बिहीबार नेपाल लाइभमा प्रकाशित मुख्य समाचारहरू
पार्टी ठेकेदारका हातमा गएको चिन्ता
नेकपाका केही केन्द्रीय सदस्यहरूले पार्टी ठेकेदारको हातमा पुगेकोमा चिन्ता व्यक्त गरेका छन्। छलफलका क्रममा महंगो हुँदै गएको निर्वाचन प्रणालीले पार्टीलाई ठेकेदारको हातमा पुर्याएको भन्दै केही केन्द्रीय सदस्यले चिन्ता व्यक्त गरेका हुन्।
समूह २ मा यस विषयमा धेरै चर्चा भएको नेकपा नेता कैलाश ढुंगेलले बताए। आफूले र केही अन्य नेताले छलफलमा बोलेको कुरा बताउँदै उनले भने, ‘निर्वाचन प्रणाली अलि सरल, अलि जनपक्षीय र अलि वर्गपक्षीय हुनुपर्छ। एउटा गाउँपालिकाको अध्यक्ष बन्न २–३ करोड खर्च गर्नुपर्ने अवस्था आएको छ। अब त त्यो खर्च धान्नका लागि ठूला–ठूला परियोजनाका ठेकेदार ल्याउनुपर्ने भयो।’
थप समाचार : नेकपा बैठक : ठेकेदारका हातमा पार्टी पुगेको भन्दै चिन्ता, सरकारको चर्को आलोचना
पर्यटन बोर्डका सिइओले सम्हाले कार्यभार
पर्यटन बोर्डका प्रमुख कार्यकारी अध्यक्ष (सिइओ) डा धनञ्जय रेग्मीले पदभार ग्रहण गरेका छन्।
नवनियुक्त बोर्डका सिइओ डा रेग्मीले बिहीबार पदभार ग्रहण गरेका हुन्।
रेग्मीलाई नेपाल पर्यटन बोर्डको सञ्चालक बोर्डले सिइओ नियुक्ति गर्ने निर्णय गरेको थियो।
मंगलबार नेपाल पर्यटन बोर्डमा बसेको सञ्चालक बोर्ड बैठकले डिसेम्बर २३ गतेदेखि रिक्त बोर्डको सिइओ पदमा उनलाई नियुक्ति गर्ने निर्णय गरेको थियो।
'नेपाल टु लेबनान' यात्रा बिग्रिएपछि हत्या
बंगलादेशबाट लेबनान जानका लागि ३ लाख टाँका दिएका एक बंगाली युवाले उनीसँगै नेपाल आएका साथीको हत्या गरेका छन्। आफूलाई लेबनान पठाउन आनाकानी गरेपछि उनले आक्रोशमा आएर आफ्नै साथीको हत्या गरेका हुन्।
बंगलादेशबाट लेबनानका लागि सहजै भिसा नलाग्ने भन्दै परवेजले मियालाई नेपालको बाटो हुँदै लेबनान पठाउने आश्वासन दिएका थिए।
तर बंगलादेशबाट नेपालसम्म आएपनि लेबनान जान पठाउन नसकेपछि उनले हत्या गरेका हुन्।
रोजगारीका खोजीमा रहेका दुला मियालाई मोहिउद्दिन अहमद परवेजको हत्या गरेका हुन्। परवेजले राम्रो काम र दाम हुने भन्दै लेबनान पठाउने भनी ३ लाख लिएका थिए। ‘लेबनान पठाउने भएपछि मैले परवेजलाई ३ लाख टाँका ३ वर्षअघि दिएको थिएँ,’ मियालाई उद्धृत गर्दै महानगरीय प्रहरी परिसर काठमाडौंका प्रवक्ता होबिन्द्र बोगटीले भने।
थप समाचार : एक बंगलादेशीको 'नेपाल टु लेबनान' यात्रा बिग्रिएपछि...
नेविसंघको नेतृत्वमा राजीव
नेपाली कांग्रेसले नेपाल विद्यार्थी संघको तीन सदस्यीय तदर्थ समिति गठन गरेको छ।
राजीव ढुंगाना अध्यक्ष रहेको कार्य समितिमा दुई जना महामन्त्री बनाइएको छ। मनोज वैद्य र महेश्वरी कुँवरलाई महामन्त्री बनाइएको छ।
तदर्थ समितिको अध्यक्ष बनाइएका ढुंगाना सुनसरी निवासी हुन्। महामन्त्री बनेका वैद्य काठमाडौंका हुन् भने र कुँवर पाल्पा निवासी हुन्।
६ महिनाभित्र नेपाल विद्यार्थी संघको आगामी १२औं केन्द्रीय अधिवेशन गर्न पार्टीले निर्देशन दिएको छ।
थप समाचार : लोकतान्त्रिक पार्टीको अलोकतान्त्रिक चरित्र : यता मनोनयन, उता आमरण अनशन
हाइप्रोफाइल मुद्दा तेस्रो पटक एउटै आदेश
सर्वोच्च अदालतले एक हाइप्रोफाइल मुद्दामा तेस्रो पटकसम्म एकै आदेशका शृंखलालाई निरन्तरता दिएको छ। अकुत सम्पत्ति आर्जन गरेको आरोपमा अख्तियार दुरुपयोग अनुसन्धान आयोगले आयल निगमका पूर्व प्रमुख युवराज शर्माविरुद्ध दायर गरेको मुद्दामा सर्वोच्चले यस्तो आदेश दिएको हो।
२०७२ जेठ १२ गते सर्वोच्चमा पुनरावेदन भएको यो मुद्दा सर्वोच्चको संयुक्त इजलासबाट फैसला भएको थियो। सर्वोच्चले शर्मालाई भ्रष्टाचारी ठहर गरेको थियो। त्यसविरुद्ध उनी पुनः सर्वोच्च आएका थिए।
यो मुद्दाको सुनुवाई २०७२ कात्तिक ८ गतेदेखि भएको थियो। लगातार स्थगित हुँदै लगभग एक वर्षपछि २०७३ फागुन २६ अन्तिम सुनुवाई शुरु भएको थियो। न्यायाधीशहरु हरिकृष्ण कार्की, आनन्दमोहन भट्टराई र अनिलकुमार सिन्हाको इजलासले पाँच महिना सुनुवाई गर्दै २०७४ साउन ५ गते अख्तियारसँग भएको फाइल मगाउने आदेश गरेको थियो।
त्यसपछि लगातार सुनुवाई स्थगित भएको मुद्दामा २०७५ फागुन २३ गते पुनः निर्णय मगाउने आदेश भएको थियो। अख्तियारले मुद्दा चलाउने भनी गरेको निर्णय पेस गर्न आनन्दमोहन भट्टराई, तेजबहादुर केसी र डम्बरबहादुर शाहीको इजलासले दोस्रो पटक निर्णय मगाउने आदेश जारी गरेको थियो। तेस्रो पटक बिहीबार न्यायाधीश मीरा खड्का, ईश्वर खतिवडा र शुष्मालता माथेमाको इजलासले पुनः सोही निर्णय मगाउने आदेश गरेको हो।
थप समाचार : भ्रष्टाचारका दर्जनौं मुद्दा रोक्ने 'हाइप्रोफाइल मुद्दा'मा तेस्रो पटक निर्णय झिकाउने आदेश
क्रिस गेलले पनि इपिएल खेल्ने, पोखरामा अनुबन्धित
वेष्ट इन्डिजका स्टार क्रिकेटर क्रिस गेल एभरेस्ट प्रिमियर लिग (इपिएल) क्रिकेट खेल्न नेपाल आउने भएका छन्। गेल पोखरा राइनोज टिममा ‘आइकनिक’खेलाडीका रुपमा अनुबन्ध भएको पोखरा राइनोजले जनाएको छ।
आउँदो चैत १ गतेदेखि १५ गतेसम्म सञ्चालन हुने इपिएल टी ट्वान्टी क्रिकेटका लागि गेल आउनाले युवा क्रिकेटरलाई थप मद्दत पुग्ने बताइएको छ। २०१६ मा वेस्ट इन्डिजबाट टी-ट्वान्टी विश्वकप क्रिकेटको उपाधि जितेका गेल अन्तर्राष्ट्रिय फ्रेन्चाइज टी ट्वान्टीमा पनि आक्रामक ब्याट्सम्यानका रुपमा चिनिन्छन्।
थप समाचार : क्रिस गेल भन्छन्- गेलको खेलका लागि तयार रहनु नेपाल
मालपोतका कार्यालय सहयोगीविरुद्ध ९ करोडको भ्रष्टाचार मुद्दा
अख्तियार दुरुपयोग अनुसन्धान आयोगले मालपोत कार्यालयका कार्यालय सहयोगीविरुद्ध करीब ९ करोड बिगो माग दाबी गर्दै मुद्दा दायर गरेको छ।
बिहीबार आयोगले कार्यालय सहयोगी राजेन्द्र बस्नेतविरुद्ध ८ करोड ९८ लाख ५८ हजार ६ सय १३ रुपैयाँ अकुत सम्पत्ति आर्जन गरेको भन्दै विशेष अदालतमा मुद्दा दायर गरेको हो।
अख्तियार दुरुपयोग अनुसन्धान आयोगले बस्नेतमाथि गरेको अनुसन्धानबाट उनले गैरकानुनी रुपमा सम्पत्ति आर्जन गरेको दाबी गरेको छ।
उनको वैध आय ७४ लाख ७३ हजार ३ सय ७३ रूपैयाँ हुनुपर्नेमा ८ करोड ९८ लाख ५८ हजार ६ सय १३ रुपैयाँ देखिएको अख्तियारले आरोपपत्रमा उल्लेख गरेको छ।
थप समाचार : कार्यालय सहयोगीद्वारा ९ करोड भ्रष्टाचार, सरकारी राजश्व सिधै परिवारको बैंक खातामा
नख्खु विस्फोटाका आरोपी निर्दोष ठहर
नेत्रविक्रम चन्द (विप्लव) नेतृत्वको नेपाल कम्युनिस्ट पार्टीका तत्कालीन ब्युरो इन्चार्ज माइला लामासहित ४ नेतालाई रिहा गर्न उच्च अदालतले आदेश दिएको छ।
उच्च अदालत पाटनले लामासँगै विप्लव नेकपाका केन्द्रीय सदस्य नवीन विश्वकर्मा, नेतृ धिरिन्द्रा उपाध्याय र ईश्वर परियारलाई रिहा गर्न आदेश गरेको हो।
उच्च अदालतका मुख्य न्यायाधीश नहकुल सुवेदी र न्यायाधीश श्रीकान्त पौडेलको इजलासले बिहीबार चारै नेतालाई निर्दोष ठहर गर्दै रिहा गर्न आदेश दिएको हो।
नख्खु बम बिस्फोटको आरोपमा पक्राउ परेका लामालाई गत साउन ७ गते जिल्ला अदालत ललितपुरले पुर्पक्षका लागि कारागार चलान गरेको थियो।
लामालाई महानगरीय प्रहरी अपराध महाशाखाको टोलीले काठमाडौंको काडाँघारीबाट मध्यरातमा पक्राउ गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
