काठमाडौं- संघीय संसद्का दुवै सदनमा गरी ३६ वटा विधेयक विचाराधीन अवस्थामा रहेका छन्। तीमध्ये प्रतिनिधिसभाका विभिन्न विषयगत समितिमा मात्रै २४ वटा विधेयक छलफलका क्रममा छन्। संसद्को अधिवेशन अन्त्य भएपछि पनि सरकारले थप ६ वटा विधेयक दर्ता गराएको छ।
संघीय संसद् सचिवालयका अनुसार प्रतिनिधिसभाका समितिमा विचाराधीन विधेयकको सङ्ख्या २४ छ। राष्ट्रिय सभाका समितिमा भने कुनै पनि विधेयक विचाराधीन छैनन्। प्रतिनिधिसभाबाट पारित भएको राष्ट्रिय सेवा दल विधेयकको सन्देश राष्ट्रिय सभामा प्रस्तुत हुन बाँकी छ।
संसद् सचिवालयका प्रवक्ता एकराम गिरीका अनुसार प्रतिनिधिसभाका समितिमा अर्थसम्बन्धी केही नेपाल ऐन संशोधन तथा खारेज गर्ने विधेयक, राहदानी (पहिलो संशोधन) विधेयक, भुक्तानी तथा फर्छ्योटसम्बन्धी विधेयक, फोहोरमैला व्यवस्थापनसम्बन्धी विधेयक, चलचित्र विधेयक र खानी तथा खनिज पदार्थसम्बन्धी विधेयकलगायत विचाराधीन छन्।
कुन समितिमा कति विधेयक ?
प्रतिनिधिसभाका विषयगत समितिमध्ये शिक्षा, स्वास्थ्य तथा सूचना प्रविधि समितिमा सबैभन्दा बढी पाँचवटा विधेयक विचाराधीन छन्। अर्थ समितिमा चारवटा विधेयक छन्।
अन्तर्राष्ट्रिय सम्बन्ध र पर्यटन समिति, महिला तथा सामाजिक मामिला समिति र कानुन, न्याय तथा मानव अधिकार समितिमा तीन/तीनवटा विधेयक विचाराधीन छन्।
त्यस्तै, उद्योग तथा वाणिज्य र श्रम तथा उपभोक्ता हित समिति तथा राज्य व्यवस्था तथा सुशासन समितिमा दुई/दुईवटा विधेयक छन्। कृषि तथा प्राकृतिक स्रोत समितिमा एउटा विधेयक विचाराधीन रहेको संसद् सचिवालयले जनाएको छ।
अधिवेशन अन्त्यपछि पनि विधेयक दर्ता
संसद्को अधिवेशन अन्त्य भएपछि सरकारले थप छवटा विधेयक दर्ता गराएको छ। अधिवेशन अन्त्य हुने दिन संघीय निजामती सेवा विधेयक, २०८३ दर्ता भएको थियो। त्यसपछि दर्ता भएका नयाँ विधेयकको सङ्ख्या सात पुगेको छ।
थप दर्ता भएका विधेयकमा नेपाल नागरिक उड्डयन प्राधिकरण विधेयक, नेपाल हवाई सेवा प्राधिकरण विधेयक, सुशासन (व्यवस्थापन तथा सञ्चालन) (पहिलो संशोधन) विधेयक, भवन (दोस्रो संशोधन) विधेयक, राष्ट्रिय सडक सुरक्षा विधेयक र नवीकरणीय ऊर्जा तथा ऊर्जा दक्षतासम्बन्धी विधेयक छन्।
सरकारको सिफारिसमा राष्ट्रपति रामचन्द्र पौडेलले असोज १६ गते राति १२ बजेदेखि लागू हुने गरी संघीय संसद्को अधिवेशन अन्त्य गरेका थिए।
प्रतिवेदन तयार भएका विधेयक पनि टुङ्गिन बाँकी
संसद्मा विचाराधीन विधेयकमध्ये केही समितिमा छलफलका विभिन्न चरणमा छन् भने केहीको प्रतिवेदन तयार भइसकेको छ।
प्रवक्ता गिरीका अनुसार सभामा प्रस्तुत भएर मात्रै रहेको डिप्लोमा इन्जिनियरिङ परिषद् विधेयक पनि विचाराधीन छ।
संवैधानिक निकायका पदाधिकारीहरूको सेवा, सर्त र सुविधासम्बन्धी पहिलो संशोधन विधेयक, २०८३ माथि समितिले प्रतिवेदन तयार गरी सभामा पेस गरिसकेको छ। उक्त विधेयक सभामा विचाराधीन छ।
नेपाल राष्ट्र बैंक तेस्रो संशोधन विधेयकको समितिगत प्रतिवेदन तयार भएर संसद् सचिवालयमा प्राप्त भएको छ।
संघीय संसद्का दुवै सदनबाट पारित भई राष्ट्रपतिबाट प्रमाणीकरण भएका विधेयकको सङ्ख्या १२ पुगेको छ। यसैगरी संसद्बाट छवटा सन्धि तथा महासन्धिसमेत पारित भइसकेका छन्।
दसैँपछि समितिमा छलफल अघि बढाइने
दसैँ बिदाअघि प्रतिनिधिसभाका विभिन्न समितिमा केही विधेयकमाथि दफावार छलफल भइरहेको थियो भने केहीमा सैद्धान्तिक छलफल सुरु भएको थियो।
संसद् सचिवालयका अनुसार बिदापछि विचाराधीन विधेयकलाई टुङ्गोमा पुर्याउने गरी समितिमा छलफल अघि बढाउने तयारी गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
