न्युयोर्क– आफ्ना कूटनीतिज्ञलाई देश निकाला गर्ने बेलायत सरकारको घोषणाप्रति रुसले असन्तुष्टि व्यक्त गरेको छ। बुधबार आकस्मिक रुपमा बोलाइएको संयुक्त राष्ट्रसंघको सुरक्षा परिषदको बैठकमा रुसले गम्भीर असन्तुष्टि व्यक्त गरेको हो। बेलायती प्रधानमन्त्री थेरेसा मेले बुधबार २३ रसियाली कूटनीतिज्ञलाई देश निकालाको घोषणा गरेकी थिइन्। पूर्व गुप्तचर ६६ वर्षीय सेर्गेइ स्क्रिपाल र उनकी ३३ वर्षीया छोरी युलियाको हत्या प्रयासमा दोषी ठहर गरी उनीहरूलाई देश निकालाको घोषणा गरिएको अधिकारीहरूले बताएका छन्।
देश निकालाको घोषणा गर्ने क्रममा प्रधानमन्त्री थेरेसा मेले ती कूटनीतिज्ञहरु अघोषित गुप्तचर अधिकारी रहेको पुष्टि भएको बताएकी थिइन्। उनीहरु एक साता बिदामा जान लागेका थिए।
बेलायती प्रधानमन्त्रीले रुससँगको कूटनीतिक सम्बन्ध टुटाउन भने नचाहेको स्पष्ट पारेकी थिइन्। तर दुई पक्षीय उच्चस्तरीय कूटनीतिक सम्पर्क भने तत्कालका लागि स्थगित गरिएको बेलायतले जनाएको छ। बेलायतका पूर्व गुप्तचर स्क्रिपाल र उनकी छोरीलाई गत मार्च ४ मा विष खुवाइएको थियो। उनीहरुको अहिले गम्भीर अवस्थामा उपचार भइरहेको छ। गत मार्च ४ मा ती बाबुछोरीलाई बेलायतको दक्षिण शहर सालिसवरीस्थित एक सपिङ सेन्टर अगाडि बेहोस अवस्थामा भेटिएको थियो।
तर, रुस सरकारले भने ती बाबु-छोरीको हत्या प्रयासमा ती कूटनीतिज्ञहरूको संलग्नतालाई अस्वीकार गर्दै आएको छ। सुरक्षा परिषदको बैठकमा सम्बोधन गर्दै राष्ट्रसंघका लागि रसियाली राजदूत भासिली नेवेन्ज्याले बेलायतको आरोप कुनै पनि हालतमा स्वीकार गर्न नसकिने बताए।
राजदूत नेवेन्ज्याले भने, ‘प्रधानमन्त्री थेरेसा मेबाट भएको अन्यायपूर्ण घोषणा हामीलाई स्वीकार छैन। सो घटनामा रसियाली कूटनीतिज्ञको संलग्नता पुष्टि हुने प्रमाण उपलब्ध गराउन पनि हामी माग गर्छौं।’ उता बेलायतले भने शान्तिपूर्ण बेलायती शहरमा युद्धमा पनि प्रतिबन्ध गरिएको हतियारलाई रसियाले प्रयोगमा ल्याएको आरोप लगाएको छ। राष्ट्रसंघका लागि बेलायती कार्यकारी राजदूत जोनाथन एलेनले करिब १ सयभन्दा बढी बेलायतीहरु रसियाली गुप्तचरहरुसँग सम्पर्कमा रहेको दाबी गरेका छन्।
सुरक्षा परिषदको बैठकमा उनले भने, ‘६६ वर्षीय रसियाली गुप्तचर स्क्रिपाल बेलायतका लागि ‘डबल एजेन्ट’ थिए। स्क्रिपाल र उनकी छोरी युलियालाई ‘नोभिचोक’ नामक विष खुवाइएको छ। जसको उत्पादन उच्च गुणस्तरको प्रगोगशालामा बाहेक सम्भव छैन।’
जोनाथनले अगाडि भने, ‘यो सामान्य अपराध होइन। यो शक्तिको दुरुपयाेग थियो।’ सुरक्षा परिषदको बैठकमा अमेरिका, चीन तथा फ्रान्सका राजदूतहरुले पनि आफ्नो विचार राखेका थिए।
सो क्रममा राष्ट्रसंघका लागि अमेरिकी राजदूत निक्की हेलीले ट्रम्प प्रशासन सो घटनामा पूर्णरुपमा बेलायतको पक्षमा एकजुट रहेको बताइन। उनले सेनासँग जोडिएका २ अधिकारीको हत्या प्रयासको घटनामा रसिया नै जिम्मेवार हुनुपर्ने तर्क गरिन्। उता चीनको तर्फबाट राजदूत मा जाओसुले घटनाको अन्तर्राष्ट्रिय कानुनको आधारमा आवश्यक अनुसन्धान गरी प्रमाण जुटाउँदै सत्यतथ्य बाहिर ल्याउनुपर्ने धारणा राखे।
‘तथ्यमा आधारित निस्कर्षले नै घटनाको सत्यता र इतिहासलाई पुष्टि गर्नेछ’, जाओसुले भने।
सो घटनाका सम्बन्धमा सुरक्षा परिषदको बैठकले आधिकारिक निर्णय भने लिइनसकेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
