काठमाडौं- प्रधानमन्त्री निवास बालुवाटारमा बसेको मन्त्रिपरिषद बैठकले भारतले मिचेको भूमि कालापानी लिम्पियाधुरासहितको नक्सा सार्वजनिक गर्ने निर्णय गरेको छ। सोमबार बसेको मन्त्रिपरिषद् बैठकले यस्तो निर्णय गरेको हो।
साँझ ५ बजे सुरु भएको बैठकमा भूमि व्यवस्था मन्त्रालयले प्रस्ताव पेस गरेको थियो। भारतले गत कार्तिकका नेपाली भूमि मिचिएको राजनीतिक नक्सा सार्वजनिक गरेपछि नेपालले समेत आफ्नो नक्सा सार्वजनिक गर्न दबाब बढेको थियो। यसअघि भूमि व्यवस्था मन्त्रालयले स्रोतले नेपालको नक्सा सार्वजनिक गर्ने प्रस्ताव अघि बढेको जानकारी गराएको थियो।
पछिल्लो समय भारतले नेपाली भूमि हुँदै सडक निर्माण गरेपछि नेपालको नक्सा सार्वजनिक गर्न सरकारलाई चौतर्फी दबाब बढेको थियो। इतिहासविद्, भूगर्भविद्, सीमाविद्ले भारतले मिचेको जग्गा नेपाली नै भएको तथ्य प्रस्तुत गर्दै आएका छन्।
सरकारले संसद्मा प्रस्तुत गरेको नीति तथा कार्यक्रममा मिचिएका नेपाली भूभागसहितको नेपालको नक्सा सार्वजनिक गर्ने विषय समावेश थियाे। संसदीय समितिहरूले पनि सबै नेपाली भूभाग समेटेकाे नक्सा छाप्न पटकपटक निर्देशन दिएका थिए। संसदकाे अन्तराष्ट्रिय श्रम सम्बन्ध समिति र राज्य व्यवस्था समितिले यस्ताे निर्देशन दिएका थिए। सत्तारुढ दल नेपाल कम्युनिस्ट पार्टी सचिवालय बैठकले पनि ती भूभागसहितको नक्सा सार्वजनिक गर्न सुझाव दिएकाे थियो।
मन्त्रिपरिषद् बैठकले भारतले मिचेका भूमिसहितको नक्सा सार्वजनिक गर्ने निर्णयप्रति लक्षित गर्दै संस्कृति पर्यटन तथा नागरिक उड्डयनमन्त्री योगेश भट्टराईले प्रधानमन्त्रीलाई धन्यवाद ज्ञापन गरेका छन्। 'आज नेपाल सरकारको मन्त्रिपरिषदको निर्णय इतिहासको पन्नामा सुवर्ण अक्षरले त लेखिने नै छ। आजको मिति र निर्णय युगयुगसम्म हाजिरीजवाफमा सोधिने प्रश्नका रुपमा पनि अमर भईरहने छ। धन्यवाद प्रम केपी शर्मा ओली!,' ट्विट गर्दै उनले लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1749826086.png)
