मिर्गौला प्रत्यारोपणपछि त्रिवि शिक्षण अस्पतालमा स्वास्थ्य लाभ गरिरहेका प्रधानमन्त्री केपी शर्मा ओलीको स्वास्थ्यमा सन्तोषजनक सुधार भएको छ।
त्रिवि शिक्षण अस्पतालले छैटौं दिनको पछिल्लो विवरण उपलब्ध गराउँदै प्रधानमन्त्रीको स्वास्थ्यमा क्रमिक सुधार भएको उल्लेख गरेको छ। त्यस्तै हिँडडुल र व्यायमलाई पनि निरन्तरता दिइएको बताइएको छ । उनलाई मिर्गौला दान गर्ने समीक्षा संग्रौलाको स्वास्थ पनि राम्रो भएको उल्लेख छ।
ओलीको गत बुधबार मिर्गौला प्रत्यारोपण भएको थियो।
मिर्गौला प्रत्यारोपण गरेका व्यक्तिको ब्लड प्रेसर‚ सुगरको मात्रा‚ पिशाबको रिपोर्टलगायतका विवरण महत्त्वपूर्ण हुन्छ। शिक्षण अस्पतालले प्रधानमन्त्री ओलीबारे सार्वजनिक गर्ने स्वास्थ्य बुलेटिनमा यी कुनै विवरण सार्वजनिक गरिएको छैन। विज्ञप्तिमा सँधै स्वास्थ्य सुधारोन्मुख रहेको अमूर्त शब्द राखेर टार्ने काम भइरहेको देखिन्छ।
विश्वासको संकटले एकपछि अर्को पार्टीमा सामूहिक नेतृत्व
सत्तारुढ नेपाल कम्युनिस्ट पार्टी, राष्ट्रिय जनता पार्टी र संघीय समाजवादी पार्टीले सामूहिक नेतृत्वको अभ्यास गर्दै आएका छन्। पछिल्लो सयम राष्ट्रिय प्रजातन्त्र पार्टीमा पनि यही अभ्यास गरिने भएको छ। तर सामूहिक अध्यक्षात्मक प्रणालीको अभ्यासमा पुगेको विवेकशील साझा पार्टीले भने फुटको नै सामना गर्नुपरेको थियो।
नेताहरूबीच विश्वासको संकट परेकाले सामूहिक नेतृत्व अभ्यासमा आएको राजनीतिक विश्लेषकले बताउँदै आएका छन्। तर आफूहरूमा विश्वासको संकट देखा नपर्ने सामूहिक नेतृत्व नै अभ्यास गर्न लागेको राप्रपाका अध्यक्ष कमल थापाले दाबी गरेका छन्। अन्य पार्टीमा भएका कमीकमजोरीबाट पाठ सिक्दै स्पष्ट कार्यविधि बनाएर सामूहिक नेतृत्वको अभ्यास राप्रपाले गर्ने अध्यक्ष थापाको दाबी छ।
‘हामीले अर्को महाधिवेसन नगर्दासम्म तीन जना अध्यक्षले पालैपालो चक्रीय प्रणालीबाट अध्यक्ष चलाउने छौं,' थापाले भने, ‘तीन जना अध्यक्षको पार्टीमा बराबर अधिकार र हैसियत हुने गरी कार्यविधि बनाएर पालना गर्छौं।’
राप्रपामा तीन जनाको सामूहिक नेतृत्व भन्ने गरिए पनि अन्य पार्टीको जस्तो खटपट र अविश्वास नहुने थापाले दाबी गरे। तर, राजनीतिक विश्लेषक कृष्ण खनालले पार्टीहरूले अभ्यास गर्दै आएको सामूहिक नेतृत्वलाई पार्टीको नेतृत्व नै भन्न नमिल्ने टिप्पणी गरेका छन्। ‘पार्टीहरूमा यति धेरै भद्रगोल भइसक्यो कि भनीसाध्य छैन। मान्छेलाई एक-एक गरी टपक्क टिपेर ल्याउँदैमा नेतृत्व हुँदैन,’ खनालले स्पष्ट पार्दै भने, ‘पार्टीले गर्ने यस्तो अभ्यासलाई नेतृत्व वा सामूहिक नेतृत्व दुवै भन्न मिल्दैन। टुक्राटाक्रीको बटुलबाटुल मात्रै हो।’
प्रधानन्यायाधीशलाई वडाध्यक्षको प्रश्न : करोड खाएर पोखरीको जग्गा व्यक्तिको नाममा गर्न मिल्छ?
जलेश्वर नगरपालिकाका वडा नम्वर १० का वडाध्यक्ष विकाउदास कथौबनिया विगत ३ वर्षदेखि यौटै मुद्दा बोकेर सर्वोच्च धाइरहेका छन्। राप्रपाबाट वडाअध्यक्ष निर्वाचित उनी जनप्रतिनिधि हुनुभन्दा अगाडिदेखि नै मुद्दासँग जोडिएको फाइल च्यापेर सर्वोच्च धाइरहेका थिए।
पछिल्लो समय ०७४ असोज २ मा भएको निर्वाचनमा उनी १० नम्बर वडाको अध्यक्ष चुनिए। त्यसपछि पनि मुद्दाको फाइल च्यापेर सर्वोच्च अदालत धाउने क्रम रोकिएको छैन।
तर उनी व्यक्तिगत मुद्दामामिलामा सर्वोच्च धाइरहेका होइन रहेछन्।
के को फाइल हो?
नेपाल लाइभकर्मीको जिज्ञासामा खुल्यो उनको फाइलमा रहेको कागजपत्र आफ्नै वडामा रहेको २ बिघामा फैलिएको सार्वजनिक पोखरीको किचलोको। सर्वोच्चको फैसलालाले पोखरीको जग्गा व्यक्तिको नाममा पुगेपछि उनी सार्वजनिक सम्पत्ति फर्काउन सर्वोच्चमै धाइरहेका थिए। मुद्दा जोडिएको थियो सर्वोच्च अदालतका बहालवाला प्रधानन्यायधीशसँग।
विश्व बजारमा तेलको मूल्यमा भारी गिरावट, सातापछि असर नेपालमा
विश्व बजारमा कच्चा तेलको मूल्य उच्च दरमा घट्न थालेको छ। साउदी अरेबिया र रसियाबीचको पेट्रोलियम पदार्थको मूल्यमा भएको युद्धले कच्चा तेलको मूल्य उच्च दरमा घट्न थालेको हो।
कोरोना भाइरसको बढ्दो संक्रमण र पेट्रोलियम पदार्थको मूल्यमा भएको गिरावटसँगै संसारका अधिकांश देशका पुँजी बजार सूचकांक पनि ओरालो लागेको छ। साउदी अरेबियाको तेल उत्पादन कटौतीको प्रस्ताव रसियाले अस्वीकार गरेपछि बढेको 'इगो'को परिमाणस्वरुप मूल्य घट्न थालेको हो।
तेल उत्पादक प्रमुख देशहरु साउदी अरेबिया र रसियाको युद्धले विश्व बजार नै प्रभावित बनेको हो। अयल प्राइस डटकमले विश्व बजारमा कच्चा तेलको मूल्य २५ प्रतिशतले घटेको जनाएको छ।
सोमबार बजारमा कच्चा तेलको मूल्य ४५ अमेरिकी डलरबाट कारोबार सुरु भएकोमा ३६ अमेरिकी डलरसम्म झरिसकेको छ। अमेरिकी बजारमा ३४ प्रतिशतले तेलको मूल्य घटेको छ। अमेरिकी बजारमा २७.३४ अमेरिकी डलर प्रतिब्यारेलमा झरेको तेलको मूल्य ४ वर्षयताकै न्यून हो।
महासंघको निर्वाचन सार्न ढकाल समूह किन सक्रिय?
नेपाल उद्योग वाणिज्य महासंघको आसन्न ५४औं साधारणसभाको चुनावी माहोल पेचिलो हुँदै गइरहेका बेला महाधिवेशन नै सार्ने खेल सुरु भएको छ। नयाँ नेतृत्व र पदाधिकारी चयन गर्ने सो महाधिवेशन कोरोना भाइरस संक्रमणको त्रास देखाउँदै सार्ने प्रपञ्च गर्न लागिएको हो। तर, कतिपय व्यवसायीहरुले भने महाधिवेशन पर सार्ने खेलको अन्तर्य अर्कै भएको टिप्पणी गर्न थालेका छन्।
‘कोरोना भाइरस त बहाना मात्र हो। यसको चुरो कुरो चाहिँ आफ्नो चुनावी जोडबल कमजोर हुँदै गएपछि चन्द्रप्रसाद ढकाल समूहले महाधिवेशन नै पर धकल्ने कुरा गर्न थालेको छ’, महासंघका एक पूर्वअध्यक्षले भने, ‘महाधिवेशन अलिक व्यवस्थित ढंगमा गर्न सकिन्छ।’ चैत २८ र २९ गतेका लागि तोकिएको महासंघको ५४ औं साधरणसभामा हुने नयाँ नेतृत्वको निर्वाचनमा वरिष्ठ उपाध्यक्ष पदमा आइएमआइ समूहका चन्द्रप्रसाद ढकाल र अर्का व्यवसायी किशोर प्रधानले आफ्नो उम्मेदवारी घोषणा गरेका छन्। सोही घोषणा अनुरुप उनीहरु आफ्नो चुनावी प्रचार–प्रसार र समिकरणमा लागिरहेका छन्।
महासंघको ५४औं साधरणसभापछि वर्तमान वरिष्ठ उपाध्यक्ष शेखर गोल्छा स्वतः अध्यक्ष हुने भएपछि वरिष्ठ उपाध्यक्ष पद स्वभाविक रुपमा आकर्षणको केन्द्र बनेको छ। ५४औं साधरण सभाबाट निर्वाचित वरिष्ठ उपाध्यक्ष अर्को ३ वर्षपछि स्वतः अध्यक्ष हुने महासंघको मौजुदा विधान छ।
यो पनि पढ्नुहोस्
भारतीय एस बैंकको घटनाबाट नेपालले के सिक्ने?
आक्रामकरूपमा व्यवसाय विस्तारको परिणाम सधैं राम्रो नहुने उदाहरण भारतको एस बैंक बनेको छ। बजार विस्तार गर्दै बजार हिस्सा वृद्धिको दौडमा एस बैंक पछारिएको छ।
बैंक तथा वित्तीय संस्था सञ्चालनको संवेदनशीलता नबुझी नाफा बढाउने र शेयर बजारमा मूल्य बढाउने नाममा हुने होडबाजीले दुर्घटना निम्त्याउने नेपाल राष्ट्र बैंकका पूर्व कार्यकारी निर्देशक नरबहादुर थापा बताउँछन्।
यदि नेपाली बैंकहरूले पनि भारतको एस बैंककै जस्तै व्यवसाय बढाउने नाममा जथाभावी लगानी गरे र सुशासन कायम गर्न सकेनन् भने ठूलो दुर्घटनामा पर्ने उनको टिप्पणी छ।
सेमिफाइनलमा थ्रीस्टार
थ्रीस्टार क्लब पोखरामा जारी आहा रारा गोल्डकप फुटबल प्रतियोगिताको सेमिफाइनलमा प्रवेश गरेको छ।
सोमबार पोखरा रंगशालामा भएको खेलमा सिक्किमको गान्तोक सिटीलाई ३–० गोल अन्तरले पराजित गर्दै थ्रीस्टार सेमिफाइनलमा पुगेको हो। थ्रीस्टारका लागि सुशन श्रेष्ठले दुई र संजोक राईले एक गोल गरे।
खेलको ७९ औं मिनेटमा संजोकले गोल गर्दै थ्रीस्टारलाई अग्रता दिलाएका थिए। खेलको अन्तिम समयसम्म एक गोलले पछि परेको गान्तोकले अतिरिक्त समयमा दुई गोल खान पुग्यो। अतिरिक्त समयमा दुबै गोल सुशनले गरे।
प्रतियोगिताको विजेता टिमले ट्रफिसहित १० लाख १ हजार र उपविजेताले ५ लाख १ हजार नगद पाउने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
