काठमाडौं- स्पेनिस क्लब रियल मड्रिडका खेलाडीहरु १० प्रतिशत तलब कम लिन तयार भएका छन्। कोरोना भाइरस (कोभिड १९) का कारण क्लबमा परिरहेको आर्थिक संकटका कारण खेलाडीहरुले कम तलब लिएर सहयोग गरिरहेका हुन्।
गएको हप्ता नै बार्सिलोना र एथ्लेटिको मड्रिडका खेलाडीहरु ७० प्रतिशत तलब कम लिन तयार भएका थिए। रियल मड्रिडमा भने तलब कम गर्ने विषयमा लामो छलफल चलेको थियो। जसबाट अहिले १० प्रतिशत तलब कम गर्ने र सिजन नसकिए २० प्रतिशत कम गर्ने सहमति भएको हो।
क्लबका जनरल निर्देशक एन्जेल सान्चेजले तलब कम गर्ने विषयमा खेलाडीहरुसँग कुराकानी गरेका थिए। गएको शुक्रबारदेखि भएको छलफलमा अहिले आएर मात्र सहमति जुटेको हो। यो सिजनका खेल यत्तिकै सकिएमा एक सय मिलियन युरोसम्म बचत गर्नुपर्ने र सिजन सुरु हुन सकेमा ५० मिलियन युरो जोगाउनुपर्ने गरी क्लबले प्रस्ताव गरेको थियो।
रियल मड्रिड अध्यक्ष फ्लोरेन्टिनो पेरेज र कप्तान सर्जियो रामोससहित भएको छलफलमा अरु खेलाडीको राय कप्तानमार्फत बुझिएको थियो। जसमा केही खेलाडीहरु पाँच प्रतिशत तलब कम गर्नुपर्ने बताइरहेका थिए। जसले गर्दा रामोससँगै प्रशिक्षक जिनेदिने जिदानले १० प्रतिशत तलब कम गर्नेमा नै जोड दिँदा सहमति हुन सक्यो।
कोरोना भाइरस (कोभिड १९) कारण ठप्प रहेको फुटबल गतिविधिका कारण युरोपभर नै क्लबहरु आर्थिक संकटमा परिरहेका छन्। जसले खेलाडीको तलब कम गर्नेदेखि कर्मचारी बिदा गर्नेसम्मका निर्णय भइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
