इन्दौर– भारतको इन्दौरस्थित सरवटे बस स्ट्यान्डनजिकै ४ तलाको होटल भत्किँदा कम्तिमा १० जनाको मृत्यु भएको छ। मृत्यु हुनेमा २ जना महिला समेत रहेको जनाइएको छ। घटनामा घाइते भएका १२ जनाको नजिकैको अस्पतालमा उपचार भइरहेको इन्दौर प्रहरीले जनाएको छ।
५० वर्ष पुरानो सो भवनमा शनिबार राति सवा ९ बजेतिर एक कारले ठक्कर दिएपछि सो घटना भएको डिआइजी हरि नारायणचारी मिश्रले बताए। घरको भग्नावशेषभित्र धेरै व्यक्ति पुरिएको हुनसक्ने प्रहरीले अनुमान गरेको छ। हाल घरभित्र फसेकाको उद्दार कार्य चलिरहेको छ।
प्रहरीका अनुसार उक्त होटलका सञ्चालक ७० वर्षीय हरिश पुत्र गणेश सोनी तथा, ६० वर्षीय सत्यनारायण पुत्र रमेश र ३५ वर्षीय राजु पुत्र रतनलालको पनि मृत्यु भएको पुष्टि भएको छ। घटनामा मृत्यु भएका अन्यको शनाखत भइनसकेको प्रहरीले बताएको छ।
भिड बढी हुने इलाका तथा सो भवनमा लज पनि सञ्चालनमा रहेकाले मृत्यु हुनेको संख्या बढ्नसक्ने अनुमान गरिएको छ।
भारतीय प्रहरी, अग्निनियन्त्रक दल तथा स्थानीयहरु उद्दार कार्यमा जुटेका छन्। घटनास्थल अगाडि धेरै संख्यामा एम्बुलेन्सलाई तयारी अवस्थामा राखिएको छ।
घटनापछि भारतीय जनता पार्टीका महासचिव कैलाश विजयवर्गीयले घटनास्थल तथा अस्पतालको अवलोकन गरेका छन्। सो क्रममा उनले घटनाप्रति दुःख व्यक्त गर्दै उपचाररत घाइतेको स्वास्थ्य अवस्थाको बारेमा जानकारी लिएका थिए। उनले नगर निगमलाई पुराना र जिर्ण भएका यस्ता भवनहरुलाई हटाउन निर्देशन दिने बताए।
उता मध्य प्रदेशका मुख्य मन्त्री शिवराज चौहानले मृतकका आफन्तलाई जनही २ लाख तथा घाइतेको उपचारका लागि जनही ५० हजार रुपैयाँ दिने घोषणा गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
