मतदान गर्न मतदानस्थलमा जाने क्रममा सुरक्षा जाँचमा एनआरएनए प्रतिनिधि।
काठमाडौं- गैरआवासीय नेपाली संघ (एनआरएनए)को नवौं विश्व सम्मेलनमा नयाँ कार्यसमिति चयनका लागि बुधबार बेलुका स्थगित भएको मतदान आज हुँदैछ। तर, आज हुने भनिएको मतदान विद्युतीय प्रक्रियाबाट नहुने भएको छ।
बुधबार साँझ करिब साढे ८ बजे सुरु भएको मतदान आधा घन्टाभन्दा केही बढी समयसम्म चलेपछि स्थगित भएको थियो। मतदानका लागि विद्युतीय मेसिन प्रयोग गरिएको थियो। सो मेसिन बिग्रिएको भन्दै निर्वाचन समितिले मतदानको कार्यक्रम स्थगित गरिएको जानकारी दिएको थियो।
स्थगित मतदान बिहीबार बिहान साढे ८ बजेबाट पुनः सुरु हुनेगरी कार्यक्रम तय गरिएको निर्वाचन समितिले जनाएको छ। तर, मतदान विद्युतीय मेसिनबाट भने नहुने निर्वाचन समितिले स्पष्ट पारेको छ। मतदानका लागि व्यवस्था गरिएको विद्युतीय मेसिन बिग्रिएपछि अब मतदानलाई मतपत्रमार्फत नै कागजी प्रक्रियाबाटै अघि बढाइने भएको छ।
तर, यसअघि विद्युतीय मेसिनबाट भएको मतदानका विषयमा के हुने भन्ने बारेमा भने स्पष्ट पारिएको छैन।
यसअघि एनआरएनएले नवौं विश्व सम्मेलनका दौरानमा सीप र प्रविधि भित्र्याउने भनेको थियो।
यसअघि बुधबार साँझ सम्मेलनमा मतदानका लागि उपस्थित प्रतिनिधिले नाराबाजीसमेत गरेका थिए। सम्मेलनमा जम्मा २ हजार ६ सय ५६ जना प्रतिनिधि सहभागी छन्। विश्वका विभिन्न ८१ देशबाट एनआरएनए प्रतिनिधिको उपस्थिति रहेको बताइएको छ।
सम्मेलन स्थलमा नाराबाजी भएपछि बुधबार उच्च सुरक्षा सतर्कता अपनाइएको थियो। मोबाइलसमेत आफ्नो साथमा राखेर मतदानस्थलमा प्रवेश गर्न प्रतिनिधिहरूलाई रोक लगाइएको थियो।
समयमा मतदान सुरू नभएको र उम्मेदवारीमा राजनीतिक भागबन्डा भएको भन्दै केही प्रतिनिधि नाराबाजीमा उत्रिएपछि प्रहरीले हस्तक्षेपसमेत गर्नुपरेको थियो।
आफूखुसी विधान परिवर्तन गर्न खोजिएको र मतदान सुरु नगर्ने खेल भएको भन्दै नाराबाजी भएको हो। उनीहरूले 'निर्वाचन बहिस्कार गरौं' भन्दै नारासमेत लगाएका थिए। पछि प्रहरीले बल प्रयोग गरी उनीहरुलाई तितरबितर पारेको थियो।
प्रतिनिधिहरुले विरोध गर्नसक्ने भन्दै आज पनि सम्मेलन स्थलमा सुरक्षा सतर्कता अपनाइएको छ।
एनआरएनएको विश्व सम्मेलन मंगलबारबाट काठमाडौंमा सुरु भएको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
