काठमाडौं- निर्वाचन आयोगले उपराष्ट्रपतिको निर्वाचन चैत ९ गते गर्ने भएको छ। राष्ट्रपति निर्वाचन सकिएलगत्तै आयोगले बुधबार उपराष्ट्रपति निर्वाचनको मिति तय गरेको हो।
उम्मेदवारी दर्ता गर्ने समय ३ गते तोकिएको छ। भोलि मतदाता नामावली प्रकाशन गरिने र ३ गते उम्मेदवारी दर्ता गरी ४ गते उम्मेदवारको अन्तिम नामावली प्रकाशन गर्ने कार्यक्रम छ।
चैत ९ गते बिहान १० बजेदेखि अपराह्न ३ बजेसम्म नयाँ बानेश्वरस्थित अन्ततर्राष्ट्रिय सम्मेलन केन्द्र भवनमा मतदान हुनेछ।
संविधान अनुसार राष्ट्रपति र उपराष्ट्रपति फरक लिंग वा समुदायको हुनुपर्छ। राष्ट्रपतिमा खस आर्य समुदायबाट विद्यादेवी भण्डारी निर्वाचित भएकाले त्यस बाहेकका लिंग वा समुदायको व्यक्ति मात्र उपराष्ट्रपतिको उम्मेदवार बन्न पाउनेछन्।
वाम गठबन्धनको बहुमत रहेको संघीय संसदमा एमालेका तर्फबाट राष्ट्रपति निर्वाचित भएकाले उपराष्ट्रपतिको उम्मेदवार माओवादीको भागमा परेको छ। माओवादी केन्द्रले हालकै उपराष्ट्रपति नन्दबहादुर पुनलाई उठाउने तयारी गरेको छ।
यसअघि राष्ट्रपति पदमा उम्मेदवार उठाएको प्रतिपक्ष नेपाली कांग्रेसले उपराष्ट्रपतिमा पनि उम्मेदवारी दिने तयारी गरेको बुझिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
