काठमाडौं- राष्ट्रिय विपद् जोखिम न्यूनीकरण तथा व्यवस्थापन प्राधिकरणले बंगालको खाडीमा विकसित भइरहेको चक्रवात ‘अर्नब’ अति शक्तिशाली बन्न सक्ने भन्दै उच्च सतर्कता अपनाउन आग्रह गरेको छ।
नेपाल मौसम विज्ञान विभागले आज जारी गरेको पोस्ट मनसुनसम्बन्धी विशेष बुलेटिनअनुसार चक्रवात ‘अर्नब’ थप शक्तिशाली बन्दै गएको छ। उक्त चक्रवात आगामी कात्तिक ११ गते भारतको जमिनमा प्रवेश गर्ने सम्भावना रहेको र त्यसको प्रभाव नेपालमा कात्तिक १२ गते बिहीबार रातिदेखि देखिन सक्ने प्राधिकरणले जनाएको छ।
प्राधिकरणका अनुसार कात्तिक १३ गते शुक्रबार र १४ गते शनिबार कोसी, बागमती, मधेश, गण्डकी र लुम्बिनी प्रदेशमा चक्रवातको प्रभाव बढी पर्ने सम्भावना छ। ती प्रदेशका धेरै स्थानमा चट्याङ र हावाहुरीसहित मध्यम वर्षा तथा केही स्थानमा भारी वर्षा हुन सक्ने पूर्वानुमान गरिएको छ।
त्यस्तै, कर्णाली र सुदूरपश्चिम प्रदेशका केही स्थानमा चट्याङ र हावाहुरीसहित मध्यम वर्षा तथा एक-दुई स्थानमा भारी वर्षा हुन सक्ने जनाइएको छ। ती प्रदेशका उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको उच्च जोखिम रहेको प्राधिकरणले जनाएको छ।
सम्भावित जोखिम न्यूनीकरणका लागि प्राधिकरणले कात्तिक १२, १३ र १४ गते उच्च सतर्कता अपनाउन आग्रह गरेको छ। साथै, विपद् प्रतिकार्यका लागि पूर्वतयारी अवस्थामा रहन र सम्भावित जोखिमबाट बच्न आवश्यक उपाय अपनाउन सम्बन्धित निकायलाई आग्रह गरेको छ।
कृषि कार्यदेखि यात्रासम्म सतर्कता अपनाउन आग्रह
प्राधिकरणले चक्रवातको सम्भावित प्रभावलाई ध्यानमा राख्दै आठबुँदे सुझाव जारी गरेको छ।
प्राधिकरणले धानबाली काट्ने र भित्र्याउनेलगायत कृषि कार्य कात्तिक १२ गतेअघि नै सम्पन्न गर्न आग्रह गरेको छ। उच्च पहाडी तथा हिमाली क्षेत्रमा पर्यटकलाई नजान र गइसकेका पर्यटकलाई जोखिमको अवधिभर सुरक्षित स्थानमा बस्न पनि सुझाव दिएको छ।
मौसम प्रतिकूल भई जोखिम बढेमा आवश्यकताअनुसार सवारी आवागमन बन्द गर्न तथा त्यसबारे सर्वसाधारणलाई अग्रिम जानकारी गराउन प्राधिकरणले सम्बन्धित निकायलाई आग्रह गरेको छ। सडक तथा हवाई यातायातसहित दैनिक जनजीवन प्रभावित हुन सक्ने भएकाले अत्यावश्यक कामबाहेक यात्रा नगर्न पनि अनुरोध गरिएको छ।
त्यसैगरी, संघीय मन्त्रालय तथा निकाय, प्रदेश सरकार, स्थानीय तह, सुरक्षा निकाय र स्वयंसेवकलगायत सरोकारवाला सबैलाई सर्वसाधारणलाई जोखिमबारे जानकारी गराउन र प्रतिकार्यका लागि तयारी अवस्थामा रहन भनिएको छ।
जोखिमयुक्त स्थानमा बसोबास गर्ने व्यक्ति तथा परिवारलाई पूर्वसूचना र चेतावनीका आधारमा विपद् आउनुअघि नै सुरक्षित स्थानमा स्थानान्तरण गर्न पनि प्राधिकरणले आग्रह गरेको छ। मौसम विभाग र अन्य आधिकारिक निकायबाट जारी हुने अद्यावधिक पूर्वानुमान तथा पूर्वसूचना पालना गर्नसमेत अनुरोध गरिएको छ।
प्राधिकरणले मौसमसम्बन्धी जानकारीका लागि ११५५, विपद्का बेला मद्दत माग्न १२३४, १०० वा १११४ मा सम्पर्क गर्न सकिने जनाएको छ।
नदीमा जलसतह बढ्न सक्ने चेतावनी
चक्रवात ‘अर्नब’ को सम्भावित प्रभावका कारण कात्तिक ११ देखि १५ गतेसम्म नेपालका विभिन्न नदी तथा जलाधार क्षेत्रमा उल्लेख्य वर्षा हुन सक्ने प्राधिकरणले जनाएको छ।
विशेषगरी नारायणी, बागमती, कमला र कोसी नदीका जलाधार, उपजलाधार तथा आसपासका क्षेत्रमा वर्षा भई नदीको जलसतह बढ्न सक्ने अनुमान गरिएको छ।
यसलाई ध्यानमा राख्दै नदीतटीय तथा जोखिमयुक्त क्षेत्रमा बसोबास गर्ने नागरिकलाई सतर्क रहन र आधिकारिक निकायबाट जारी हुने सूचना तथा चेतावनी पालना गर्न आग्रह गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
