एजेन्सी- अत्याधिक हिमपात तथा तापक्रममा आएको कमीका कारण युरोपभर ६० भन्दा बढी मानिसको मृत्यु भएको छ। तापक्रम शुन्यभन्दा तल झर्दा पोल्यान्डमा मात्रै २३ जनाको ज्यान गएको सरकारी अधिकारीहरुले बताएका छन्।
साइबेरियन मौसमी प्रणालीमा आएको परिवर्तनसँगै कतिपय देशहरु लगातारको हिमपात तथा न्युन तापक्रमको चपेटामा परेका हुन्। सो प्रणालीलाई फरक–फरक उपनामले चिनिने गरिएको छ। बेलायतमा ‘बिस्ट फ्रम दि इस्ट’, नेदरल्यान्डमा ‘साइबेरियन बियर’ तथा स्विडेनमा ‘स्नो क्यानन’ उपनाम दिइएको छ।
पोल्यान्डमा अधिकांश मानिसको मृत्यु हिउँमा चिप्लिएर भएको बताइएको छ। चिसोले कठ्याङ्ग्रिएर तथा घरबारबिहिन व्यक्तिहरुले न्यानो मिल्ने भन्दै अत्याधिक रक्सी सेवन गर्दा पनि कतिपय मानिसहरुको मृत्यु भएको बिबिसीले लेखेको छ।
पछिल्लो एक सातादेखि लगातार रातको समयमा माइनस १५ डिग्रीसम्म तापक्रम पुग्ने गरेको अधिकारीहरुले बताएका छन्। शुक्रबार मात्रै फ्रेन्च एल्पसस्थित इन्ट्राउनिज रिसोर्टमा गएको हिम पहिरोका कारण ४ जनाको मृत्यु भएको थियो।
एएफपीका अनुसार पछिल्लो एक साताभित्र स्लोभाकियामा ७, चेक रिपब्लिकमा ६, लिथुवानियामा तथा फ्रान्समा समान ५/५ जना र स्पेनमा कम्तिमा ३ जनाको मृत्यु भएको छ। इटाली, रोमानिया, सर्विया, स्लोभानियामा समान २/२ जनाको ज्यान जाँदा चिसोले कठ्याङ्ग्रिएर बेलायत, नेदरल्यान्ड, स्विडेन, नर्वेमा १/१ जनाको मृत्यु भएको छ।
मौसमी प्रतिकुलताका कारण आयरल्यान्डका अधिकांश यातायात सेवा(बस तथा रेल) तथा हवाई सेवा शनिबारसम्मका लागि स्थगित गरिएको छ। इंग्ल्यान्ड, वेल्स तथा आयरल्यान्डमा बिहिबार हिमपातसँगै ‘इमा’ नामको आँधीसमेत आएको छ। एएफपी समाचार एजेन्सीका अनुसार प्रभावित क्षेत्रहरुमा सुरक्षित बासस्थानको व्यवस्था मिलाइएको छ।
आयरल्यान्डका मुख्य विमानस्थल डब्लिन र कर्क विमानस्थलमा शनिबारसम्मका लागि सबै आन्तरिक तथा बाह्य उडान सेवालाई स्थगित गरिएको छ। देशभरका सबै विद्यालयमा पठनपाठनसमेत बन्द गरिएको छ।
स्वास्थ्य मन्त्रालयले अस्पताल तथा स्वास्थ्य संस्थाहरुलाई अत्यावश्यकीयबाहेक अन्य सबै शल्यक्रिया स्थगित गर्न सुचित गरेको छ। बेलायत तथा आयरल्यान्डमा सरकारी सेना, सामाजिक संस्था तथा स्वयम्सेवकहरुलाई उद्दार कार्यमा खटिन सरकारले निर्देशन दिएको छ।
लन्डन, पेरिस तथा ब्रसेल्समा सञ्चालित रेल सेवा ‘युरोस्टार’ले पनि आफ्नो सेवालाई केहि समयका लागि स्थगित गरेको जनाएको छ। स्विजरल्यान्डको जेनेभास्थित विमानस्थलमा केहि समयका लागि सेवा स्थगित गर्दै पुनः सुचारु गरिएको छ। मौसममा आउने प्रतिकुलतालाई हेर्दै उडान ढिलो तथा रद्द हुनसक्ने विमानस्थल स्रोतले सुचीत गरेको छ।
उता इटालीका केहि स्थानमा सडक तथा रेलवे ट्रयाकमा हिमपात तथा बरफले क्षति पुर्याएको स्थानिय प्रहरीले जानकारी दिएको छ।
रसियन वितरकले इन्धन आपुर्ती बन्द गरेपछि ग्यास तथा उर्जा शक्ति संचयका लागि युक्रेन सरकारले राज्यमा सञ्चालित सबै विद्यालय तथा शैक्षिक संस्थाहरु बन्द गर्न निर्देशन दिएको छ।
युरोपका केहि देशमा मौसममा सुधार आइसकेको भएपनि केहि देशहरुमा भने केहि दिनसम्म तापक्रम अझै घट्ने मौसमविद्हरुले बताएका छन्। उत्तरी युरोपमा अझै केहि दिन तापक्रम स्थिर रहने तथा बेलायत तथा आयरल्यान्डमा भने अन्य क्षेत्रको तुलनामा बढि चिसो हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
