इटहरी- एक महिनादेखि जारी नेकपा इटहरीको विवाद अझै मिल्न सकेको छैन। पार्टी विधान र पद्धतिअनुसार चल्नुपर्ने भन्दै असन्तुष्ट युवाहरुले अध्यक्ष पुष्पकमल दाहाल प्रचण्डलाई ज्ञापनपत्र बुझाएका छन्।
योसँगै पार्टी समायोजन हुँदा उत्पन्न नेकपा इटहरीको विवाद केन्द्रीय अध्यक्षसम्मै पुगेको छ। असन्तुष्ट पक्षले सुनसरीको झुम्का आएका प्रचण्डलाई आइतबार ज्ञापनपत्र बुझाएका हुन्।
पार्टी एकीकणपछिको कमिटी समायोजन गर्दा पार्टी केन्द्रले बनाएको मापदण्ड, अन्तरिम विधान र निर्णयको बेवास्ता गरी कमिटीहरु गठन गरिएको ज्ञापनपत्रमा उल्लेख गरिएको छ।
खासगरी पूर्व एमालेको तर्फबाट मनोमानी ढंगले नियम मिचेर कमिटी समायोजन गरिएको ज्ञापनपत्रमा उल्लेख छ। असन्तुष्ट ५ सय ३७ जना पार्टी सदस्यहरुले लिखित ज्ञापनपत्र बुझाए पनि उपमहानगर कमिटी, जिल्ला कमिटी र प्रदेश कमिटीले वास्ता नगरेको र तालाबन्दी गर्नुपरेको ज्ञापनपत्रमा भनिएको छ।
असन्तुष्ट पक्षले जटिलताको अन्त्य गरी सहज वातावरण बनाउन अध्यक्ष प्रचण्डको गम्भीर ध्यानाकर्षणसमेत गराएको हो। ज्ञापनपत्रमा ३ सय ३७ जनाको हस्ताक्षर सम्मिलित पत्र पनि उल्लेख गरेका छन्। नेकपा इटहरीमा नगर सचिवमा काशीनाथ दंगाललाई पार्टीको रोलक्रम तथा मर्यादाविपरीत नियुक्त गरेको भन्दै उनलाई पदबाट तत्काल फिर्ता बोलाउनुपर्ने माग गर्दै कार्यकर्ताहरु आन्दोलनमा छन्।
आन्दोलनमा उत्रिएका असन्तुष्ट पक्षले गएको भदौ १२ मा इटहरी पार्टी कार्यालय र भदौ ३१ मा नेकपा प्रदेश १ को कार्यालयम समेत तालाबन्दी गरेका छन्।
प्रदेश र जिल्ला कमिटीले आफूहरुको माग बेवास्ता गरेकोले केन्द्रीय स्तरमै आवाज उठाउनु परेको असन्तुष्ट समूहका नेता सुनिल कार्कीले बताए। पार्टीभित्र असन्तुष्टि चुलिँदै जाँदा युवाहरूमा राजनैतिक वितृष्णा फैलिने भन्दै बेलैमा सचेत हुन नेतृत्वलाई दबाब दिएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
