काठमाडौं। यमनको दक्षिणी बन्दरगाह सहर अदनस्थित राष्ट्रपतीय दरबार अल-माशिकमा हुथी विद्रोहीले गरेको क्षेप्यास्त्र आक्रमणमा पाँच जनाको मृत्यु भएको छ भने १६ जना घाइते भएका छन्।
अन्तर्राष्ट्रिय मान्यताप्राप्त यमन सरकारको मुख्यालयका रूपमा प्रयोग हुँदै आएको दरबारमा पाँचवटा ब्यालेस्टिक क्षेप्यास्त्र प्रहार गरिएको अधिकारीहरूले बताएका छन्।
यमनका सूचना मन्त्री मोअम्मर अल-इरियानीले बीबीसीसँग कुरा गर्दै आक्रमणका बेला प्रधानमन्त्री र अन्य मन्त्रीहरू सुरक्षित रहेको बताएका छन्। यमनका स्वास्थ्य मन्त्री कासिम बुहैबेका अनुसार मृतक तथा घाइतेमा दरबारको सुरक्षा गर्ने कर्मचारी र सर्वसाधारण कर्मचारीसमेत छन्।
हुथी विद्रोहीका सैन्य प्रवक्ता याह्या सारीले अदनस्थित ‘साउदी शत्रुको सैन्य सञ्चालन मुख्यालय’ लाई लक्षित गरी आक्रमण गरेको दाबी गरेका छन्।
यमनका प्रधानमन्त्री शाया जिन्दानीले आक्रमणको निन्दा गर्दै यसलाई ‘कायरतापूर्ण’ र हुथी विद्रोहीको आपराधिक व्यवहारको निरन्तरता भनेका छन्। उनले सरकारले आफ्नो जिम्मेवारी पूरा गरिरहने बताउँदै हुथीविरुद्धको सैन्य अभियानमा सरकारी सेनाको मनोबल कमजोर नहुने बताएका छन्। सरकारी सेनाले यमनको दक्षिणपश्चिमी लालसागर तट तथा अन्य मोर्चामा हुथीविरुद्ध अभियान चलाइरहेको छ।
यमनमा सन् २०१४ मा हुथी विद्रोहीले राजधानी सानाबाट अन्तर्राष्ट्रिय मान्यताप्राप्त सरकारलाई हटाएपछि गृहयुद्ध सुरु भएको थियो। सन् २०१५ मा साउदी नेतृत्वको अरब गठबन्धनले सरकारको नियन्त्रण पुनःस्थापित गर्ने उद्देश्यले सैन्य हस्तक्षेप गरेपछि द्वन्द्व थप चर्किएको थियो।
चार वर्षदेखि कायम अनौपचारिक युद्धविराम जुलाईमा कमजोर हुन थालेको थियो। हुथी विद्रोहीले साउदी अरबविरुद्ध ‘समुद्री नाकाबन्दी’ घोषणा गर्दै विमानस्थल, तेल पूर्वाधार र लालसागरमा रहेका ट्याङ्करलाई लक्षित गरी क्षेप्यास्त्र तथा ड्रोन आक्रमण सुरु गरेका थिए।
हुथी समूहले आफ्नो नियन्त्रणमा रहेको भूभागमाथि साउदी अरबले लगाएको भनिएको नाकाबन्दी र साना विमानस्थलमा भएको हवाई आक्रमणको प्रतिकारस्वरूप यस्तो कदम चालेको बताउँदै आएको छ।
सेप्टेम्बरमा हुथी विद्रोहीले विश्वव्यापी जलयातायातका लागि महत्त्वपूर्ण बाब अल-मन्देब जलडमरूमध्यनजिक यमनको दक्षिणपश्चिमी लालसागर तटको केही भूभाग कब्जा गरेपछि संघर्ष थप चर्किएको थियो। त्यसको प्रभाव विश्व बजारमा तेलको मूल्य वृद्धिमा समेत परेको समाचारमा उल्लेख छ।
गत साता साउदी हवाई आक्रमणको सहयोगमा सरकारी सेनाले ठूलो प्रत्याक्रमण सुरु गरेपछि बाब अल-मन्देबलाई हेर्ने रणनीतिक भूभाग पुनः आफ्नो नियन्त्रणमा लिएको दाबी गरेको थियो।
यमनको स्वास्थ्य मन्त्रालयका अनुसार अगस्ट ६ यता जारी संघर्षमा कम्तीमा एक हजार २८२ जनाको मृत्यु भएको छ भने पाँच हजार ८९० जना घाइते भएका छन्। संयुक्त राष्ट्रसंघका अनुसार थप दुई लाख एक हजार मानिस विस्थापित भएका छन्। यसैबीच, हैजाका शंकास्पद बिरामीको संख्यामा पनि चिन्ताजनक वृद्धि भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
