काठमाडौं- कोरोना कहर र कच्चा तेलको बिक्री मूल्यमा रुस र साउदी अरबबीच देखिएको ‘प्राइस वार’का कारण अन्तर्राष्ट्रिय बजारमा पेट्रोलियम पदार्थको मूल्यमा भारी गिरावट आएको छ।
अप्रशोधित कच्चा तेलको मूल्य घटेसँगै पेट्रोलियम पदार्थको मुल्य घट्न थालेपछि उपभोक्तालाई राहत मिलेको छ। अन्तर्राष्ट्रिय बजारमा पेट्रोलियम पदार्थको मूल्य असर तत्काल देखिएपनि नेपालमा भने १ हप्तापछि मात्रै देखिनेछ। नेपालले इन्डियन आयल कर्पोरेसन (आइओसी) सँग हरेक १५ दिनमा अन्तर्राष्ट्रिय बजार मूल्यलाई आधार मानी स्वचालित मूल्य प्रणालीअनुसार इन्धनको मुल्य निर्धारण गर्दै आएको छ।
फागुन १९ गतेमात्र नेपाल आयल निगमले पछिल्लो पटक आइओसीबाट मार्च १ मा पठाइएको नयाँ मुल्य प्राप्त भए बमोजिम हाललाई पेट्रोलियम पदार्थ र ग्याँसको मूल्य यथावत राखेको थियो।
त्यस्तै पेट्रोलियम पदार्थको स्वचालित मूल्य प्रणालीअनुसार गत फेब्रुअरी १६ मा पेट्रोलको मूल्य प्रतिलिटर १ सय १० रुपैयाँ रहेकोमा २ रुपैयाँ घटाएर १ सय ८ रुपैयाँ र डिजेल तथा मट्टितेलको मूल्य प्रतिलिटर ९९ रुपैयाँ रहेकोमा २ रुपैयाँ घटाएर ९७ रुपैयाँ पुर्याएको थियो। नेपालमा हाल यही मूल्य कायम भइरहेको छ।
हरेक १५ दिनमा हेरफेर हुने मूल्य प्रणाली पछिल्लो पटक फागुन १९ (मार्च १) मा भएकोमा अब नयाँ मूल्य तोक्नका लागि चैत ३ (मार्च १६) सम्म कुर्नुपर्नेछ।
कच्चा तेलको मूल्य घटेसँगै भारतीय बजारमा भने त्यसको असर देखिइसकेको छ। भारतको राजधानी दिल्लीमा सोमबार पेट्रोल प्रतिलिटर ७१ भारतीय रुपैयाँमा बिक्री भएको छ। जुन गत सेप्टेम्बरयताकै सबैभन्दा न्यून हो।
आइओसीले सोमबार सार्वजनिक गरेको मूल्यसूचीअनुसार सोमबार दिल्ली, कोलकत्ता, मुम्बई र चेन्नईमा पेट्रोलको मुल्य घटेर क्रमशः प्रतिलिटर भारु ७० रुपैयाँ ८३ पैसा, ७३ रुपैयाँ ५१ पैसा, ७६ रुपैयाँ ५३ पैसा, र ७३ रुपैयाँ ५८ पैसा पुगेको छ। त्यस्तै यी चार सहरमा डिजेलको भाउ प्रतिलिटर क्रमशः भारु ६३ रुपैयाँ ५१ पैसा, ६५ रुपैयाँ ८४ पैसा, ६६ रुपैयाँ ५० पैसा र ६७ रुपैयाँ १ पैसा पुगेको छ।
कच्चा तेलको बिक्री मुल्यमा साउदी अरब र रुसको प्राइस वारका कारण पनि अन्तर्राष्ट्रिय बजारमा कच्चा तेलको मूल्यमा कमी आएको हो। कच्चा तेलको मूल्य सोमबारमात्र ३१ प्रतिशतले घटेको छ। जुन अंकमा पछिल्ला दिनहरुको तुलनामा उच्च भएपनि यसलाई घट्दो मूल्यको निरन्तरताका रुपमा हेरिएको छ।
भारतीय संचार माध्यमहरुले अहिले पेट्रोलको मुल्य प्रतिलिटर ५० भारतीय रुपैयाँसम्म पुग्नसक्ने भन्दै समाचार सम्प्रेषण गरिरहेका छन्। इन्धनको मूल्य घटेसँगै आम उपभोक्तालाई प्रत्यक्ष फाइदा त पुग्ने छ नै ढुवानी खर्च कम, आयोजना लागत घट्नेजस्ता प्रभाव पनि देखिनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749797959.png)
-1749826086.png)
