रोल्पा- रोल्पाको त्रिवेणी गाउँपालिकाका आमाहरु दिनहुँ दाउरा बाेकेर नजिकको क्वारेन्टाइन जान्छन्। उनीहरु क्वारेन्टाइनमा तरकारी, खाद्यान्न र अन्य व्यवस्थापनको पाटो कस्तो छ बुझ्छन् अनि घर फर्कन्छन्। त्रिवेणीका आमा समूहमात्र हैन, वन समूह, सहकारी संस्था, कृषक समूह र युवा क्लबहरुको पनि यस्तै जिम्मेवारी तोकिएको छ।
काेराेना भाइरस (कोभिड- १९)को त्रास बढेसँगै यसको नियन्त्रण र रोकथामका लागि गाउँपालिकाले जिल्ला बाहिरबाट आउनेहरुलाई क्वारेन्टाइन राख्न सुरु गरेसँगै यहाँका आमा समूह, वन समूह, कृषि समूहलगायत अन्य सामुदायिक संस्थाहरु क्वारेन्टाइन व्यवस्थापनमा सक्रिय भएका हुन्। गाउँपालिकाले क्वारेन्टाइन व्यवस्थापन र संचालनमा स्थानीयहरुको नेतृत्वसहितको सामुदायिक अभ्यासको थालनी गरेसँगै सामुदायमा रहेका साना ठूला संस्थाहरु सक्रिय भएका हुन्।
ती सामुदायिक संस्थाहरुले गाउँपालिकालाई खाद्यान्न तथा नगद सहयोग पनि गर्दै आएका छन्। हालसम्म गाउँपालिकाभित्रका सामुदायिक वनबाट लाखौं रुपैयाँको चामल, दाल, साबुन र मास्क प्राप्त भएको छ। यसैगरी आमा समूहहरुले समेत दाउरा, तरकारी सहयोग गरेका छन्। गाउँपालिकाका अध्यक्ष शान्तकुमार वलीले सामुदायिक संस्थाका साथै गाउँपालिकाभित्रका अन्य सरोकारवालाहरुले समेत आर्थिक र भौतिक सहयोग गरिरहेकाे जानकारी दिए। गाउँपालिकालाई घोराही सिमेन्ट प्रालिबाट २२ क्विन्टल चामल, रोल्पा सिमेन्ट प्रालिबाट १ लाख नगद र सन्त निरंकारी मण्डल जुगारबाट ४५ हजार ५०० रुपैयाँ सहयाेग प्राप्त भएको अध्यक्ष वलीले बताए।
जिल्ला बाहिर गएकाहरु भित्रने क्रम बढेसँगै गाउँपालिकाले सामुदायिक क्वारेन्टाइनको अवधारणा अघि सारेको हो। सामुदायिक क्वारेन्टाइनको अवधारणासँगै सामुदायिक वन उपभोक्ता समूह, कृषि समूह, आमा समूह र सहकारी संस्था एवं गाउँपालिकाका अन्य सरोकारवालाहरुले सहयोग गर्न थालेको गाउँपालिका अध्यक्ष वलीको भनाई छ। गाउँपालिकाले सामुदायिक संस्थाहरुको सहयोगमा क्वारेन्टाइन संचालन गर्ने अवधारणा ल्याएसँगै सहयोगको मात्रा पनि बढ्न थालेको हाे।
नुवागाउँमा रहेको साना किसान सहकारी संस्थाले २५ हजार रुपैयाँ बराबरकाे खाद्यान्न र ४ हजार बराबरकाे तरकारी सहयोग गरेको छ। सल्लेरी भित्ता सामुदायिक वन उपभोक्ता समूहले १५ हजार बराबरकाे सामान, चंगाई प्रशंसा मण्डलीले १० बाेरा चामल, दिव्यविम्ब ल्यांग्वेज सेन्टरले १५ क्विन्टल बन्दागोभी उपलब्ध गराएको त्रिवेणी गाउँपालिका २ का वडा सदस्य धनबहादुर बस्नेतले जानकारी दिए। यसैगरी ज्याडखोला सामुदायिक वन उपभोक्ता समूहले क्वारेन्टाइनको सामान खरिदका लागि १४ हजार १ सय रुपैयाँ र गाउपालिकाको कोरोना कोषमा चौतिस हजार ५ सय रुपैयाँ उपलब्ध गराएको सदस्य बस्नेतले जानकारी दिए।
गाउँपालिकाले क्वारेन्टाइनमा बस्नेहरुका लागि दैनिक प्रतिव्यक्ति रु १०० का दरले रासन दिने गरेको छ। क्वारेन्टाइनका लागि आमा समूहले तरकारी, वन समुहले दाउरा उपलब्ध गराउँदै आएकाे गाउँपालिका अध्यक्ष वलीले बताए।
रोजगारीका लागि जिल्ला बाहिर गएकाहरु भित्रने क्रम बढेसँगै त्रिवेणाी गाउँपालिकाभित्रका विद्यालय र सामुदायिक भवनहरु टनाटन भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749277953.jpg)
-1764146706.png)
