नयाँ दिल्ली– भारतमा विद्यालयको बस दुर्घटनामा परी कम्तीमा ३० जनाको मृत्यु भएको भोलिपल्ट अर्को एक दुःखद ट्रक दुर्घटना भएको छ।
मंगलबार बिहान भएको दुर्घटनामा परी कम्तीमा १८ जनाको मृत्यु भएको छ भने १५ जना घाइते भएका छन्। सडकको डिभाइडरमा ठोक्किएर दुर्घटना हुँदा ट्रकमा रहेका मजदुरहरुको मृत्यु भएको अधिकारीहरुले जनाएका छन्।
भारतको महाराष्ट्र राज्यको पुने–सतरा राजमार्गमा पर्ने खान्डाला भन्ने ठाउँमा ट्रक दुर्घटना भएको जनाइएको छ। घटनास्थल महाराष्ट्र प्रदेशको राजधानी मुम्बईदेखि ८१ किलोमिटर पूर्वतर्फ पर्छ।
‘सामान बोक्ने एउटा ट्रकले ४० जना मजदुरलाई बोकेर ल्याइरहेको थियो। त्यो ट्रक आज बिहान खान्डाला भन्ने ठाउँमा दुर्घटनामा परेको छ’, पुनेका एक प्रहरी अधिकारीले बताए। उनले थप स्पष्ट पार्दै भने, ‘ट्रक दुर्घटनामा परी १८ जनाको मृत्यु भएको छ भने अन्य १५ जना घाइते भएका छन्।’
अधिकारीहरुका अनुसार दुर्घटनामा परेका ती मजदुरहरु ट्रकमा चढेर कर्नाटक राज्यबाट दैनिक मजदुरीका लागि कार्यस्थलतर्फ जाँदै गरेका थिए। घाइतेहरु सबैलाई स्थानीय सतरा नागरिक अस्पतालमा भर्ना गरिएको छ। उपचार भइरहेका घाइतेमध्ये ७ जनाको अवस्था गम्भीर रहेको अस्पतालका अधिकारीहरुको भनाइ छ।
घटनास्थलमा पुगेर प्रहरीले उनीहरुलाई उद्धार गरेर अस्पताल पुर्याएको थियो। प्रहरीले घटनाका बारेमा अनुसन्धान सुरु गरिसकिएको र दोषीलाई कारबाही गरिने जनाएको छ। प्रारम्भिक विवरणहरुका अनुसार चालकले नियन्त्रण गुमाएकाले ट्रक डिभाइडरमा ठोक्किएर दुर्घटना भएको बताइएको छ।
यसअघि सोमबार मात्रै हिमाञ्चल प्रदेशमा भएको विद्यालय बस दुर्घटनामा परी ३० जनाको मृत्यु भएको थियो भने २७ जना घाइते भएका थिए।
मृत्यु हुने र घाइते हुनेहरुमध्ये अधिकांश १० वर्ष मुनिका बालबालिका रहेका बताइएको छ।
काँगडा जिल्लाको नुरपुरस्थित वजिर रामसिंह पठनीय मेमोरियल स्कूलका झण्डै ४० जना विद्यार्थी लिएर गइरहेको बस दुर्घटना भएको हो। बस सडकबाट झण्डै २ सय फिट तल गहिरो खोँचमा खसेको थियो। बस दुर्घटनामा परी मृत्यु भएकामध्ये २७ जना विद्यार्थी, २ जना शिक्षक र बस चालक रहेका छन्।
भारत संसारमै सबैभन्दा बढी सडक दुर्घटना हुने मुलुकमध्येमा पर्छ। चालकको लापरवाही तथा सडक र सवारी साधन राम्रोसँग मर्मत नगरिँदा अधिकांश दुर्घटना हुने गरेको अधिकारीहरुको भनाइ छ । रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791596882.png)
-1786602170.png)
-1791562069.png)
