष्ट्रले सिरियामा हवाई कारबाही थालेपछि अमेरिकाका लागि रसियन राजदूतले ती कारबाहीको जवाफ आफूहरुले दिने चेतावनी दिएका छन्। साथै, उनले रसियन राष्ट्रपतिको बेइज्जति असह्य हुने पनि प्रस्ट पारेका छन्।
‘एक नियोजित र प्रयोजित योजना अनुरुप घटना अघि बढिरहेका छन्,’ रसियन राजदूत एन्टोली एन्टोनोभले ट्विट गरेका छन्, ‘हामीलाई फेरि पनि धम्काइएको छ, हामीले चेतावनी दिइसकेका छौं कि यस प्रकारका कार्यहरुको जवाफ पक्कै पनि दिनेछौं।’
उनले ट्विटमा भनेका छन्, ‘रसियन राष्ट्रपतिको अपमान स्वीकार्य हुन सक्दैन र क्षमायोग्य छैन। अमेरिका जोसँग सबैभन्दा धेरै रासायनिक हतियार छ, उसले नै अन्य राष्ट्रलाई दोष दिनु उपयुक्त छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
