काठमाडौं– नेपाल उद्योग वाणिज्य महासंघको आसन्न ५४औं साधारणसभाको चुनावी माहोल पेचिलो हुँदै गइरहेका बेला महाधिवेशन नै सार्ने खेल सुरु भएको छ। नयाँ नेतृत्व र पदाधिकारी चयन गर्ने सो महाधिवेशन कोरोना भाइरस संक्रमणको त्रास देखाउँदै सार्ने प्रपञ्च गर्न लागिएको हो। तर, कतिपय व्यवसायीहरुले भने महाधिवेशन पर सार्ने खेलको अन्तर्य अर्कै भएको टिप्पणी गर्न थालेका छन्।
‘कोरोना भाइरस त बहाना मात्र हो। यसको चुरो कुरो चाहिँ आफ्नो चुनावी जोडबल कमजोर हुँदै गएपछि चन्द्रप्रसाद ढकाल समूहले महाधिवेशन नै पर धकल्ने कुरा गर्न थालेको छ’, महासंघका एक पूर्वअध्यक्षले भने, ‘महाधिवेशन अलिक व्यवस्थित ढंगमा गर्न सकिन्छ।’ चैत २८ र २९ गतेका लागि तोकिएको महासंघको ५४ औं साधरणसभामा हुने नयाँ नेतृत्वको निर्वाचनमा वरिष्ठ उपाध्यक्ष पदमा आइएमआइ समूहका चन्द्रप्रसाद ढकाल र अर्का व्यवसायी किशोर प्रधानले आफ्नो उम्मेदवारी घोषणा गरेका छन्। सोही घोषणा अनुरुप उनीहरु आफ्नो चुनावी प्रचार–प्रसार र समिकरणमा लागिरहेका छन्।
महासंघको ५४औं साधरणसभापछि वर्तमान वरिष्ठ उपाध्यक्ष शेखर गोल्छा स्वतः अध्यक्ष हुने भएपछि वरिष्ठ उपाध्यक्ष पद स्वभाविक रुपमा आकर्षणको केन्द्र बनेको छ। ५४औं साधरण सभाबाट निर्वाचित वरिष्ठ उपाध्यक्ष अर्को ३ वर्षपछि स्वतः अध्यक्ष हुने महासंघको मौजुदा विधान छ।
‘दुवै समूहले अहिले आफ्नो चुनावी गणितलाई लेखाजोखा गरिरहेका छन्, यसमा ढकालभन्दा प्रधान समूह बढी उत्साही भएको छ’, ती पूर्वअध्यक्षले भने, ‘वरिष्ठ उपाध्यक्षमा पराजय भएको अवस्थामा ६ वर्षसम्म महासंघको नेतृत्वमा आउन बाटो बन्द हुने भएपछि ढकाल समूहले साधरणसभा सार्ने चलखेल सुरु गरेको हो।’ तर, ढकालका प्रतिस्पर्धी किशोर प्रधानले भने तोकिएकै समयमा साधरणसभा हुनुपर्छ भन्दै आइरहेएका छन्। साधारणसभा सार्ने चलखेलबारे जानकार किशोर प्रधानले आफूलाई सघाइरहेका पूर्वअध्यक्ष र वर्तमान पदाधिकारीहरुलाई यसो नगर्न सुझाव दिइरहेका छन्।
उम्मेदवार प्रधानलाई भावी अध्यक्ष शेखर गोल्छा, पूर्वअध्यक्ष पशुपति मुरारका, कुशकुमार जोशी र विनोद श्रेष्ठको सहयोग छ भने चन्द्र ढकाललाई चण्डि ढकाललगायत अरु केही व्यवसायीहरुले साथ दिइरहेका छन्। ढकाल समूहले निर्वाचन सार्ने ‘लविङ’ गरे पनि महासंघ कार्यसमितिले भने निर्वाचनकै लागि भन्दै यसअघि नै चैत २८ र २९ गते ५४औं साधरणसभा गर्ने गरी निर्वाचन कमिटी गठन गरिसकेको छ।
महासंघकी अध्यक्ष भवानी राणाले पनि निर्वाचन सार्ने विषयमा अहिलेसम्म छलफल नभएको बताएकी छन्। ‘साधरणसभा सार्ने निर्णय म एक्लैले गर्न सक्दिन’, राणाले नेपाल लाइभसँगको टेलिफोन वार्तामा भनिन्,‘आजको दिनसम्म चैत २८ र २९ मै साधरण सभा गर्ने गरी तयारी भइरहेको छ। सबै व्यवसायीलाई सोही अनुसार नै सूचना पठाइएको छ।’
यता, ढकाल समूहले भने जसरी पनि निर्वाचन सार्नपर्ने निष्कर्ष निकाल्दै मिडियाबाजी गर्न थालेको आरोप प्रधान समूहले लगाएको छ। कोरोनालाई बहानाबाजी बनाउँदै चुनाव सार्न भएको चलखेलको अन्तर्यमा ढकाल समूहले वस्तुगतमा उमेशलाल श्रेष्ठ बाहेक अरु उमेदवारर पनि पाउन नसक्नु रहेको बुझाइ केही व्यवसायीहरुको छ। जसका कारण पनि ढकाल समूह साधरण सभा सार्ने खेलमा लागेको महासंघका एक सदस्यले बताए।
किशोर प्रधानको टिमबाट एसोसिएटमा सौरभ ज्योती, वस्तुगतमा अञ्जन श्रेष्ठ र जिल्ला नगरतर्फ दिनेश श्रेष्ठले उपाध्यक्षमा उमेदवारी घोषणा गरिसकेको छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749953645.jpg)
-1749801778.jpg)
-1749797959.png)
-1749826086.png)
