राजविराज- १५ दिने जागरण अभियानको समापन कार्यक्रममा सांसद तेजुलाल चौधरीमाथि अभद्र व्यवहार र हातापात भएपछि सप्तरी कांग्रेसमा वाकयुद्ध सुरु भएको छ।
मंगलबार राजविराजमा आयोजित विरोधसभामा अपमानित भएर निस्किएका सांसद चौधरीले कोणसभामार्फत सभापति दिनेश यादवलकै निर्देशनमा आफुमाथि आक्रमण भएको आरोप लगाएका थिए। गुण्डाशैलीमा पार्टी संचालन गरिरहेका यादवको विरोध गर्दा अपमान गरेको र भौतिक रूपमा आक्रमण गराएको उनको आरोप थियो।
सभापति यादवले वुधबार पार्टी कार्यालयमा पत्रकार सम्मेलन गरी मंगलबार भएको घट्ना सांसद चौधरीकै व्यवहारको उपज भएको बताए। सांसद चौधरीले अपशब्द प्रयोग गरी नेता/कार्यकर्तालाई गाली गर्न थालेपछि उनलाई सम्झाउन आएका कार्यकर्तासँग धकेलाधकेल भएको यादवको भनाइ छ।
आसन ग्रहणका विषयमा विवाद गरेपछि आफू र केन्द्रीय प्रतिनिधि अजय चौरसियाको आग्रहमा मञ्चमा पुगेका चौधरीले तथानाम गालि गर्न थालेपछि आफुले ‘अनुशासनमा बस्नोस्’ भनेर आग्रह गर्दा ‘तँलाई ठीक पार्दिन्छु भन्यो’ भन्दै दुस्प्रचार गरेको बताए।
राजविराजस्थित पब्लिक विन्देश्वरी माविमा आयोजित कार्यक्रमको औपचारिक सुरुवात भएपछि आसन ग्रहणको विषयमा विवाद भएको थियो। मर्यादाक्रम नमिलेको भन्दै चौधरीले मञ्चमा जान अस्वीकार गरेका थिए। तर, नेताहरूको आग्रहपश्चात् उनी मञ्चमा पुगेपछि धक्का दिएर निकालिएको थियो।
कार्यक्रममा विवाद भएपछि कांग्रेसको कार्यक्रम दुई भागमा विभाजन भएको थियो। चौधरीसहितका एक पक्षीय नेता कार्यकर्ताले स्थानीय जनआन्दोलन चौकमा कोण सभा गरेका थिए भने पवि माविको सभालाई पूर्व केन्द्रीय सदस्य अजय कुमार चौरसिया, रामकुमार चौधरी, सभापति यादवलगायतले सम्वोधन गरेका थिए।
सभापति यादवले सांसद चौधरी र उनी समर्थक कार्यकर्ताले आफनै कार्यक्रममा उदण्डता प्रस्तुत गरेको भन्दै घट्नामा संलग्नलाई तत्काल कारबाही गर्न केन्द्रीय समितिसँग माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
