क्यानवेरा– गत वर्ष विदेश निर्यातका क्रममा हजारौँको संख्यामा भेडाको मृत्यु भएपछि अष्ट्रेलियाली सरकारले छानबिन गर्ने जनाएको छ। अष्ट्रेलियाको पर्थबाट मध्यपूर्वका ३ वटा राष्ट्रहरुमा केहि महिनाअघि मात्रै भेडा निर्यात गर्दा अत्याधिक गर्मीका कारण एकै पटकमा २ हजार ४ सयभन्दा बढी भेडाको मृत्यु भएको थियो।
पशु अधिकारका लागि काम गर्दै आएको एक समूहले पठाएको पशु निर्यातसम्बन्धि भिडियो हेरेपछि अष्ट्रेलियाली सरकारका एक मन्त्रीले आफु चकित तथा विक्षिप्त बनेको प्रतिक्रिया दिएका थिए।
आज मात्रै क्यानवेराले पशु अधिकारकर्मीहरुको उचित मागको सुनुवाइ नभए निर्यातका लागि तयार आगामि जहाजहरु सञ्चालनमा रोक लगाउने चेतावनी दिएको छ। सरकारले एक विज्ञप्ति जारी गर्दै भनेको छ–‘गत अगस्टमा निर्यातका लागि लगिएका ६३ हजार ८ सय भेडामध्ये ३ दशमलब ७६ प्रतिशत भेडाको मृत्यु भएको छ। हामीलाई लाग्छ कि भेडाको मृत्यु् हुने दर २ प्रतिशतभन्दा माथि जानु गम्भीर समस्या हो। त्यसकारण यसको औपचारिक छानबिन हुनेछ।’
कतार, कुवेत तथा युएईजस्ता देशहरुमा तापक्रममा आउने वृद्धि भेडाहरुको अनुकुल नहुने भएकोले धेरै भेडाको मृत्यु हुने गरेको सरकारले प्रारम्भिक अनुमान गरेको छ।
अष्ट्रेलियाका कृषि मन्त्री डेभिड लिटलप्राउडले भेडा निर्यात गर्ने उद्योगहरुले स्थायी र उचित किसिमको प्रक्रिया अवलम्बन गर्नुपर्ने बताए। उनले ‘अष्टे्रलियन ब्रोडकास्टिङ कर्पोरेशन’सँगको कुराकानीमा भने, ‘उनीहरुको जहाजमा भएका भेडाहरु अष्ट्रेलियाली किसानका लागि जिवननिर्वाहको स्रोत हुन्।’
उनले ‘एनिमल्स् अष्ट्रेलिया’ले उपलब्ध गराएको भिडियो फुटेजको बारेमा भने अन्य जानकारी दिन चाहेनन्। उनले गलत काम गर्ने उद्योग तथा व्यापारीलाई कारबाही गर्ने समेत जनाए।
पशुअधिकारकर्मीहरुले भने पशुहरुको अधिकार हनन भएको भन्दै सो कार्य बन्द गर्न माग गरेका थिए। यसअघि निर्यातका क्रममा पशुहरुलाई गलत व्यवहार गरिएको भिडियो सार्वजनिक भएपछि सन् २०११ मा ६ महिनाका लागि इन्डोनेसियामा पशु निर्यात गर्न रोक लगाइएको थियो।
सरकारले पशुहरुको लागि सहज तथा उचित उपाय नअपनाइएको खण्डमा आगामि सोमबार पर्थबाट हुने ६५ हजार भेडाको निर्यात समेत रोक्ने सरकारले जनाएको छ। सरकारले प्रत्येक पटकको निर्यातमा भेडाको संख्यामा १५ प्रतिशतले कटौती गर्न, ढुवानीका गर्दा स्वतन्त्र पर्यवेक्षक खटाउन तथा यात्राका क्रममा प्रत्येक दिनको फोटो पठाउनसमेत निर्देशन दिएको छ।
अष्ट्रेलियाली पशु ढुवानी संघले पशुहरुको अधिकारको सम्मानका लागि आफुहरु प्रतिवद्ध रहेको र निर्यात कार्यमा अझै सुधार ल्याउने प्रतिवद्धता जनाएको छ। संघले भने गत वर्ष १ दशमलब ७४ मिलियन भेडाको निर्यात गर्दा १२ हजार ४ सय मात्र मरेको दावी गरेको छ। जुन कुल भेडाको शुन्य दशमलब ७१ प्रतिशत मात्र हुन आउँछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
