नयाँ दिल्ली (एजेन्सी)- भारतीय कंग्रेसका अध्यक्ष राहुल गान्धी विरुद्ध दायर भएको पहिलो मानहानिको मुद्दा खारेज भएको छ।
प्रधानमन्त्री एवं भाजपाका अध्यक्ष नरेन्द्र मोदीप्रति अपमानजनक टिप्पणी गरेको भन्दै भाजपाका एक नेताले गान्धी विरुद्ध मानहानिको मुद्दा हालेका थिए। हमीपुरको जिल्ला अदालतमा गान्धी विरुद्ध दर्ता भएको निवेदन आइतबार खारेज भएको हो।
निवेदक अधिवक्ता अवध नरेशसिंहको बयान लिएपछि मुख्य न्यायिक दण्डाधिकारी(सिजेएम) विकास कुमारले निवेदन खारेज हुने निर्णय सुनाएका हुन्।
बयानमा गान्धीको टिप्पणीले कसैको अपमान गरेको खुल्न नसकेको उल्लेख छ। संविधानले सबैलाई वाक् स्वतन्त्रताको अधिकार दिएको र गान्धी विपक्षी पार्टीको नेता भएकाले सत्तारुढ दलका प्रधानमन्त्रीको आलोचना गर्न पाउने अधिकार हुने तर्क गर्दै निवेदन खारेज गरिएको हो।
हमीपुर निवासी अधिवक्ता अवधनरेश चन्दलले १८ मार्चमा भएको कंग्रेसको अधिवेशनमा मोदीको आलोचना गरेको भन्दै १९ मार्चमा निवेदन दर्ता गरेका थिए। मुख्य न्यायिक दण्डाधिकारीको अदालतमा एक करोड माग गर्दै गान्धी विरुद्ध निवेदन दायर भएको थियो।
कंग्रेस अध्यक्ष गान्धी विरुद्ध दोस्रो मानहानी मुद्दा भारतको अर्को अदालत देवरियामा विचाराधीन छ। सत्तासीन भाजपाका उत्तर प्रदेश राज्य प्रवक्ता शलभमणि त्रिपाठीले यस्तो निवेदन दायर गरेका हुन्। अध्यक्ष गान्धी विरुद्ध भारतीय संविधानको धारा ४९९ र ५०० को उल्लंघन गर्दै प्रधानमन्त्रीको आलोचना गरेको दाबी गरिएको छ।
प्रवक्ता त्रिपाठीले अध्यक्ष गान्धीले दिल्लीमा आयोजित पार्टीको राष्ट्रिय अधिवेशनमा सम्बोधनका क्रममा प्रधानमन्त्री मोदी, भारतबाट फरार भएका पूर्व आइपिएल कमिस्नर ललित मोदी र बैंक घोटालाका आरोपी निरव मोदीका बीचमा रहेका समानताबारे टिप्पणी गर्दै प्रधानमन्त्रीको मानहानी गरेको दाबी गरेका थिए। सो मुद्दाको सुनुवाइ आगामी अप्रिल ५ का लागि तोकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1683120258.jpg)
-1786602170.png)
